焗三文魚骨腩 + 韓式上海小籠包 + 中華沙律 & 蒜味螺肉 & 辣八爪魚 (外賣) + 蕃茄三文魚湯 ( 3-OCT-2021 )

( 3-OCT-2021  SUN )

今朝 8 點 15 分起身   沖埋涼就出發食早餐 ~

去里奧大人公司幫手   再比條絲巾比皇太后   佢好開心呀   其實我一路都想買嘢比佢   但一定要傾偈先知佢鍾意啲咩   上次知道佢怕凍   所以我就送絲巾比佢   細細條好方便呢 ~

我傾多陣偈就要去番學   完畢就要番自己教會事奉   勁趕呀 ~

番到教會   其實都差唔多開始崇拜   感恩我崗位要做嘅嘢好快搞掂   始終今日遲咗   好多嘢驚做唔切呀 ~

差唔多 1 點半就走人   所以買埋午餐就即刻番屋企 ~

好想食壽司   如果同里奧大人一齊行   佢一定唔比我買   我自己一個人就買咩都得   呵呵

食完抖陣就去超市買嘢   但完全唔記得買蕃茄   好在番屋企前記得咋   唔係又要行多轉 ~

原來都已經 3 點半   咁我煲埋湯先喇   搞掂哂再大清潔廁所   沖埋涼就休息 ~

5 點半預備   因為想慢慢比心機整   哈哈 ~

是日晚餐 - 焗三文魚骨腩 + 韓式上海小籠包 + 中華沙律 & 蒜味螺肉 & 辣八爪魚 (外賣) + 蕃茄三文魚湯 

焗三文魚骨腩 - 喺菇場附近買咗 2 份魚骨腩   用味噌醃 3 個鐘   因為我驚太鹹呀   今次焗到個皮脆卜卜   勁正 ~

韓式上海小籠包 - 里奧大人唔係咁鍾意食三文魚   所以蒸小籠包比佢食喇 ~

中華沙律 & 蒜味螺肉 & 辣八爪魚 (外賣) - 樣樣都好想食   但加埋實在太多   食完呢餐有啲驚 ~

蕃茄三文魚湯 - 5 個中蕃茄 + 半個南瓜 + 1 個薯仔 + 幾件三文魚骨肉   個湯甜到不得了呀 ~

洗埋碗就同里奧大人一齊去徑步   其實我攰   但今晚好飽   必須要去做運動 ~

番到屋企即開機洗衫   沖完涼抖下   之後睇劇睇到 11 點都瞓覺喇 ~