泰亞萊泰式美食 @ 紅磡 ( 30-APR-2024 )

雙人套餐 ($188)

香草辣椒肉碎煎蛋飯 - 越食越辣   所以食完就知驚   哈哈

泰式細拚盤   

馬拉盞炒通菜 - 本來叫飛天通菜   不過佢哋搞錯咗   但好在真係搞錯咗咋   因為肉碎飯好辣   如果加埋飛天通菜又係辣   我驚我頂唔住呀   哈哈

泰式椰汁冰 X 2

( 30-APR-2024  TUE )

感恩一覺瞓天光呀   其實鬧鐘未響都已經醒咗   不過點都等到鬧鐘響先起身呢 ~

早餐食芝士條   都係喺 A1 買㗎   廿蚊有 4 條但有 9 折都抵   同埋口感味道都唔錯 ~

家姐 Whatsapp 問好唔好食 ?!   因為係佢幫我揀嘅   估唔到佢仲記得我買咗芝士條   哈哈

食完早餐就去里奧大人公司坐陣   之後就搭車番工喇 ~

菇場唔忙呀   依家一組 4 部冷氣壞哂   BG 個位直頭吹熱風   好在我有風扇仔   同埋我坐車都吸夠冷氣   加上又唔係趕頭趕命番公司   所以唔會話好熱咁囉 ~

諗住電腦 Filing   點知家姐打嚟傾咗半個鐘頭電話   話咁快就到 11 點半   呵呵 ~

Lunch Time 出去食鯪魚球河   食完又去一田行下   行到 12 點 45 分就番菇場喇 ~

吉百利迷你復活蛋朱古力   喺 7-11 買只係 $8.5/包 咋   真係超級勁抵   所以家姐話要 2 包   呢款朱古力真係兒時回憶   味道就真係唔記得喇   但朱古力呢啲味道   變化應該唔大囉   哈哈 

唔忙又同冰姑 Skype   基本上 8 卦無做   我都只係同冰姑 Skype   一係同阿花 Whatsapp   其實咁都好㗎   時間過得快好多呢   呵呵 ~

放工即走   里奧大人話聽日放假   所以今晚想出去食   我話我煮都可以㗎   不過佢話唔好煮   等我可以休息一下 ~

食完就番屋企喇   開埋機洗衫就沖涼   里奧大人就熨 2 機衫當做運動 ~

今晚要染髮啦   真係食咗藥之後啲白頭髮多咗好多   唉 ~

搞掂就再沖多次涼   之後又睇 Youtube 呢 ~

睇睇下都好眼瞓   望住個鐘係 10 點   但又好似早瞓得滯   不過其實我都瞓鬼咗   因為再望個鐘已經 10 點半   所以之後都入房瞓喇 ~

脆皮燒腩仔 (外賣) + 蜜汁叉燒 (外賣) + 菜心苗 ( 29-APR-2024 )

( 29-APR-2024  MON )

感恩一覺瞓天光呀   瞓到 7 點 35 分都起身 lu ~

見早咗起身   所以煲薑茶比自己喇 ~

早餐食扭紋酥   估唔到都幾好味   之前喺 A1 買㗎   好似 $17   兩個人 Share 食就好抵   哈哈 ~

菇場忙咗陣就 Hea 過   今日又壞冷氣   好在我有兩把風扇仔   咁就唔會覺得好熱呢 ~

有時同阿怪一齊行出去 Pantry 方向   佢見我行呢   佢會突然煞停   之後等我入去佢先再行   我嗰時以為佢見我先係咁啦   點知佢見到其他同事都係咁   我心諗駛唔駛咁驚呀   如果我同其他同事一齊行去 Pantry   係一路傾一路行入去㗎 ~

Lunch Time 去譚仔食米線   食完再行一田   行咗 20 分鐘就番菇場 lu ~

重慶 3 小辣湯底真係好正   呢個湯底係阿齋介紹   所以我同佢口味又係好似   哈哈 

今朝家姐要空肚照超聲波   Book 咗 10 點但等到 11 點幾呀   差唔多 12 點先搞掂   所以番公司食午餐   咁佢又問我食咩   我 Send 張相比佢   話係妳迫我影㗎咋   因為我都唔想引妳   之後佢見到張相話勁肚餓呀   哈哈 ~

咁我同里奧大人講話家姐等咗好耐呀   仲要無食早餐嚟等   之後里奧大人話一早都話陪佢去啦   如果咁耐都未照   一定會叫姑娘快啲安排去照   始終空肚嘛   驚家姐餓到暈 ~

不過我都同里奧大人講   有佢陪住家姐   我就安心好多   但家姐又唔比我哋陪   因為話只係照嘢好簡單   照完就走得 ~

菇場唔忙   今日西瓜全日都無番   但又開咗房燈   好似話比我哋知   佢隨時會番嚟   醒醒定定呀 ~

放工即走   因為我要去遠少少買燒味   所以叫里奧大人幫手浸菜   咁我起碼慳咗 20 分鐘時間 ~

買燒味等咗 15 分鐘   加埋行番番屋企要啲時間   所以雖然今晚只係淥菜同煮飯   但都要 6 點 40 分先開飯呀 ~   

是日晚餐 - 脆皮燒腩仔 (外賣) + 蜜汁叉燒 (外賣) + 菜心苗

脆皮燒腩仔 (外賣) - 買半斤多少少   今次個皮都好脆呀   所以多數喺呢間買燒腩仔呢 ~

蜜汁叉燒 (外賣) - 都係買半斤多少少   我本身要肥叉   不過師傅話無   話今日得番腍少少嘅叉燒   咁我照買啦   因為唔想得一樣燒肉咁悶嘛 ~   

菜心苗 - 今晚食燒味飯   所以一定要有碟菜   哈哈 ~

洗埋碗就沖涼   今日里奧大人中午做咗運動   我今日又行咗好多路   所以都唔去做喇 ~

睇下 Youtube    10 點半都瞓覺 lu ~

燒汁煎三文魚骨 + 臘潤腸蒸排骨 + 杏汁銀行豬肺湯 ( 28-APR-2024 )

2 嚿非常細嘅豬肺 + 幾粒白果

( 28-APR-2024  SUN )

今朝都係 7 點起身   里奧大人以為我同佢一齊食早餐呀   因為佢諗住我瞓夠先去家姐屋企   我話瞓夠就唔駛去㗎喇   哈哈 ~

同家姐 姐夫飲茶   一路食一路傾   因為點心係即叫即蒸   咁要等嘛   我有時都等到唔記得自己叫咗啲咩   好在家姐記得咋 ~

我鍾意素餃   但家姐就麻麻哋   話好油呀   咁都係嘅   炒嘅時候真係落唔少油㗎

我想食蝦腸

干蒸牛肉好味呀   唔係間間酒樓都有

好似係叫沙律炸雲吞   所以無甜酸醬比妳蘸喇

家姐想食鹹肉糭   今次好味呀   啲糯米好煙韌   我依家鍾意蘸沙糖一齊食   勁似阿婆   哈哈

食完就番屋企啦   Berry 女出盡力大叫   家姐都話佢叫到好似幾年無見我咁   真係好搞鬼 ~

撲完我就即刻跳上梳化

想影佢嘅時候   無啦啦跳落嚟   咁樣影到佢對眼好大隻咁呀   好似粒龍眼核   哈哈

R 痕中

好多時都咁望我   可能佢都知自己肥   要三七分臉先靚女   哈哈哈哈    

短鼻就得意好多

影完又望下妳

好似好乖咁

我唔喺度   佢應該係會瞓覺   哈哈

依家會比福寶啲片比家姐睇   家姐都話佢好得意   咁我比宋爺爺送福寶條片比佢睇   佢睇到喊呀   係喊到出聲嗰隻呀   個畫面只係短短幾秒咋   所以我就係比呢個畫面吸引到我睇福寶   終於明白姜爺爺 宋爺爺同埋韓國人點解咁唔捨得福寶喇   佢真係好得意呢 ~

之後又傾下公司嘢   講開阿蟲係個咩嘢人   估唔到家姐話肥妹都係咁   里奧大人都有一個咁嘅同事   所以番工真係好好   賺錢之餘又可以見盡人生百態   哈哈 ~

傾呀傾   好快又 12 點幾   我要走人喇 ~

家姐帶 Berry 去街   不過 Berry 好驚把遮   所以我話送我到巴士站就得㗎喇   唔好陪我搭車   始終落雨麻煩嘛 ~

買埋餸再番屋企放低   之後同里奧大人去大家樂食下午茶 ~

可能已經 2 點半   里奧大人居然話好餓   但我就唔餓喇   所以叫一個餐就夠   我食少少雞肶就可以了 ~

番到屋企都休息下   里奧大人諗住沖涼瞓覺   點知沖完涼之後   Melody 有 Urgent 嘢叫佢做   所以無得瞓呀 ~

我就唔眼瞓    所以睇下 Youtube ~

5 點開始整青瓜粟米沙律   搞掂就即煎三文魚   原來已經 5 點 50 分   之後再蒸白飯同排骨   差唔多 6 點半先開餐 ~

材料只係 4 條溫室小青瓜 + 1 罐粟米 + 2 杯椰果   其實因為之前買咗小青瓜   但又唔想食紅油拍青瓜   所以就整沙律喇

是日晚餐 - 燒汁煎三文魚骨 + 臘潤腸蒸排骨 + 杏汁銀行豬肺湯

燒汁煎三文魚骨 - 雖然落鑊煎   但都唔多香脆   不過都唔緊要   因為我都要加燒汁焗熱   但其實點解唔一次焗熱呢   呵呵 ~

臘潤腸蒸排骨 - 特登整多個餸   咁里奧大人聽日就有 Lunch Box 喇 ~

杏汁銀行豬肺湯 - 家姐之前比嘅余仁生湯包   我覺得味道好淡 ~

洗埋碗就開機洗衫   之後沖涼   抖陣就食沙律 ~

估唔到里奧大人話好食   因為我落咗沙律醬嘛

無啦啦又暈暈哋   所以里奧大人唔去做運動   熨 2 機衫當做運動喎   不過我話坐喺度都 OK 㗎   唔駛咁擔心 ~

繼續睇睇福寶 睿寶同輝寶   所以睇到 10 點 50 分先瞓覺 ~

麥當勞 @ 紅磡 ( 27-APR-2024 )

( 27-APR-2024  SAT )

尋晚瞓得都唔錯   可能無腰痛呀 ~

今朝鬧鐘響就起身啦   煲好水再預熱埋焗爐   之後望個鐘原來係 7 點 05 分咋   咁我 Off 先係 7 點起身嘛   即係我上星期響完無關咗去呀   最搞嘢係尋晚熄手機之前   我明明睇到係關咗㗎噃   但今朝再睇   原來係關咗星期日   哈哈哈哈 ~

咁早又食唔落早餐   所以我又番入房瞓下先喇 ~

瞓到 7 點 22 分就醒 lu   之後又再重覆做多次煲水同預熱焗爐   哈哈 ~

早餐食甜餐包夾芝士   今朝要食飽啲   因為起碼 1 點半先食午餐呀 ~

菇埸唔忙   個個等放工 ~

放工即走   同里奧大人去飯堂食午餐 ~

我覺得份量少咗

好大碗飯   所以次次都要打包一碗飯

慾望酸梅又係越來越細杯   之前幾乎滿哂咁㗎

食完就番屋企抖下   差唔多 2 點 45 分就出發   因為今日有新嘅 LA 事奉   想早啲去準備 ~

3 點半左右就完畢   我都即刻番屋企休息喇 ~

同里奧大人講話今日都幾攰   但平時事奉又唔覺得攰㗎喎   之後里奧大人話妳今日要番工   所以放工再事奉咪攰囉   咁又係   哈哈 ~

抖到 5 點又陪里奧大人番公司   我就同阿妹傾偈   因為聽日見唔到佢嘛 ~

之後我都自己番崇拜   完畢就去里奧大人公司等佢放工 ~

7 點幾走得   去麥當勞食晚餐   因為想快啲用哂啲 Coupon 呀 ~

食完都即番屋企開機洗衫   之後沖涼休息   今日都幾攰下   哈哈 ~

睇下福寶   今晚 10 點 15 分都瞓喇 ~

Saizeriya ( 薩莉亞意式餐廳 ) @ 紅磡 ( 26-APR-2024 )

中華海草 (雙倍) ($18)

原味雞翼 ($20)

莎樂美腸薄餅 ($36)

蕃茄煙肉意大利粉 ($30)

( 26-APR-2024  FRI )

尋晚半夜去咗次廁所   感恩都好快瞓得番   但發咗好多個夢   我記得有個夢係細路買 Minions 嘅長遮   另一個係家姐叫朋友整個蛋糕比我   要 1 萬蚊一個   之後仲有幾個夢   不過唔記得 ~

7 點 20 分都醒咗   本來唔煲薑茶   但早咗起身就煲啦 ~

早餐食甜餐包夾芝士   好耐無咁食法喇 ~

菇場唔忙呀   今日西瓜唔喺度呀   所以全部人可以專心上網   哈哈 ~

Lunch Time 落勁大雨   不過我想買 IF 椰青水比里奧大人呀   咁食完水餃米就要去買呢   本來想番屋企先買   但唔想番到去又無貨囉   家姐又無嘢喺 HKTV Mall 買   所以我自己買咗先喇 ~

食完有氣力   所以即去惠康買椰青水喇   其實好感恩㗎   尋晚里奧大人先話無哂椰青水   今日上網一睇就見到椰青水特價喇 ~

本來諗住買 4 Pack   但見環保袋可以裝 3 Pack   所以即買 6 Pack   分兩袋拎都 OK   最緊要當時係無雨   同埋近菇場呀   哈哈

唔忙就做自己嘢   一過咗 4 點   時間就會過得好快咁 ~

放工即走   里奧大人喺巴士站接我呀   佢拎椰青水番屋企   我就去食店等佢 ~

食完都番屋企喇   沖埋涼就休息 ~

睇下 Youtube   今晚 10 點半都瞓覺 lu ~

辣汁焗金沙骨 + 薑蔥蓉炒福花 ( 25-APR-2024 )

( 25-APR-2024  THU )

尋晚瞓到半夜醒咗呀   之後好難先瞓得番   但一瞓又瞓得好好   同埋好在無腰痛呢 ~

今朝都係同里奧大人出去食早餐   食完就去佢公司坐陣先番工 ~

條街好焗熱呀   真係一路行一路流汗   勁想番屋企再沖個涼   哈哈 ~

菇場忙下停下   咁就好快到 Lunch Time 喇 ~

突然間好餓   所以去食鯪魚球河   但食完又好滯   哈哈哈哈 ~

我鍾意將啲鯪魚球整到一粒粒   咁樣易入口啲呢

唔忙又做自己嘢   菇場得一半人番咋   所以靜到想瞓覺 ~

放工即走   里奧大人話出去食   不過我又諗唔到想食咩   所以都係煮飯   反正醃咗金沙骨呢 ~

番到屋企都即預備   見里奧大人未番   頭先明明話放得工   我估可能比 Melody 捉住   咁我焗埋金沙骨就打比里奧大人   佢啱啱喺屋企樓下   之後話頭先比 Melody 捉住呀   仲要佢一起身   Melody 就即刻搵佢   哈哈   次次都係咁 ~

是日晚餐 - 辣汁焗金沙骨 + 薑蔥蓉炒福花

辣汁焗金沙骨 - 好似好耐無整呢個餸咁   不過整呢個餸又係好簡單   同埋里奧大人又可以帶飯   一舉兩得 ~

薑蔥蓉炒福花 - 初初諗住分兩餐食   但都係唔留喇   同埋我仲好滯食唔落飯   咁食多啲菜好過 ~

同里奧大人 8 點左右出去行公園   一落樓就覺得好焗   里奧大人話駛唔駛番上樓 ?!   我話照行啦   我想郁下同埋流汗   哈哈 ~

~

行咗半個鐘都番屋企喇   開埋機洗衫就沖涼   食埋生果就休息休息 ~

大樹菠蘿   今年都係 $50/3 盒

睇下福寶   今晚 10 點 40 分瞓覺 lu ~