炸雞 + 薄餅 + 肉醬意粉 ( 30-NOV-2021 )

( 30-NOV-2021  TUE )

感恩一覺瞓天光呀   起身都精神   今朝又開始徑步喇 ~

尋晚同里奧大人講   唔知本身攰定無做運動攰   所以今朝要徑步   希望無咁攰呢 ~

今朝諗住慢慢行   但估唔到係行得快咗   接近 4,000 步唔錯啦   對一個懶人嚟講   哈哈 ~

早餐食粟米吞拿魚包   好耐無食喇 ~

今日開始菇場要打仗呀   全公司總動出馬 ~

做呀做   之後再番埋位 Check 嘢   原來已經 11 點半 ~

Lunch Time 出去行陣   再買紅腸酸辣米線   因為一陣要勁體力勞動 ~

個個都忙到死   阿怪叫阿輸同船頭講   叫船頭 Email 資料比佢   之後佢再 Print   呢個阿怪死都唔搵 Hard Copy   但船頭已經做緊另一間公司嘅嘢   無可能再用電腦 Forward 資料比佢囉   咁船頭話如果妳想用佢電腦 Forward 都得㗎   妳放工開 OT 用啦   開工時間就幫唔到妳   之後阿怪無聲出就番埋位   勁樣衰 ~

忙到 5 點   又要番埋位整嘢 ~

放工即走   番到屋企換對波鞋就去徑步喇 ~

抖陣就預備晚餐   里奧大人 7 點幾先番到屋企   所以可以即刻開餐 ~

食完洗埋碗就沖涼   之後休息 lu ~

今晚睇 Youtube 睇到 10 點半瞓覺   勁早瞓呀   哈哈 ~

CHUBBY'S PIZZA (外賣) ( 29-NOV-2021 )

環球世界薄批 (普通批) 

肉醬意粉

炸雞 4 件

( 29-NOV-2021  MON )

雖然尋晚去咗一次廁所   但感恩瞓得都 OK   起碼起身都精神 ~

早餐食奶醬多  好味好味 ~

菇場唔忙   咁就好喇 ~

Lunch Time 要出去買兩條頸巾比皇太后   佢話佢個女好鍾意呀   咁買嚟送比佢哋啦 ~

菇場實在太凍   我本身想食炒麵   但最後食墨魚丸河   因為都係想食熱嘢 ~

仍然唔忙   準時放工 ~

今晚好想食 Pizza 呀   雖然醃咗肉   但都唔煮喇 ~

食完抖到 7 點半就去徑步   里奧大人話飲完啤酒唔去呀 ~

沖埋涼都休息   食完生果就睇 Youtube ~

10 點半收到公司群組訊息   聽日所有人都應該超級忙 lu ~

今晚 10 點 45 分準時瞓覺   晚晚係咁都唔錯 ~

臘腸炒菜心苗 + 涼拌凍日本豆腐 ( 28-NOV-2021 )

( 28-NOV-2021  SUN )

今朝 8 點半都起身   其實攰攰哋但又瞓唔到   咁徑步啦   都好耐無朝早徑步 lu ~

去完超市買香蕉就買麵包   之後番屋企喇 ~

食完早餐就拖地   大清潔廁所就沖涼   抖陣就出發   今日特登早啲去里奧大人公司   可以同人傾下偈   哈哈 ~ 

阿妹見到我   就比個信封比我   入面應該係一大疊錢   仲話比我慢慢洗   之後里奧大人見到   話係帛金封嚟㗎   真係笑死我呀   佢肯定以為係我新年兌換比佢哋嘅廿蚊紙啦   頂爺都碌大對眼望住阿妹呀   哈哈 ~

崇拜完畢就等里奧大人放工   同阿妹 & B San & 鴛鴦媽 & 皇太后一齊傾偈   真係戴咗口罩講嘢都大聲   同埋笑又大聲呢   所以里奧大人成日話我哋好嘈   哈哈 ~

同里奧大人食完 Lunch 先番屋企   我唔想太晏食   唔係夜晚又食唔落 ~

今次終於記得少米

我要去超市買盒裝紙巾同菜   順便行下嘛   頭先食到好飽   所以叫里奧大人番屋企先 ~

番到屋企就沖涼   今日都好熱咁 ~

里奧大人瞓晏覺   我睇睇下 Youtube  都瞓着咗   瞓咗半個鐘有多 ~

6 點左右就預備晚餐   今晚又係非常簡單   星期日多數簡單煮 ~

是日懶餐 - 臘腸炒菜心苗 + 涼拌凍日本豆腐

臘腸炒菜心苗 - 蒸完臘腸   灼完菜   再將佢地撈埋一堆就搞掂   係咪懶到出汁呢   哈哈 ~

涼拌凍日本豆腐 - 12 月到期   要快啲食   因為仲有 1 盒未開呢 ~

洗埋碗就開機洗衫   之後都沖涼   因為我唔係咁舒服呀   唔知係咪頭先無蓋被瞓覺   有啲作感 Feel   所以里奧大人即沖杯 Hot Lemon 比我飲   更加唔會比我去徑步啦 ~

今晚 10 點半都自己瞓先喇   千奇唔好病呀 ~   

黑毛豬午餐肉拉麵 + 白菜仔 + 土伏苓牛大力素湯 ( 27-NOV-2021 )

午餐食剩嘅紅油木耳   撈米粉食勁正呀

( 27-NOV-2021  SAT )

尋晚瞓到半夜熱醒   條頸係出汗添呀   不過之後好快瞓得番   感恩感恩 ~

又唔係話特別餓   所以早餐都係食奶醬多 ~

菇場唔忙啦   咁可以專心投票 ~

今日我要番工   但里奧大人同家姐   連埋 8 卦都話以為我今日係 Off   家姐仲搞笑   11 點幾 Whatsapp 問我食早餐未 ?!   之後我話唔 Send 個核突公仔比妳都唔得呀   哈哈 ~   

放工去買 Lunch   之後就去買煲湯料   買完都即番屋企喇 ~

食完就煲湯   搞掂哂就做功課 ~

6 點幾都預備晚餐   今晚勁簡單   所以 7 點都食得喇 ~

是日懶餐 - 黑毛豬午餐肉拉麵 + 白菜仔 + 土伏苓牛大力素湯

黑毛豬午餐肉拉麵 - 食剩半盒午餐肉   聽晚再食   以前真係會夾硬食哂   唔知點解   但依家唔會啦 ~

白菜仔 - 好耐無食   又買半斤食下啦 ~

土伏苓牛大力素湯 - 呢排個人瞓極都好攰咁   又難得今日里奧大人放假   所以煲個祛濕湯呢 ~

洗埋碗抖陣就同里奧大人去徑步   開機洗初就沖涼   之後休息喇 ~

諗住好夜瞓   估唔到今晚 11 點都眼瞓   都幾好吖   哈哈 ~

Oreryushio @ 大埔 ( 26-NOV-2021 )

咖哩唐揚炸雞飯 ($49) - 最後都係食炸雞   哈哈哈哈

牛肉照燒雞丼 ($39) - 都幾好味

( 26-NOV-2021  FRI )

今朝 9 點半都同里奧大人一齊自然醒   咁梳洗之後都食早餐喇 ~

本身諗住去城門水塘再行落大埔   之後探爺爺嫲嫲   但條路係新行   里奧大人話驚唔識   咁我話不如入咗大埔先再行其他地方啦   唔駛咁大壓力   同埋始終行完仲有行程   真係唔想嘥時間搵路行   寧願搵日再行好過   所以今日都係以探訪為主   哈哈 ~

抖到 11 點幾都出門口喇   去咗 MUJI 買頸巾比爺爺嫲嫲   質地舒服價錢又唔貴   我覺得好過比利是啊 ~

入到大埔都 12 點幾 lu   兒甥女話買點心去姑奶屋企一齊食   咁樣可以一路食一路傾 ~

兒甥女個女都已經 4 個幾月喇   上次 100 日無去   今日點都想探佢哋呢 ~

姑奶話我瘦咗   可能之前佢喺群組睇到我張相   依家比較就顯得瘦咗咁囉   因為我真係年幾無見佢真人啦 ~

佢依家又係急步行   同埋佢都好似我咁   唔會話因為減肥唔食呢樣嗰樣   咁做人都唔開心啦   明明係鍾意食嘛   但就肯定唔會好似以前咁暴食   我依家都會食雪糕同薯片   里奧大人都唔會話我架   因為佢知我會做運動   同埋唔係日日食呢   有時睇劇先食咁囉 ~

差唔多 2 點就同兒甥女一齊走   咁我同里奧大人就去爺爺嫲嫲屋企喇 ~

爺爺嫲嫲好好㗎   好耐之前知我有甲狀腺問題   特登帶我上深圳軍醫   我連續睇咗 9 個月   真係好番哂呀   所以好感激佢哋呢 ~

咁爺爺識按減肥嘅穴位   果時一見佢就會比佢按㗎   佢知道我鍾意個按摩穴位貼   特登買盒仲叫姑奶記得比我添呀 ~

同埋最鍾意佢地思想好正面   無咩特別緊要都唔會煩仔女   知道仔女番工緊要 ~

佢哋屋企仲好乾淨   佢 8x 歲喇   佢話有時番到屋企好攰   如果屋企亂會好火滾   所以點都要用啲時間打理屋企   呢樣我都認同   因為我有時屋企好亂   都會火滾㗎   不過我就衰在忍唔到手買嘢囉   唉 ~

傾到 3 點幾   原來都傾咗一個鐘   頭先我問嫲嫲會唔會瞓晏覺 ?!   佢話都會   咁所以我話走呢 ~

爺爺身體唔係咁好   但感恩今日見到佢好精神   我次次見到佢   我都好開心   因為佢真係好好笑容   個樣又慈祥   我姑姐姑丈同公公個樣又係好慈祥   係好多人見到佢哋都咁同我講㗎   我老來都好想啲人話我個樣好慈祥   哈哈哈哈 ~

今日都好熱喎   真係好在無行山咋 ~

我同里奧大人講話想飲珍珠奶茶   之後佢行得特別快   係咁幫我搵   終於見到賞茶   佢地嘅珍珠奶茶都好飲   同埋珍珠夠煙韌   上次家姐話細 K 都話賞茶好飲   不過嗰次食得太飽   所以無同家姐飲囉 ~

好少見到麻雀仔行得咁近   佢仲肥嘟嘟好得意㗎

里奧大人知我鍾意食炸雞   成日話早啲出去食啦   不過我話想行下喎   睇嚟真係要搵晚去食   唔係佢成日會記住   哈哈 ~

食完就搭車番屋企啦   我同里奧大人講話今晚真係唔想食炸雞   因為想同你食啲特別嘢   佢笑住話呢餐有幾特別呀 ?!?!?!   哈哈哈哈   笑死我呀 ~

坐咗一個鐘頭車咁滯   依家真係唔慣坐咁耐車呀 ~

番到屋企即開機洗衫   之後沖埋涼就食生果 ~

今晚 11 點幾都自己瞓先   話哂聽日要番工   哈哈 ~ 

泡菜豆腐湯 + 辣肉腸薄餅 + 薯仔皮泡菜小籠包 ( 25-NOV-2021 )

( 25-NOV-2021  THU )

今朝醒醒地   感覺似係 6 點鬆啲咁   不過唔敢望個鐘   因為我知道幾點就會倒數時間   明明瞓到都變瞓唔到   同埋唔徑步就繼續瞓咁囉 ~

早餐仍然食奶醬多   依家會早啲叫外賣   咁等啲麵包索哂啲奶醬   林林地好味㗎   真係越來越似啲阿婆食嘢   哈哈哈哈 ~

依家多數飲剩 1/3 咖啡   因為飲哂 1 杯會勁唔舒服   我以前係飲剩半杯添㗎   阿姐以為我未飲完   不過佢哋話無半杯   咁無計啦

忙下停下   一到 Lunch Time 就出去 ~

又去一田買 2 包薯片 + 2 Pack 辣肉腸 + 2 Pack 潮州白魚蛋 + 4 條泰國扎肉   今日直頭無人排隊   頭先同船頭講話依家啲嘢已經貴過之前   薯片之前好似特價 $35 兩包   依家 $38.9 兩包   不過我就話點都平過平時單買一包嘅   咁樣計咪自己開心啲囉   哈哈 ~

買完再去買燒賣腸粉番菇場   都已經 12 點半 lu ~

放工即走   其實邊一日唔係吖   哈哈哈哈 ~

是日懶餐 - 泡菜豆腐湯 + 辣肉腸薄餅 + 薯仔皮泡菜小籠包

泡菜豆腐湯 - 一開雪柜拎嘢   唔小心整跌盒韓國豆腐   點知個盒爆咗   咁無理由掉咗嚿豆腐嘛   好在之前買咗樽泡菜   拿拿聲整個泡菜豆腐湯   里奧大人笑住話今晚係咪食韓餐   哈哈 ~

辣肉腸薄餅 - 終於食埋喇   我依家又要清冰格食物 ~

薯仔皮泡菜小籠包 - 最後呢 6 個   食完要停一停呢 ~

洗埋碗就抖陣   之後煮湯丸啦   但煮咗成 20 分鐘   都係一面熟到爆另一半就係生勾勾   所以真係只能夠食熟咗嘅部份   真係以後唔鬼買佢喇   嗚嗚 ~

爆哂啲芝麻餡出嚟   成碗湯水變咗污水   哈哈哈哈

睇陣 Youtube 又努力投票   好開心車銀優贏咗 THEKKING 嘅 K-POP 偶像個人提名第一位   抖一日又要再努力投票   我同阿花講話嚟緊一個月唔得閒比最新資料比佢   要靠佢比我喇   哈哈 ~

今晚差唔多 12 點先瞓   好在聽日放假呢 ~

煎三文魚扒 + 蠔油冬菇菠菜 + 麻醬青瓜 + 自家制麵包 ( 24-NOV-2021 )

( 24-NOV-2021  WED )

今朝算係一覺瞓天光   感恩呀 ~

早餐食奶醬多   但要飲咖啡   因為之前飲咗幾日檸茶胃痛呀   我可能會隔住飲   不過都希望飲檸茶多啲   精精神神真係唔想飲咖啡囉 ~

菇場唔係咁忙   所以有時間做 Email Filing ~

做做下嘢   阿花話好少見我著褲   我話天氣凍咪著囉   因為平時我真係多數著裙   番工方便嘛   一穿就搞掂   哈哈 ~

Lunch Time 一到就即去一田   今次只買 8 條扎肉 + 4 包薯片 + 2 包脆豬肉條   所以好快搞掂 ~

唔係咁餓   所以番到菇場先食杯麵 ~

里奧大人話好多同事都讚個飯盒好靚同好豐富   但見唔到飯   哈哈哈哈

忙下停下又放工   番到屋企都要即刻預備晚餐 lu ~

里奧大人 6 點幾都番到   等埋我煮個辛辣麵就可以開餐呢 ~

是日晚餐 - 煎三文魚扒 + 蠔油冬菇菠菜 + 麻醬青瓜 + 自家制麵包

煎三文魚扒 - 今次想啲皮卜卜脆   所以就開鑊煎喇 ~

蠔油冬菇菠菜 - 次次都會留定啲蠔油冬菇   當汁料都好正架 ~

麻醬青瓜 - 終於清埋支麻醬   次次買麻醬就肯定打孖上嘅   因為咁先有特價   不過真係次次都係無開或者擺到過期   今次係人生第一次食哂支麻醬   所以好開心   哈哈 ~

自家制麵包 - 頂爺依家用新方法焗麵包   所以依家啲包係好煙韌   勁正呀 ~

洗埋碗就自己去徑步   里奧大人話呢排對腳成日抽筋   所以唔去喇   喺屋企熨衫呢 ~

沖完涼就睇 Bilibili   睇到 11 點唔夠都自己瞓先喇 ~

宮保雞丁 + 蠔油燜冬菇豆卜 + 菜心 ( 23-NOV-2021 )

( 23-NOV-2021  TUE )

今朝鬧鐘響都唔知   里奧大人以為佢鬧鐘響添   我話今朝唔徑步喇   里奧大人話有時候都要抖下   依家我唔徑步   反而會贊成   真係勁搞笑 ~

我同里奧大人講話條腰又同   佢話幫我練下   我話唔駛啦   之後佢話練完成日唔痛啦   呢句就吸引喇   所以叫佢幫我練 1 分鐘先 ~

原來落毛毛雨   所以更加覺得凍   即刻諗番今朝無徑步   當堂覺得係因為落雨先唔徑步   哈哈 ~

早餐食芝腿治烘底   其實想食奶醬多   但又覺得要食番啲鹹嘢 ~

菇場忙呀   咁都好   因為唔駛咁凍 ~

Lunch Time 出去行陣   真係越行越凍   所以真係行 15 分鐘要買 Lunch 番菇場喇 ~

阿爽介紹我食嘅腸粉   佢係早餐   我係午餐   加埋雞骨雞夠哂飽

加多啲豉油就吸引好多   哈哈

忙忙哋咁啦    就嚟 2022 年要預備啲嘢   咁到時就可以即刻有得用啦 ~

同 8 卦傾偈   講開凍嘅麵食   之後佢話佢絕對唔接受到飲凍嘅湯   我話我姑奶最鍾意   上次碗湯真係擺咗超過一個鐘   飲嘅時候係凍   唔係微暖   真係唔屙都偷笑   仲有就係湯丸   唔明點解可以將成煲湯丸拎出嚟   成碗糖水係凍   真係好似食菌咁   哈哈 ~

放工即走   今晚煮晚餐要需時   哈哈 ~

是日晚餐 - 宮保雞丁 + 蠔油燜冬菇豆卜 + 菜心

宮保雞丁 - 用現成醬汁   再加 1 個日本洋蔥 + 7 隻紅椒 + 4 件雞柳 + 十幾粒黃飛鴻麻辣花生   我鍾意多啲配菜   同埋里奧大人帶飯   所以特登整多呢個餸喇 ~

蠔油燜冬菇豆卜 - 尋晚燜定   今晚肯定入哂味   以前里奧大人唔多鍾意食冬菇   依家都開始鍾意食   仲話好味呀   其實呢個餸真係超級勁方便   最正係第晚就咁翻熱就可以呢 ~

菜心 - 加啲冬菇汁   咁好過蘸蠔油   嘻嘻 ~  

洗埋碗再抖陣就同里奧大人一齊去徑步   真係好鬼凍呀   所以一粒汗都無出 ~

開埋機洗衫就沖涼   之後叫里奧大人拻橙比我食   我次次拻橙   甲床會爆開好鬼痛   但我唔鍾意食切嘅橙   所以一定要里奧大人幫手呢 ~

今晚 11 點唔夠都瞓覺   不過呢排朝早都唔徑步喇   里奧大人成日話依家天氣轉   寧願我瞓多啲好過咁早徑步   咁夜晚徑步都好足夠喎   等天氣穩定再朝早徑步好過啦 ~

焗鯖魚拚豆卜 + 焗煙鴨胸 + 紅油拍青瓜 + 銀絲王 ( 22-NOV-2021 )

( 22-NOV-2021  MON )

感恩條腰無痛   所以尋晚瞓得唔錯呢 ~

天氣涼咗好多呀   其實一沖涼就知   今朝全程用熱水呀   哈哈 ~

早餐食奶醬多   不過無咩胃口咁 ~

菇場忙呀   做完一部份都已經 11 點 45 分 ~

一出門口覺得超級超級勁凍   可能又落埋毛毛雨   不過我都想行遠啲買菜呢 ~

其實越行越凍   買完菜都去買雞中翼重慶酸辣紅薯粉   我要食熱嘢呀 ~

菇場仍然忙   但有啲頭痛   唔知係咪頭先攝一攝 ~

放工即走   BG 見我着短袖都問我凍唔凍 ?!   我話一陣跑去巴士站   咁等個人無咁凍   哈哈 ~

里奧大人今日都番工   不過同我差唔多時間番到屋企   比佢見到我無着外套添 ~

是日晚餐 - 焗鯖魚拚豆卜 + 焗煙鴨胸 + 紅油拍青瓜 + 銀絲王

焗鯖魚拚豆卜 - 真係好鍾意食焗豆卜   以前真係最憎食豆卜豆腐   依家可能年紀大轉口味   哈哈哈哈 ~

焗煙鴨胸 - 里奧大人帶飯   所以特登焗煙鴨胸比佢做餸 ~

紅油拍青瓜 - 尋日買㗎   真係好後悔   因為天氣咁凍唔想食凍嘢   哈哈 ~

銀絲王 - $9 有 4 小棵   不過好似無旺菜咁甜呢 ~

食飯嘅時候   里奧大人話今朝炸魚柳好味   我話咁厚肉都好正呀   之後佢個樣好驚咁話唔知啲魚肉熟未 ?!?!?!   到我好驚咁話依家先講 ?!?!   咁都已經食哂啦   真係救命 ~

佢話啲魚係切得開   唔係痴住哂   我話全部白色就可以啦   唉   真係好鬼驚佢   第時我老咗要佢照顧   我可能日日食魚生   哈哈哈哈 ~

洗埋碗就燜餸   之後又小清潔廚房   今晚唔徑步呀   個頭仍然有啲痛 ~

條腰又開始有啲痛   所以開埋機洗衫都快快沖涼休息喇 ~

今晚 11 點唔夠都瞓覺先喇   好鬼凍   想快啲入被竇 ~