橋鍋居 @ 紅磡 ( 21-OCT-2021 )

豚肉雜菜湯鍋定食 ($45) - 唔記得加辣添

雞扒夜貓大碗飯 (木魚絮 + 紫菜絲 + 牛油拌) ($45) - 一樣咁好味

( 21-OCT-2021  THU )

雖然尋晚半夜去廁所   但感恩今朝起身都精神 ~

呢兩日有番心情做運動   實在懶咗成 10 日   真係好似唔想徑步咁㗎 ~

早餐食腿蛋包   溫總問我覺唔覺檸茶無檸檬味 ?!   我話係啦   平時無加糖   但都有啲酸味嘛   佢話呢個星期都咁   我仲話以為自己越飲越濃味添   哈哈 ~

菇場勁忙   眨下眼又 Lunch Time 了 ~

出咗去先知落微微細雨   所以行個大圈都買 Lunch 番菇場喇 ~

唔想食丸同牛   咁食魚皮餃米啦   但啲皮好腥同好油   下次真係唔再食 lu

仍然忙   但放工要即走   因為約咗里奧大人食晚飯 ~

夜晚凍咗好多呀   要着里奧大人放喺公司嘅風褸   咁先無咁凍 ~

今晚去橋鍋居食晚飯   因為幾次都係想食又無位   有次想外賣直頭話做唔切   咁今次有位就入去食喇   原來年幾無幫襯呢 ~

食完都要番里奧大人公司   差唔多 7 點幾先走得 ~

呢兩日里奧大人放假   話想喺屋企食 Flakes   咁同佢一齊去買啦   我話 Special K 由 $2x 食到依家 $4x   真係人工都無加得咁快呀   所以叫佢食 Nissin 呢個牌子   反正我都食開   佢唔食可以比埋我   哈哈 ~

睇文森佐成日話飲 "馬格利酒"   所以又支桃味同原味試下先 $16.9 有 77 折都抵

番到屋企即開機洗衫   今晚唔駛開冷氣都覺得凍呀 ~

8 點幾開始睇文森佐   不過我睇到 10 點 45 分都瞓 lu ~