焗雞翼 + 菜心 ( 31-OCT-2021 )

( 31-OCT-2021  SUN )

今朝 8 點半都醒咗   咁就去徑步啦   之後去超市買菜同香蕉   再買埋麵包就番屋企 lu ~

食完早餐就大清潔屋企   拖完地再大清潔廁所   沖埋涼就即出發去里奧大人公司 ~

次次徑完步   沖咗涼都好熱   里奧大人同事見我無着外套好奇怪   哈哈 ~

崇拜完就去等里奧大人放工   因為要等勁哥   所以同里奧大人一齊同阿妹頂爺傾偈   傾咗 20 分鐘都走人 lu ~

里奧大人話好餓   咁食埋先番屋企啦 ~

入迷牛肉辣拌拉麵 ($55) - 有醬汁嘅   不過唔夠多   所以個麵比較乾

辣炒泡菜豬肉飯 ($65) - 賣相唔多掂   同埋無味嘅   最後要加多碟泡菜先有味道咋   但豬肉份量就好多   今次試新嘢   但麻麻哋

好在有泡菜   哈哈

終於喺香港見到 ASTRO 廣告牌   真係勁開心勁感動   搵日要去打卡   哈哈 ~

我要去超市買菜同豬肉   所以叫里奧大人番屋企先呀   等佢可以沖完涼即刻瞓覺 ~

我沖完涼就開機洗衫   之後熨衫喇   其實我都好眼瞓   但瞓唔到   咁做嘢啦 ~

6 點左右預備晚餐   可以早啲徑步 ~

是日懶餐 - 焗雞翼 + 菜心

焗雞翼 - 其實係韓式辣醬雞翼   不過我唔落包辣醬   唔想里奧大人連續兩晚都咁刺激   哈哈 ~

菜心 - 呢份 $11   但 4 棵細嘅生菜要 $9   所以都買菜心   好似抵啲咁 ~

洗埋碗就一齊去徑步   今晚攰呀   可能每月一到   所以徑步半個鐘係極限 ~

沖完涼都休息   我 11 點都瞓先喇   里奧大人就繼續睇書 ~

馳名狗仔粉 & 細雜燴 (外賣) ( 30-OCT-2021 )

( 30-OCT-2021  SAT )

呢兩晚發得勁多夢   起身時候都有啲暈陀陀咁   哈哈 ~

早餐食芝腿治烘底   星期六先食到呢啲   因為平時實在太早 Lunch Time 喇 ~

菇場靜英英   西瓜 10 點幾已經唔喺度   做咩唔大方啲比我哋 Off 呀   哈哈哈哈 ~

放工即走   約咗里奧大人食 Lunch 呀 ~

泰式金邊粉 ($62) - 好味呀   我鍾意食   但里奧大人就麻麻哋   唔係咁鍾意有甜味

辣椒肉碎飯 ($62) - 獨孤一味   哈哈哈哈   不過呢個又真係好味道嘅

泰式蝦餅 (+$12) - 好大塊   都好抵 

酸辣鳳爪 (+$12) - 必食   因為真係好抵又好味   我又可以同家姐 Share

凍奶茶都好飲架   係泰式奶茶呢 

食完就去家姐屋企   里奧大人就番工呢 ~

2 點 15 分左右到家姐屋企   佢話等我幫佢執嘢喎   話喺公司拎咗啲嘢番屋企   濕濕碎碎唔想執   所以叫我執喎 ~

好耐無見 Berry 啦   樸完我就全程喺梳化底   餵佢食零食先出嚟咋

又唔係驚我   但又唔出嚟陪我   嗚嗚嗚嗚

同家姐傾偈啦   家姐都話好似好耐無面對面傾偈咁   哈哈哈哈 ~

4 點半仍然呢個 Post   哈哈哈哈

同家姐 5 點幾食下午茶   咁我肯定可以頂到 9 點   哈哈 ~

係幾好味   但 Cream 真係太漏   食剩少少都唔食喇

6 點鬆啲同家姐一齊出門口   感恩大家都好快有車 ~

今晚未夠鐘就開始   又遲幾分鐘先落堂   實在太開心   哈哈 ~

買埋晚餐就番屋企   食完先沖涼 ~

今晚 11 點幾都瞓   出咗一日街有啲攰呀 ~

焗煙鴨胸 + 蟹棒醬油出前一丁 ( 29-OCT-2021 )

( 29-OCT-2021  FRI )

呢排啲天氣都唔錯   起碼唔係焗熱   起身都有啲涼意   但徑完步就覺得熱   不過之前都會沖下凍水   依家真係覺得凍水好凍   哈哈 ~

早餐食吞拿魚包   好好味 ~

菇場唔太忙   但有啲攰   真係無咩原動力做嘢   哈哈 ~

Lunch Time 出去行下   買埋乳酪再去買鯪魚球米   之後番菇場 lu ~

我將以前個飯盒袋比里奧大人用   因為唔想佢將個飯盒放入背囊   我唔接受到飯盒放入背囊呀   覺得背囊會一陣味咁   同埋拎住飯盒   啲餸就唔會好似打風咁呢

做下停下咁啦   放工可以即走 ~

里奧大人 6 點鬆啲都番到屋企   等佢沖埋涼就開餐 lu ~

是日懶餐 - 焗煙鴨胸 + 蟹棒醬油出前一丁

焗煙鴨胸 - 屋企有呢個儲備真係好   又唔駛解凍   真係幾時食都得 ~

蟹棒醬油出前一丁 - 里奧大人鍾意食蟹棒   我覺得好過蟹柳   始於太細條   我會煮到散修修呢 ~

洗埋碗就同里奧大人去徑步   今晚都有出汗   仲諗住涼涼地唔會出汗添 ~

里奧大人番到屋企就開冷氣   佢應該真係好熱   哈哈   不過呢幾晚瞓覺都有開冷氣瞓   因為里奧大人成日話瞓到半夜好熱   我話咁開冷氣瞓   好過半夜熱醒再開 ~

沖埋涼就食生果   之後又睇文森佐   但我 10 點半都瞓喇   呢排瞓得麻麻哋   早啲瞓都好 ~

辣醬焗雞翼 + 蠔油燜節瓜 ( 28-OCT-2021 )

( 28-OCT-2021  THU )

感恩一覺瞓天光   不過都發咗唔少夢   哈哈 ~

今朝徑步都有出汗   同埋呢兩晚都要開冷氣瞓   仲諗住唔駛開添 ~

早餐食腿蛋包   細細個食呢啲腿蛋包   塊甜蛋係好厚㗎   所以食一個係覺得超級飽   依家真係成個包跌咗落地都唔知㗎   因為實在太輕身呢 ~

菇場唔忙   不過唔 Filing 喇   好似每月一到咁   有啲攰 ~

Lunch Time 出去買節瓜   行下行下又半個鐘   之後買燒賣炒米粉番菇場食 ~

仍然唔忙啦   同阿花 Whatsapp 傾偈   所以好快又放工 ~

買埋糖水同雞骨草就搭車番屋企   之後里奧大人都差唔多番到 lu ~

今晚 7 點唔夠都開餐   依家里奧大人開始帶飯   不過我話之後應該又會想食下出街嘢   因為我以前都係咁   同埋其實我想煮兩個餸加個菜   咁樣夜晚同中午食嘅可以唔同嘛   但都係諗下先   始終我識煮嘅款式唔多 ~

是日晚餐 - 辣醬焗雞翼 + 蠔油燜節瓜

辣醬焗雞翼 - 最鍾意焗嘢   感到快趣同乾脆   最緊要又好味嘛   哈哈 ~ 

蠔油燜節瓜 - 里奧大人帶飯就比佢帶啲有味嘅瓜菜啦   有啲汁無咁寡 ~

洗埋碗抖陣就自己去徑步   里奧大人話晏畫做嘢出咗成身汗好攰呀   所以唔徑步 lu～

咁我徑完步去買雪糕同豬扒   奧大人見我拎住袋嘢入屋就好驚   話唔係又買無花果呀嘛 ?!?!?!  痴線咩   駛唔駛咁驚呀 ?!   哈哈哈哈 ~

開機洗衫之後就沖涼   抖陣就食糖水 ~

芝麻糊 & 綠豆沙都好味

今晚再睇多次文森佐   因為有啲係之前根本睇唔切   哈哈 ~

10 點 45 分準時瞓覺   里奧大人就繼續睇書 ~

燒汁辣椒醬豬扒 + 雙丸拚芋絲 + 西蘭花 ( 27-OCT-2021 )

( 27-OCT-2021  WED )

呢排瞓得唔係咁好   係唔係轉天氣呢 ?!

今朝肯定無咁涼喇   因為我徑完步係出汗 ~

早餐食奶醬多   又飲番咖啡添   但今朝好多嘢做   又要對數字   所以想精神啲呀   哈哈 ~

菇場勁忙呀   搞到我有啲胃痛 ~

Lunch Time 出去行咗半個鐘   之後買牛什米番菇場慢慢食 ~

仍然忙呀   所以感覺好快放工 ~

里奧大人 6 點幾番到屋企   沖埋涼要等陣先可以開餐 ~

我發覺呢排煮嘢慢咗   唔似以前咁心心急急   咁希望條命長啲啦   哈哈哈哈 ~

是日晚餐 - 燒汁辣椒醬豬扒 + 雙丸拚芋絲 + 西蘭花

燒汁辣椒醬豬扒 - 就咁燒汁好甜   依家會加一湯匙韓國辣椒醬   再加埋乾蔥頭同蒜頭   咁成個餸都好好味   哈哈   依家會焗熟豬扒再落鑊加配料一齊炒   咁樣唔駛比熱油彈到   最正係唔駛大清潔廚房呀 ~

雙丸拚芋絲 - 原來紅色點點嗰粒係芝士丸   我唔係咁鍾意食   因為我想食蟹籽丸呢   芋絲喺一田買   只係 $6.5 仲要係日本製 ~

西蘭花 - 食埋最後呢兩個   又要停下喇   哈哈 ~

里奧大人終於肯帶飯啦   佢話真係食出面啲嘢食到好厭   不過佢驚我辛苦   我話以前我都帶飯   只係煮多啲之嘛   咁樣仲好 ~

唉   可能啲指天椒辣得滯   食飯食到一半   個胃好痛呀   以前真係起碼 4 隻指天椒   仲要食埋落肚   依家純粹調味咋 ~

洗埋碗抖陣   感恩個胃唔痛   所以 8 點左右就同里奧大人一齊去徑步喇 ~

沖埋涼就食無花果   呢兩星期都連續食咁滯   里奧大人個樣好慘咁話唔食得唔得 ?!   我話駛唔駛咁慘呀 ?!   佢話食咗好多晚食到好驚喎   我話食埋聽晚無啦 ~

今晚睇文森佐大結局   韓劇真係硬係衰收尾   可以煽情但就唔合情合理   明明由頭到尾都好好睇嘛 ~

終於睇哂成套劇   今晚可以 10 點 45 分瞓覺喇   實在太好   哈哈 ~

燒汁豬扒 + 西蘭花 ( 26-OCT-2021 )

( 26-OCT-2021  TUE )

今朝又係鬧鐘未響都起身   仲諗住尋晚夜瞓   會起唔到身添   哈哈 ~

早餐食腿蛋治   又要飲咖啡 ~

尋日阿花買咗   今日到我買   車銀優呢輯相實在太靚喇

菇場忙呀   做極唔完咁 ~

Lunch Time 出去行陣   又買下嘢   之後番菇場食 Flakes + 乳酪 ~

里奧大人成日覺得 Flakes 入面會有好多乾果   我話唔好咁天真啦 

今日全日勁忙呀   好似好耐無試過   哈哈 ~

放工即番屋企   雖然菇場好忙   但唔會話個人好攰   反而無嘢做呢   個人仲攰咁架 ~

里奧大人 6 點鬆啲番到屋企   咁叫佢沖埋涼等食喇 ~

6 點 45 分可以開餐   呢個時間最好   可以慢慢食 ~

是日晚餐 - 燒汁豬扒 + 西蘭花

燒汁豬扒 - 呢度只係 1 塊半豬扒   我食咗兩嚿咋   本身諗住食埋個麵再食最後一嚿   點知里奧大人夾埋   佢應該鍾意食   因為平時好少會咁   哈哈 ~

西蘭花 - 好耐無食喇   又突然好想食番   以前會煮兩大個   依家只會煮一細個   我覺得西蘭花比較脹胃   唔可以好似以前食咁多 lu ~

洗埋碗   8 點就同里奧大人一齊徑步   佢話勁哥想做運動   之後話我瘦咗好多   咁就話我因為早晚運動   其實有時間做運動真係好好   又唔駛錢又健康 ~

番到屋企即開機洗衫   沖埋涼就睇文森佐   都已經 9 點半喇   要快啲睇   哈哈 ~

今晚又 11 點幾先瞓   真係要快快睇哂   咁先可以早啲瞓 ~

腐皮卷 & 素餃 & 酸齋拚齋鴨腎 (外賣) + 煙黑椒牛肉片芝麻包 ( 25-OCT-2021 )

( 25-OCT-2021  MON )

今朝 6 點半起咗身   本身諗住再瞓   但又瞓唔到   所以去徑步   最搞笑係我本身無諗住今朝徑步   想瞓到 7 點半先起身   點知反而早咗起身 ~

不過好感恩今朝早咗一班車   因為塞車呀   同平時落車時間一樣 ~

早餐食奶醬多   因為唔係咁餓 ~

菇場唔係咁忙   但今朝嘅時間過得好快咁 ~

Lunch Time 去一田買齋   買下買下又一袋   仲要原來已經 12 點半喇   要拿拿聲去買炒麵番菇場食呢 ~

仍然忙 Filing   所以時間都係好快過   咁放工即走啦 ~

番到屋企即預備晚餐   估唔到都要 7 點先可以開餐 ~

是日懶餐 - 腐皮卷 & 素餃 & 酸齋拚齋鴨腎 (外賣) + 煙黑椒牛肉片芝麻包

腐皮卷 & 素餃 - 好鍾意食呢兩樣   不過食剩 2 條腐皮卷   咁聽晚再見佢啦 ~

酸齋拚齋鴨腎 (外賣) - 呢兩樣都係好鍾意食   所以次次食素餐都係呢 4 樣嘢   哈哈 ~

煙黑椒牛肉片芝麻包 - 終於清哂包牛肉片   有機會都會再買嚟食   因為實在太方便   懶起上嚟都可以整   好過煮水餃呀   哈哈 ~

洗埋碗抖陣就去徑步   之後再去 759 買馬格利酒   其實我頭先放工已經買咗 4 支桃味   依家再買多 2 支桃味同 2 支原味   我覺得好飲呀   里奧大人話估唔到我鍾意飲   哈哈   最感恩係今日做特價只係 $21.9/2支呀 ~   

沖完涼就睇文森佐   但我要一路睇一路投票 ~

好開心 JinJin 贏咗 K-POP偶像 (個人排名) 呀   呢個月真係好忙咁投票   我覺得 AROHA 真係好勁   今日同本身第一位係相差三十幾萬票   初初我都有啲氣餒   但我要相信 AROHA   所以好感恩 JinJin 贏咗第一位呀 ~

今晚 11 點幾先瞓   同埋唔知係咪頭先緊張得滯   唔係咁眼瞓   不過點都要瞓囉   聽朝要去徑步嘛 ~

煙黑椒牛肉片芝麻包 + 韓式辣醬雞翼 + 蕃茄南瓜紅蘿蔔湯 ( 24-OCT-2021 )

( 24-OCT-2021  SUN )

今朝 8 點半都醒咗   咁起身徑步 lu ~

去完超市買菜再去買麵包   番到屋企就可以食早餐喇 ~

食完就有氣有力   可以大清潔屋企再拖地 ~

沖埋涼就出發去里奧大人公司幫下手   不過其實都係阿妹頂爺傾偈   傾咗半個鐘呀   所以接近 12 點先番崇拜 ~

崇拜完畢就等里奧大人放工    最搞笑阿妹話今日趕住走   佢個女話好餓   叫佢唔好傾偈快啲番屋企   頂爺話好在頭先一齊傾完   哈哈 ~

里奧大人 1 點 45 分左右放工   去完米線陣食 Lunch  之後就去姑奶屋企幫手整啲嘢   搞掂哂就番屋企   已經 4 點喇   快快沖埋涼都要即刻滾湯喇 ~

睇下 Youtube   話咁快又已經 6 點   要預備晚餐喇 ~

今晚 7 點唔夠就可以開餐   咁樣早啲食完   可以快啲睇劇 ~

是日懶餐 - 煙黑椒牛肉片芝麻包 + 韓式辣醬雞翼 + 蕃茄南瓜紅蘿蔔湯

煙黑椒牛肉片芝麻包 - 家姐之前買比我嘅黑椒牛肉片   今晚點都要食埋去喇   今朝特登去買芝麻包   貪佢細細個嘛   唔會食包包食飽 ~

韓式辣醬雞翼 - 就咁食包實在太單調   所以再焗雞翼 ~

蕃茄南瓜紅蘿蔔湯 - 又係時間飲下呢個素湯   次次都要飲兩三晚   哈哈 ~

沖埋涼就食生果   之後即睇文森佐啦 ~

我睇 "太陽的後裔" 都已經鍾意宋仲基   今套佢做律師真係型到不得了   佢着嘅西裝又勁好睇喎   我次次都好期待佢着啲咩西裝出場㗎 ~

以為 16 集係大結局   但原來仲有㗎   不過聽晚先睇呢   因為 11 點半要瞓喇 ~