金菇豚肉卷 + 蠔油唐生菜 ( 9-APR-2024 )

( 9-APR-2024  TUE )

尋晚瞓到半夜熱醒咗   感恩之後好快瞓得番   但如果中途無醒就更好   哈哈 ~

今朝同里奧大人出去食早餐   依家體力慢慢回復   都唔想成日喺屋企整早餐   都係想比自己抖下 ~

家姐問我係咪自己切開細細件 ?!   我話唔係   之後佢話點解切開 3 件咁得意嘅 ?!   我話係 4 件嚟㗎   其實咁睇又真係好似 3 件   哈哈

菇場唔忙   今日 3D 要好好享受 ~

家姐叫我打比佢   話有嘢想同我講   以為咩咁神秘   原來係講 Berry 女 ~   

Berry 好有性格㗎   唔鍾意同其他狗玩   咁今朝家姐同工人帶 Berry 去街   工人好鍾意人哋隻松鼠狗同柴柴   咁家姐叫工人去玩啦   之後 Berry 扯住家姐走去另一邊   行咗唔夠 20 秒   Berry 扯住家姐番轉頭   衝去工人度呀   仲用個頭仔頂咗工人個美臂兩下   即係要工人同佢一齊行呀   勁搞笑 ~

所以嗰時彤彤婆婆喺家姐屋企   Berry 係特別乖   等人多啲摸佢同埋同佢玩   真係幾咁醒呀 ~

咁同家姐又傾呀傾啦   我叫家姐去泰國要試多啲薯片   家姐高 8 度話可以試㗎 ?!   我忍唔住大聲笑咗出嚟   我話試嘅意思係買番嚟香港食   唔係當場試食呀   不過我又講得衰嘅   哈哈 ~

Lunch Time 出去行陣再食牛筋米   食完又去買菜同麵包   番到菇場都 12 點 45 分 lu ~

家姐叫呢碗做蔥米

米粉份量唔多   咁就啱我啦   始終 12 點食午餐都算早呢

唔忙又做自己嘢啦   咁啲時間真係好似飛咁快咁㗎 ~

放工即走   原來落毛毛雨   等我頭先仲同里奧大人講話出去行公園添 ~

番到屋企即預備   今晚難得開鑊煎嘢呀   所以要啲時間呢 ~

是日晚餐 - 金菇豚肉卷 + 蠔油唐生菜

金菇豚肉卷 - 好想食好耐㗎喇   同埋又醃咗豚肉   唔想又用泡菜炒   所以整呢個豚肉卷喇   里奧大人話好味呀   不過佢以為係牛肉卷   哈哈 ~

蠔油唐生菜 - 用多咗時間煎嘢   所以要淥個最快熟嘅菜   唐生菜係不二之選 ~

洗埋碗抖陣就做爆汗運動   做咗 10 分鐘   不過條腰都係痛痛哋   所以唔做喇 ~

見無落雨就叫里奧大人陪我出去行公園   因為我想之後每晚都出去行呀   因為我做跑步機唔係咁出汗呢 ~

一出去覺得有啲冰冰哋嘅感覺   里奧大人直頭話凍添呀   係咁縮住個身嚟行   但又話唔駛拎件外套 ~

其實越行越凍   間唔中都聽到啲人話今晚凍咗好多   所以視察完環境都即番屋企呀   原來都出咗去半個鐘   咁又好呀   行下行下唔覺嘛 ~

沖埋涼就休息   睇多陣 Youtube   今晚 10 點半瞓覺 ~