翡翠冰室 @ 牛頭角 ( 2-OCT-2021 )

干炒豬扒烏冬 ($44)

星洲炒米 ($44)

( 2-OCT-2021  SAT )

今朝鬧鐘響   里奧大人以為夠鐘起身   我話我去徑步咋   咁佢話佢都徑步   不過我出去先啦   之後佢打嚟話唔徑步喇   因為刷完牙就沖埋涼   習慣咗   咁無所謂啦   我都無諗住佢徑步 ~

早餐食腸仔包   諗咗好耐㗎喇   因為我無咩包係特別鍾意食   但我就最憎食提子麥包   我同家姐都好憎食啲提子   我以前直頭拻哂唔食架   最慘係連埋啲包都拻埋   真係食落肚唔多呢   哈哈 ~

菇場忙咗陣   今日得 1/3 同事番咋   小A之前話寧願請假連放 3 日   好過放 1 日番半日放 1 日咁呀 ~

幾快又到 10 月

同阿花 Whatsapp   佢都話今日番工無聊到一個點   哈哈   但佢又講得無錯 ~

一到 1 點就全人類起身走人   咁里奧大人未放工   我就去買絲巾比皇太后   咁聽日可以比佢 ~

買埋三文魚就去 MOS Burger 買午餐   番到屋企即沖涼   之後里奧大人都番到嚟 lu ~

特級和牛漢堡 ($31) & 大厚切薯條+凍咖啡 (+$26) & 摩斯雞塊 ($19)

咁樣睇好似好乾咁   但其實唔係呢    

我問里奧大人個包好唔好食 ?!  佢話好食   再問幾錢 ?!   我話三十幾蚊   佢話抵過麥當勞啦   薯條又好食   我話薯條另外加 $23 㗎   之後佢話都抵吖   有埋雞塊   我話雞塊係另外買㗎   要 $19 呢   再話凍咖啡就要加多 $3   之後佢碌大對眼望住我   話我可唔可以講嘢唔好逐啲逐啲講呢吓 ?!   哈哈哈哈 ~

我都奇怪   做咩佢成日話抵過麥當勞   因為佢以為一個包+薯條+雞塊+凍咖啡係三十幾   最搞笑係又唔係佢比錢   幾多錢關佢咩事喎   哈哈 ~

食完就抖下   上次我晏晝大清潔屋企同廁所   夜晚番學有啲攰   所以今日點都唔做家務呀 ~

里奧大人食完抖陣都瞓晏覺   不過我 4 點都瞓咗半個鐘   當堂精神哂呢   今晚肯定有精神番學   哈哈 ~

6 點唔夠就出去食飯   估唔到居然趕得切下午茶   咁就好喇   因為我唔想食咁飽 ~

食完都差唔多時間番學   最搞笑家姐問里奧大人係咪等埋我放學   我話細路仔咩   哈哈 ~

今晚遲咗 7 分鐘放學   好少會咁情況   所以好開心會遇到個好老師 ~

唔知係咪坐得耐無郁   我出學校嘅時候   條腰越來越痛   我真係企喺喺度半分鐘先慢慢行呀   嗚嗚 ~

番到屋企沖完涼   要里奧大人幫我即刻按條腰   之後真係舒服好多呢 ~

又一齊睇陣劇   差唔多 12 點左右瞓 ~