鹽焗手撕雞飯 + 山葵八爪魚軍艦 + 中華沙律 (外賣) ( 16-JUL-2022 )

鹽焗手撕雞飯 - 估唔到雞肉好入味呀

 今晚只想食呢款壽司

 我都鍾意食中華沙律  

$39.6/6罐   家姐話抵   所以我買 2 Pack

( 16-JUL-2022  SAT )

今朝諗住 8 點先起身   不過里奧大人起身番工   我都其實醒醒地   但都係抖到 7 點 35 分先起身呢 ~

早餐食奶醬多   因為唔餓   唔係都唔想食佢   哈哈 ~

 呢個真皮墊係家姐買比我吔   用咗起碼 8 年   但我覺得好新淨   阿豪話真皮係唔同啲

菇場唔忙啦   西瓜又出咗去   所以同 8 卦 Skype 又同阿花 Whatsapp   好快又到 1 點 ~

里奧大人同姑奶去買手機   咁我放工去街市買定餸同凍肉   聽日就唔駛周圍滕呢 ~

家姐無啦啦又 Whatsapp Say Hi   咁即係有嘢搵我啦   佢真係問我要唔要榴槤月餅同芋泥月餅 ?!   我話唔要又問點解 ?!   真係好搞笑   所以最後都要啦   佢話 Berry 請我食喎   哈哈 ~

我掛住 Whatsapp   正想入街市就比人欄住   原來我未嘟安心出行   因為我唔係成日去街市呀   真係無呢個習慣呢   之後我都忍唔住笑同職員講   以為入面有事發生唔比入   哈哈 ~

拿拿聲買咗兩份水餃雲吞   再買菜同蒜頭乾蔥頭   之後去凍肉店買金沙骨同排骨   最後就去超市幫家姐買豆豉鯪魚   今日買滿 $180 有 9 折   所以買 3 Pack 同埋益力多   因為點都買多好過買少嘛 ~

番到屋企放低哂所有嘢   兩隻手係震哂呀 ~

分類哂所有嘢就即沖涼喇   里奧大人 3 點幾番到屋企   都要即開餐喇   好在今晚好夜放學   呢個時間食都好㗎   可以頂耐啲   哈哈 ~

食完就抖下啦   之後叫里奧大人幫我上網睇戶口資料   我話最憎用部電腦   佢好緊張話唔鍾意呢部電腦 ?!?!   我話係好憎上網睇銀行資料啫   我鍾意睇一張嘅月結單   但依家環保就要比錢   咁又唔想喎   哈哈 ~

真係好日唔睇   一睇原來我簽咗八千幾蚊卡數呀   之後里奧大人都話無可能咁多   佢再幫我睇條數計   幾乎隔日增值 $250 八達通   佢仲話以為我比人 Hack 咗呀   哈哈 ~

所以比錢太方便又係死囉   唉   下半年唔再亂埋嘢喇   但希望忍到手啦 ~

抖陣就出發番學   因為要去買豬手乾比里奧大人帶番公司食   所以其實好難唔買嘢囉 ~

今晚晏咗放學   因為上星期六打風   所以 Miss 話補番比我哋   實在太好了 ~

買完晚餐就搭車番屋企   我張八達通負數呀   仲以為人哋部機壞咗   哈哈哈哈   好在有散紙咋 ~

食完就沖涼   又睇下 Youtube 咁   所以 12 點左右先瞓呢 ~