蝦餅拚司華力腸 + 泰式肉碎 + 麻醬拍青瓜拚粟米粒 ( 31-JUL-2022 )

( 31-JUL-2022  SUN )

今朝 9 點唔夠都醒咗   所以都整早餐食 lu ~

食完抖陣就大清潔屋企再拖地   大清潔廁所之後就即沖涼 ~

每做一次大清潔真係爆汗   磅數係少過一起身磅嘅數字㗎   所以我當係做運動呢 ~

抖多陣都出發番教會   今日同阿妹傾偈   又傾咗個幾鐘   佢同我諗嘢方向都差唔多   所以有時講嘢唔駛解釋咁多   佢好快明我感受   咁樣都唔錯   哈哈 ~

里奧大人差唔多 2 點放工   咁我話我去買午餐   順便去超市買嘢 ~

里奧大人同事請我食流心月餅

食完抖陣就沖涼休息   里奧大人瞓陣晏覺   我就睇 Youtube 啦 ~

差唔多 6 點幾先煮晚餐   因為我唔係咁餓   唔想咁早食   哈哈 ~

是日懶餐 - 蝦餅拚司華力腸 + 泰式肉碎 +麻醬拍青瓜拚粟米粒

蝦餅拚司華力腸 - 蝦餅又係尋日食剩   我加多條司華力腸   反正開焗爐嘛   嘻嘻 ~

泰式肉碎 - 尋日中午食剩   今晚食埋去啦   最正係剩咗好多飯   就咁蒸熱就搞掂 ~

麻醬拍青瓜拚粟米粒 - 食剩大半碟   又要番番聽晚食 lu ~

洗埋碗就沖涼   之後休息休息 ~

今日洗咗好多汗   個人比較攰   所以 11 點都瞓 lu ~

和風牛肉飯 + 照燒雞扒飯 (外賣) ( 30-JUL-2022 )

和風牛肉飯 - 個汁就好味   但牛肉就煮到好老   其實呢個便當都唔錯㗎   有溏心蛋 + 水果 + 炸物 + 汽水

照燒雞扒飯 - 里奧大人鍾意食   咁就好喇   下次再買   哈哈

( 30-JUL-2022  SAT )

今朝本來 8 點起身   但瞓到 7 點 50 分都醒咗   所以都起身番工 lu ~

早餐食腿蛋治   想食飽啲 ~

菇場唔忙啦   9 點唔夠個天都黑哂   仲突然間行雷   真係嚇鬼死 ~

西瓜又出咗去   所以我哋勁 Free ~

放工買埋外賣就番屋企   好在無落雨咋   唔係就比較麻煩呢   不過袋外賣都幾重下   所以里奧大人喺車站等我 ~

其實我都好耐無買重嘢   但一拎重嘢   隻手就自然又痛又痺咁囉 ~

泰式肉碎飯食咗好少好少   所以留番聽晚再食

食完又抖下   之後都沖個涼   睇下 Youtube ~ 

我揀呢個 Cover 係因為鍾意隻恐龍   但里奧大人以為我鍾意佢食緊嘢   哈哈

咁我好鍾意 Again 首歌   里奧大人以為我老作   我話邊個唱都知啦   之後佢睇住 Youtube   我就背向電視講邊個唱   咁 Binnie 未唱完   我就話下句係車銀優唱   里奧大人真係 O 哂咀   話我真係知邊句係邊個唱   哈哈 ~

4 點又溫下書   差唔多 6 點就出發番學 ~

今晚 9 點唔夠就放學   所以即刻叫里奧大人落單叫外賣喇 ~

食完抖陣都沖涼   今晚無咁熱   可能朝早落咗場雨呢 ~

里奧大人 11 點都瞓覺   我就 11 點半瞓覺   算早咗喇 ~

麻辣手撕雞 (外賣) + 油麥菜 ( 29-JUL-2022 )

( 29-JUL-2022  FRI )

感恩一覺瞓天光   我其實覺得自己 7 點已經醒咗   但想懶床   咁等埋里奧大人鬧鐘響先起身 ~

早餐食吞拿魚治烘底   成日諗住想飲凍啡   但一落單都係會飲熱啡   始終朝早成日飲凍嘢唔好   同埋菇場冷氣都夠   又唔需要話飲凍飲降溫咁呢 ~

菇場冷氣勁咗呀   我要着外套   不過咁都好   之前真係有啲焗咁   個人成日好易攰囉 ~

Lunch Time 出去行一個大圈   但個天好似想落雨咁   所以買埋紅腸酸辣米線就即番菇場喇 ~

今日勁喇   居然唔駛開風扇仔食米線   我真係唔覺得熱喎 ~

仍然唔忙啦   所以想快啲放工   哈哈 ~

4 點幾診所打嚟話我子宮抹片同甲狀腺報告正常   感謝主   不過就有少少貧血   我嘅指數係 10.8   正常係 12-15   我又覺得唔係差好遠   但都係買啲鐵丸食下   咁起碼叫做保持住呢個指數嘛   我之前最低指數係 7 咋   個咀唇係完全無血色   之後我不斷飲北芪當參   真係有番啲氣   最緊要係唔燥嘛   我都叫阿花咁飲   佢都話飲咗一排   真係有番啲氣力咁呀 ~

放工即走   買埋手撕雞就番屋企喇 ~

今晚就咁煮個泰式米粉比里奧大人   我中午實在太飽   就咁食餸就可以了 ~

是日懶餐 - 麻辣手撕雞 (外賣) + 油麥菜

麻辣手撕雞 (外賣) - 買半隻就夠   今次要微辣   上次要小辣   里奧大人食唔到呀   幾乎要我食哂咁滯   雖然微辣真係無咁惹味   但總好過我唔想自己一個人食哂呢 ~

油麥菜 - 星期二買㗎   今晚食埋去呢 ~

洗埋碗就開機洗衫   之後同里奧大人一齊睇 "侏羅記世界: 統霸天下"   雖然我都鍾意睇 Chris Pratt   但套戲真係唔合邏輯   我知唔可以駁故   但都唔好咁離譜嘛   上次睇 F9 狂野時速又覺得好悶   成套戲劇情跳來跳去   搞到我都唔係咁想再睇戲   哈哈 ~

睇到 11 點 15 分都即刻瞓覺   其實頭先想唔睇   但又唔想睇一半咁囉 ~   

三色椒焗煙鴨胸 + 辣蘿蔔拚豆腐卜 + 自家豬腳薑 ( 28-JUL-2022 )

( 28-JUL-2022  THU )

感恩又一覺瞓天光呀   希望以後都係咁呢   哈哈 ~

早餐食芝腿治烘底   間唔中食係好味啲嘅 ~

菇場唔太忙   又做自己嘢啦 ~

Lunch Time 出去行陣   一落街就好想買嘢   但又真係無嘢買   不過行 15 分鐘左右都算喇   條街都好熱囉   買埋鯪魚球米就番菇場了 ~

唔太忙就傾偈到放工   所以一有嘢做就最開心   因為時間過得快好多呢 ~

放工即走   番到屋企都要煮晚餐喇 ~

是日懶餐 - 三色椒焗煙鴨胸 + 辣蘿蔔拚豆腐卜 + 自家豬腳薑

三色椒焗煙鴨胸 - 以前唔鍾意食煙鴨胸   但呢兩年都轉咗口味   覺得味道都唔錯   所以一有特價都會買 2 件做儲備呢   我加埋尋晚食剩嘅 2 件玉子燒   里奧大人見到就話咁得意嘅   係咪尋晚食剩嘅玉子燒呀 ?!?!   我話唔係食剩   係特登留番   哈哈哈哈 ~

辣蘿蔔拚豆腐卜 - 其實我仲係好飽咁   本來想留番聽晚食   但見開咗都想快啲食埋佢咁囉 ~

自家豬腳薑 - 之前喺鴻福堂買架   都過咗期 2 個星期   所以咁熱天時都要食啦   但好難食囉   無厘味道   以後唔會再買呢個牌子嘅豬腳薑 ~

洗埋碗就開機洗衫   之後沖涼喇 ~

睇下 Youtube 又 11 點   我都要瞓覺 lu ~

玉子燒 + 泡菜辣蘿蔔拚豆腐卜 + 麻醬拍青瓜 ( 27-JUL-2022 )

里奧大人中午食剩一半嘅咖哩豬扒飯   今晚繼續食   

尋日早餐食剩㗎   今晚要食埋去㗎喇

( 27-JUL-2022  WED )

感恩一覺瞓天光呀   係昏睡咁款   不過起身係精神嘅   哈哈 ~

早餐食醬占多   因為真係唔餓   如果食有餡包實在太飽   唔想晏晝又食唔落咁囉 ~

菇場忙呀   日日係咁就好啦 ~

Lunch Time 即出去啦   見阿後 11 點 44 分就出去   真係唔好咁過份啦   嗰 1 分鐘都唔等得 ?!   但最後佢咪要等埋我入 Lift   仲要係 11 點 46 分   即係早出無用   仲蝕埋 1 分鐘企喺度添 ~ 

行去買蔬菜   今日好想食濕嘢   所以買水餃米番菇場食 ~

仍然唔忙啦   同 8 卦傾 "盡情吃 用力愛" 劇情   之後又係乜都傾一餐   所以好快放工   哈哈 ~

放工即走   里奧大人早過我番到屋企   所以我番到屋企都即刻預備晚餐了 ~

是日懶餐 - 玉子燒 + 泡菜辣蘿蔔拚豆腐卜 + 麻醬拍青瓜

玉子燒 - 好在睇下冰格有咩儲備   原來呢塊玉子燒係 7 月 10 日到期   所以點都要食啦   最勁係里奧大人居然知道呢碟係叫玉子燒   我問佢點解知嘅 ?!   佢話成日聽我講   哈哈 ~

泡菜辣蘿蔔拚豆腐卜 - 過咗期 2 日   又係要快啲食埋去   不過只能夠食一半咋   因為我食得多會好脹胃   所以聽晚仲要食呢 ~

麻醬拍青瓜 - 唔想煮菜又嚟拍青瓜   我將青瓜切條再放入膠袋拍   唔係會彈到周圍係   到時真係抹耐過拍   哈哈 ~

洗埋碗就開機洗衫   之後沖涼休息喇 ~

頭先唔覺得熱   勁驚以為自己唔舒服呀   好在洗完碗就覺得熱咋   哈哈 ~

里奧大人食完飯就熨衫   因為 8 點半要開會   開到 9 點半就搞掂   算好快呢 ~

我仲諗住睇 Youtube   但里奧大人話睇 "盡情吃 用力愛" 大結局   呢套又係衰爛尾   唉 ~

今晚 11 點都一齊瞓覺   依家覺得呢個時間瞓覺最 OK   因為我有時太早瞓   半夜會起身㗎 ~

奇脆辣雞翼 + 炸雞 + 新奧爾良式薯條 + 趣辣薯蓉 (外賣) ( 26-JUL-2022 )

大力水手二人餐 ($110) - 炸雞 (2件) 

奇脆辣雞翼 4 件 + 新奧爾良式薯條 (中) 2 包 + 趣辣薯蓉 2 個及汽水 2 杯 - 橫睇掂睇都係得 5 件   咁應該比少隻雞翼我啦

 

辣雞都幾辣   同埋薯條都好味道   所以今日出開旺角   都想買嚟食呢 

( 26-JUL-2022  TUE )

今朝里奧大人 8 點半都起咗身   我就瞓多 15 分鐘先起身 ~

梳洗之後就等里奧大人買早餐   今餐要食飽啲   因為可能好晏先食 Lunch ~

我食唔哂腸仔蛋 + 牛油多士   好在可以留番

家姐 Whatsapp 早餐比我睇   我奇怪點解咁似屋企食嘅早餐   咁問佢係咪 WFH ?!   之後佢話係   我話係我記錯以為今日星期三呀   哈哈哈哈   因為尋日里奧大人番咗工   我以為今日係星期三囉 ~

抖陣就沖涼   10 點半左右出發去婦檢喇 ~

今次等咗 1 個鐘頭 10 分鐘先到我呀   感恩都有好消息   就係個瘤由 12cm 減到 8cm   但我仍然要 Keep 住食藥   不過呢個月嘅每月一到亂咗   穩陣起見要再覆診 ~

埋單係 $1,800 (婦檢 + 抽血)   里奧大人用 EPS 比錢   第 1 次唔得   原來佢要揀其中一個戶口   之後佢話真係唔係咁識用   我拍住里奧大人膊頭話唔駛驚唔識用   下次會再用呢   里奧大人好快答話唔駛   姑娘聽到都喺度笑   哈哈 ~

咁我哋又唔餓   里奧大人又話想買裇衫   所以我話行下街先 ~

我諗住行瓊華中心   但原來已經變咗為先施了 ~

臨走我見到有裇衫   啲質地都薄   Smart Casual 著就最好   始終依家真係好鬼熱   著兩件衫真係比較辛苦呢 ~

里奧大人都鍾意啲質地   但特價 $259/2 件   所以買咗 2 件同款唔同色   咁 1 件就擺喺公司著喇 ~

因為里奧大人就嚟生日   我話送衫比佢啦   但佢係都要自己比錢   之後我問佢想要咩 ?!   佢又係話要相機   我話無問題喎   但到我比錢嘅時候又話唔駛   咁我話對你好啲當禮物算喇   哈哈 ~

之後去 izzue 睇下   又做緊特價 2 件有9 折   我揀咗件 Tee ($199)   之後叫里奧大人買件外套 ($499)   但 Online 平啲只係 $162   所以我再揀條 One Piece ($299)   但職員話 3 件 8 折   我又叫里奧大人買件 Tee ($999)   點知又係 online 平啲只係 $225   咁我話睇下有無衫啱家姐   雖然有件紫色好睇   不過質料比較焗   所以放棄了   我話咁買 2 件算喇   真係明明諗住買 1 件   依家變咗 4 件   我覺得夠啦 ~

買完都已經 2 點半   里奧大人話有啲餓喇   咁去元氣壽司睇下   佢知我想去元氣   哈哈   不過我話如果太多人就買嘢番屋企 ~

感恩唔太多人   因為我真係好耐無堂食   見到多人真係有啲驚呢 ~

我問里奧大人   如果坐最後   會唔會比坐中間位置嘅人拎咗 ?!   之後我話下次同佢分開兩張枱坐   一有壽司經過就拎   睇下得唔得   哈哈

好耐無咁大合照了   哈哈哈哈

牛油果軟殼蟹卷 ($24) - 凍嘅   好似擺咗十年咁

炸蝦卷 ($24) - 又係凍嘅   今次對元氣壽司極度失望

長鰭吞拿魚 ($14) - 無味嘅

芥辣八爪魚 ($14) - 里奧大人居然話我鍾意食   佢話我星期六成日食   我無諗過佢會留意我食咩㗎   哈哈 

帆立貝 ($17) X 2 - 里奧大人話 OK

灸燒珍寶皇帝蟹柳 ($12) - 里奧大人同家姐一樣好鍾意食蟹柳

飛魚籽 ($12) - 呢件算新鮮   因為紫菜係好脆

仲有炸蝦天婦羅 ($12) X 4 - 係最新鮮熱辣呢   我同里奧大人講話擺一陣先拎   睇下架車會唔會走 ?!   真係好無聊呢   哈哈

 

食到一大半就開始多人咁   諗住 3 點幾無人嘛   所以我叫里奧大人快啲食   我想快啲走呀 ~

行去 Body Shop 買香水   本身 $309   但職員話 $340 可以做會員有 9 折   咁只差 $31   我求其搵最平嘅嘢嚟買啦   買咗支細嘅 Hand Cream ($59)   9折之後 $331.20   即係支 Hand Cream 只係 $22   咁又覺得好抵喎   哈哈 ~

去埋 TOP 買韓國零食   之後買埋晚餐就搭小巴番屋企喇 ~

工人托住佢瞓覺   幾咁嘆呀

番到屋企即沖涼   今日算流得唔多汗   因為行商場多呀   哈哈 ~

我話今日買親乜嘢都有折咁   里奧大人話係有折先買   哈哈   咁又係呀   今日無 Discount 呢類字眼   我唔會入去㗎   因為話咗唔想亂買嘢嘛 ~

我同里奧大人依家都用緊掛頸風扇   咁真係無咁熱   所以問家姐要唔要 ?!   佢問幾錢 ?!   我同里奧大人講話肯定家姐係想要   因為如果佢唔要會即刻 Say No   之後佢真係話要呀   所以里奧大人番到屋企就幫佢落單喇 ~

我話家姐肯定唔要綠色   但佢居然話要綠色   里奧大人話以為佢要灰白色    家姐問番我哋係咪覺得綠色唔靚 ?!   佢話淺色易污糟   里奧大人就話灰白唔易污糟㗎   家姐即刻話要買灰白色   我話不如整鬼家姐   講哂 3 隻色都好   睇佢點揀 ?!   里奧大人話粉紅色最襯佢   但家姐唔鍾意粉紅色   同我一樣   哈哈 ~

我同里奧大人講今日多謝哂佢呀   陪我婦檢又陪我行街買嘢   又買咁多嘢比我   所以今日真係好開心好開心呢 ~

Ottogi 傳統芝麻油 450ml ($58) / Binggrae SizeUp 無糖美式咖啡 350ml ($13) 

Darda 焦糖味爆谷杯裝 ($12)

醬油拉麵味脆麵 ($9) / BBQ 燒烤味脆薯條 ($9)

本身我只買咗 $88   但職員話買滿 $100 就減 $5   所以買多支咖啡喇   真係咁啱我本身就係想買支咖啡比里奧大人試下呢 

Body Shop 呢隻白麝香香水   我初初出嚟做嘢已經買嚟噴   到依家都好鍾意呢陣味   原來 Binnie 都鍾意   阿花又鍾意   所以我同佢講話 $400 之內就買   感恩真係 $309 呀   如果唔係應該唔買呢   哈哈

里奧大人 5 點幾瞓覺    我都坐喺梳化瞓咗陣 ~

差唔多 6 點 15 分就預備晚餐   因為我要焗熱啲炸雞同薯條呢 ~

里奧大人 6 點半左右醒   我話等多陣就食得   佢以為我講笑   因為佢唔見我入廚房整嘢   但其實我已經焗緊薯條啦 ~

抖陣就再沖多次涼   之後一齊睇 "盡情吃 用力愛" ~

今晚差唔多 11 點半先眼瞓   可能頭先瞓咗陣呀 ~

水餃拚雲吞 (外賣) ( 25-JUL-2022 )

 ( 25-JUL-2022  MON )

尋晚瞓到半夜熱醒   我仲以為自己發夢添   哈哈 ~

早餐食吞拿魚治烘底   仍然覺得好味   但都會停下   好怕又食厭呀 ~

呢盒燕麥奶真係難飲到一個點   好在係買嘢送咋   如果我自己買嚟試就激氣啦   哈哈

菇場唔忙啦   好在唔眼瞓 ~

阿花又拎咗份車銀傻應援比我   實在太好   唔駛消費都有應援  哈哈

Lunch Time 出去一田行陣   阿花話見我推住架戰車   想大叫我又買咩 ?!   因為我同佢講話今年下半年唔買嘢   佢叫我慳啲唔好扮知慳識儉   仲話成日都見我買好多嘢   所以佢話我根本好鍾意買嘢   哈哈 ~

我同里奧大人講   次次推車就唔會買到嘢   本來我就咁買罐泡菜就算   但排隊比錢又周圍望下   所以又買咗包部隊鍋醬料   我同里奧大人講話呢個簡直係陷阱   佢話佢唔會排排下隊會買到嘢喎   呵呵

又唔太餓   所以 Lunch 就食 Flakes + 乳酪 ~

仍然唔忙   傾下偈就好快放工了 ~

放工走人啦   船頭話我遲咗啲啲走   我話其實唔想放工   之後佢同阿花都啤住我   我話因為要等 20 分鐘車先唔想放工啫   哈哈 ~

今晚等咗半個鐘頭車呀   我摸下條腰位置   估唔到喺濕哂   但我又唔熱㗎喎   真係原來企喺度都流汗   哈哈 ~

番到屋企即煮晚餐啦   里奧大人 7 點幾先番到屋企   我叫佢食埋先沖涼   因為一定會食到出汗   哈哈 ~

里奧大人同家姐都話好熱   平時佢哋好少會話熱   只係會成日話我怕熱要開冷氣   但依家家姐直頭朝早都要開冷氣添呀 ~

是日懶餐 - 水餃拚雲吞 (外賣)

水餃拚雲吞 (外賣) - 用白菜墊底   唔想洗多隻碟   哈哈 ~

洗埋碗就即沖涼   之後同里奧大人一齊散拜 ~

睇多陣 Youtube   今晚 11 點幾都瞓   其實頭先我睇睇下 Youtube 都瞓着咗 ~