金菇豚肉卷 ( 17-NOV-2021 )

尋晚居然唔記得飲湯   咁今晚飲埋去啦   又可以煮少份蔬菜   哈哈

( 17-NOV-2021  WED )

發緊夢鬧鐘響   我覺得好似喺夢境走番出嚟咁   哈哈 ~

今朝徑步都有啲熱   咁我番到屋企   里奧大人話尋晚都熱醒咗   不過最緊要唔駛開冷氣   哈哈 ~

啱啱比早餐錢   阿哥好奇怪咁望住我   因為咁啱打電話外賣係奶醬同咖啡少奶   佢以為係我呀   話點解一路講一路比錢   哈哈 ~

菇場勁忙呀   今日每月一到已經遠離我   所以個人無咁攰喇   感恩感恩 ~

Lunch Time 周圍行下   再去一田買日本旺菜同日本洋蔥   其實價錢同街市差唔多   依家街市所有嘢係全部貴哂呀   真係人工又唔見加得咁快喎 ~

買完就番菇場食 Flakes + 乳酪   最搞笑阿爽以為我齋飲乳酪   我話咁樣唔夠飽喎 ~

里奧大人話同事見到佢飯盒話好靚同好香   之後話份量咁多   你太太係咪細細個已經煮大茶飯 ?!   真係笑死   我做女只識煲水同煮公仔麵咋   煮飯都唔識   真係結婚之後先學煮嘢咋 ~

唉   唔知做咩突然好頭暈   勁辛苦   睇嚟要補補血喇 ~   

但又忙到痴咗線   真係做到痴痴呆呆   好在有啲唔趕   咁留番聽日做 lu ~

放工即走   番到屋企都即刻預備晚餐喇 ~

里奧大人 6 點幾番到屋企   咁我煮煮下豚肉   突然覺得好似無按電飯煲制   點知真係無按呀   激鬼死我   又要等多 10 分鐘   明明時間啱啱好家嘛 ~

是日晚餐 - 金菇豚肉卷

金菇豚肉卷 - 喺 759 買嘅無激素豚肉   估唔到份量都幾多   仲剩幾片可以留番聽晚 ~

食完飯洗埋碗就食蕃薯糖水   係尋晚食剩㗎   哈哈 ~

其實我都幾鍾意食蕃薯糖水   但晚餐就一定唔可以飽   否則食唔落呢

抖多陣就去徑步   不過我今晚要去超市買嘢   只徑 20 分鐘算喇   估唔到同里奧大人一齊番到屋企   佢話我其實行超市仲耐過徑步半個鐘   哈哈 ~ 

沖埋涼就睇 Youtube   今晚 10 點半都瞓覺喇 ~