豆角臘腸粒粒 + 牛角燒汁雞翼 + 栗子蕃薯糖水 ( 16-NOV-2021 )

( 16-NOV-2021  TUE )

尋晚去咗 2 次廁所   感恩起身都精神   但呢個幾月嘅睡眠質素真係麻麻哋 ~

今朝熱咗喎   真係邪   尋日先同家姐講話又話呢幾日暖   但都仲係凍   點知今朝即刻熱 ~

早餐食吞拿魚包   好耐無食喇   突然間想食   但可惜杯熱檸檬唔熱囉 ~

阿花又送嘢比我   佢之前買咗 Toner   我話佢買嘢都好喎   成日有嘢益我   哈哈

菇場忙呀   勁開心   因為真係一望鐘就已經 Lunch Time ~

又行 20 分鐘先買鯪魚球米番菇場   其實好想食其他   但菇場冷氣超勁凍   好想食湯類嘅嘢 ~

仍然忙到震   真係好想快啲放工   哈哈 ~

番到屋企都預備喇   切粒要用好多時間呢 ~

里奧大人今晚 7 點幾先番到屋企   好在我都早啲預備   咁可以洗埋啲嘢   慳番唔少時間 ~

是日晚餐 - 豆角臘腸粒粒 + 牛角燒汁雞翼 + 栗子蕃薯糖水

豆角臘腸粒粒 - 里奧大人見到碟餸   居然問我辛唔辛苦 ?!   佢話見到切到一粒粒肯定辛苦   下次切片就得啦 ~

牛角燒汁雞翼 - 整多個餸   咁里奧大人帶飯都無咁悶啦 ~

栗子蕃薯糖水 - 4 嚿蕃薯都好似擺咗 2 星期有多   所以點都要食啦   栗子蕃薯都好甜同埋好粉粉糯糯   我都幾鍾意食 ~

里奧大人話今日無帶飯   佢幾個同事都問佢做咩唔帶飯 ?!   阿 mi 朝早又咁講   最搞笑有個同事話帶飯係慳好多   呢句係真喎   出去食點平都要 $35   佢哋又無腸粉燒賣呢啲   最平都係食粉麵   但食得多都悶啦   好似我咁   哈哈 ~

洗埋碗都唔抖就去徑步   里奧大人話唔去喇   我話無問題啦 ~

開機洗衫再沖埋涼   之後就睇 Youtube   呢排都係唔睇劇住   想抖下 ~

過咗期兩日喇   家姐又係唔記得食   所以同我一樣要拿拿聲快啲食哂呀   哈哈

今晚有啲攰   所以 10 點 45 分瞓覺 lu ~