阿芳餛飩 @ 佐敦 ( 16-APR-2024 )

五香燻魚 (+$24) - 好味呀   因為想食好耐   哈哈

韭菜豬肉餃子 10 隻 ($50) - 我以為蒸餃子添

自家制手工蔥油餅 ($25) - 呢個脆卜卜都幾好味

粟米陼肉煎餃 ($29) - 完全唔掂   唔多覺有粟米粒   同埋啲豬肉好 "鞋"

豆漿 ($8) - 仲以為係自家煲嘅豆漿添 

@ 佳佳甜品

合桃露 ($27) - 好稀同無厘味道   

百合綠豆沙 (凍) ($27) - 又係好稀   同埋無咩味道

無料咁

( 16-APR-2024  TUE )

感恩一覺瞓天光呀   但鬧鐘未響   所以繼續瞓呀 ~

早餐食牛油排包   今次加埋芝士   可能太耐無咁食   食完覺得比較滯   哈哈 ~

菇場唔忙   我一入嚟就聽到阿蟲用高 8 度嘅聲音同阿後講嘢   其實人哋問妳嘢   再叫妳 Confirm 一下   駛唔駛咁大聲呢 ?!   真係最憎佢呢啲態度   佢自己做錯就細細聲講   呢下先衰嘛 ~

今日放下午   因為陪里奧大人去睇專科   我本來話放一日   但里奧大人話唔好喎   咁又係呀   佢都係瞓到自然醒   咁不如我番工   留番啲假仲好   呵呵 ~

放工即走   去里奧大人公司坐陣   之後再買午餐番屋企食 ~

黑椒雞扒午餐肉飯   我禁食祈禱   所以叫里奧大人食塊午餐肉

食完抖下   差唔多 3 點幾就出發去油麻地喇 ~

我哋 3 點 50 分左右到診所   里奧大人個保險 Agent 早過我哋到呀   真係唔好意思 ~

Book 咗 4 點   但睇情況都係要等   好在同 Agent 傾偈   時間就過得好快喇 ~

最搞笑 Agent 話好似見過我   又話我成日笑   個樣好 Nice   咁基本上我都對人笑嘅   反正都係一個動作   同埋笑下又開心啲呢 ~

我平時 Lunch Time 出去會經過一檔粉麵店   個女職員多數企喺門口   我都會同佢笑   不過我唔係幫襯佢哋嘅   自此之後   我哋每次見到面都會笑   我覺得好搞笑 ~      

5 點終於到里奧大人喇   Agent 都陪埋我哋入去   咁都好呀   我驚聽漏嘢呀   同埋又驚問漏嘢   感恩佢陪住咋   因為有啲問題我都無問到呢 ~

我陪里奧大人做個簡單檢查   之後里奧大人行出去   醫生就問我   里奧大人做啲咩工作 ?!   身體呢排點樣 ?!   我就答番醫生啦   其實醫生無啦啦咁問我   仲要等里奧大人出去先問   我嗰下係勁驚囉   以為有嘢唔可以比里奧大人知 ~

感恩做咗檢查係一切正常   醫生直頭話唔駛做 MRI   感謝神 ~

好感激 Agent 陪我哋呀   我同佢講   知道里奧大人要睇專科   我就開始好擔心同成日喊   所以依家 Everything OK 真係好感謝神呀 ~

原來都睇咗半個鐘   之後再等埋拎藥   等咗 10 分鐘左右啦   搞掂就走人喇 ~

咁里奧大人話去食嘢   我話咁早 ?!   但佢話餓呀   頭先食咗半盒飯咋 ~

行下行下   見到有間食餃子就入去食喇   因為我唔想食飯呀 ~

食完就諗住去永安   但經過見到佳佳又入去食糖水喇 ~

我同里奧大人講話點解啲糖水舖咁晏先開 ?!   佢話一早邊會有人食糖水呀小姐 ?!   哈哈哈哈   咁又係喎   無諗過呢樣嘢添   因為可能我早瞓   成日覺得收 12 點係好夜好夜囉 ~

去到永安諗住買鞋   但個鞋底又唔係咁得   所以都唔買 lu ~

咁行番去搭巴士番屋企喇   感恩 7 分鐘後有車 ~

里奧大人要番公司整啲嘢   佢話 10 分鐘搞掂   咁我陪佢番啦 ~

搞掂都即番屋企   沖埋涼就休息休息 ~

睇下福寶   今晚 10 點半都瞓 lu ~