栗子冬菇燜雞肶 + 蒜蓉炒脆肉瓜 ( 31-AUG-2008 )

同里奧大人食完 Lunch 就番屋企喇   因為想快啲屋企睇奧運精英滙香江呀 ~ 

是日晚餐 - 栗子冬菇燜雞肶 + 蒜蓉炒脆肉瓜

栗子冬菇燜雞肶 - 栗子係之前買多咗   所以諗住整雞翼   點知雪柜居然無雞翼   但又唔想再落街買   所以就整栗子冬菇燜雞肶喇 ~

蒜蓉炒脆肉瓜 - 又係之前買多咗嘅   所以就整蒜蓉炒脆肉瓜就算 lu ~ 

整完哂所有嘢   里奧大人就煮芝麻糊湯丸   食到好飽呢 ~

 
今朝無番教會   所以同里奧大人慢慢食早餐   我最享受星期日份早餐   因為唔駛趕頭趕命咁食   好 Relax  ~

車仔麵 + 休息

雖然我唔係咁舒服   但我都去街市買 8 個鴨梨 ($10) + 1 個西瓜仔 + 3 個木瓜 ($10)   因為要食多 d 生果   同埋煲雪梨水比里奧大人潤下

我次次病親   車仔麵都係我首選   雖然無益   但好味   最適合無胃口嘅人食呢 

食完睇陣電視就沖涼   好多人話沖完熱水涼即刻瞓覺好舒服   但我次次都唔覺嘅   反而覺得更難入睡   因為好熱呀   慶合合點瞓啫   一路瞓一路瞓發惡夢都似呀

      

今朝無番工   本來可以瞓晏 d   但個心成日掛住打比公司請假   又掛住 10 點睇奧運精美滙香江   所以 9 點幾打比公司請假之後就出街食早餐 lu   本來想食麥皮   但好有病 feel   所以去大家樂食糯米雞 + 奶茶 ($19.5)   食飽 d   因為里奧大人開 ot   要 3 點先番到屋企呀 

發

大家樂 ( 29-AUG-2008 )

尋晚放工去 Shiseido 修眉同做皮膚測試   結果係皮膚比較乾   所以真係要比心機敷 Mask 喇   唔係再多幾年真係難以想像架喇   唉   其實我買埋唔少 Mask   但係懶   唔願做之嘛 ~

前晚唔夠瞓   所以耳仔同喉嚨都好痛   個人又好凍   都知出事喇   因為我耳仔痛多數係發燒嘅先兆 ~

番到屋企第一時間探熱   真係 99.6 呀   拿拿聲食 Panadol   因為聽日約咗媽咪飲茶   唔想病呀 ~ 

同里奧大人去大家樂   就腳嘛   食牛肉串 xx 鐵板燒 + 鹹魚雞粒炒飯    牛肉串得果幾粒牛肉   超唔抵呀 ~

食完里奧大人話去 Jusco 買冰皮月餅   明知我發燒   仲唔早 d 同我番屋企而要買月餅   我都奇怪   點知去到 Jusco 就話要買木瓜   想買木瓜比我食   因為可以增強免疫力喎   (果刻幾開心架   終於知道有我存在)   但可惜 Jusco 無呢   之後佢自己再去惠康   但一樣係無   見到里奧大人咁好   真係好感動   所以其實我都好鍾意自己得閒病下   但唔要大病入醫院喎   因為佢成日掛住做嘢   無時間陪我呀 ~

今朝耳仔同喉嚨超痛   唔想食熱嘢   所以食芝腿菠蘿包 + 凍奶茶 ($17)   飲凍嘢真係舒服好多呢 ~

晏晝要覆診   所以同媽咪 里奧大人去美心皇宮飲茶   之後就去覆診 lu 感謝神   我甲狀腺同貧血指數非常好   到明年初先要覆診呢   但就要繼續食鐵丸   因為唔食啲指數好差喎 ~

 

番到屋企又探熱   又係 99.6 度   所以拿拿聲睇醫生呢   原來淋巴勁發炎   話摸到淋巴有好大粒嘢喎   當醫生按我條頸兩側時   痛到我用手打醫生隻手   勁尷尬呀   拿拿聲 Say Sorry 呀   今次要食一個星期抗生素   好煩啦 ~

不過都有樣開心嘢   就係有醫生紙   聽朝唔駛番工呀 ~

呢排無啦啦好鍾意食呢款牛油卷   唔知又會肥幾多磅呢 ~

住家飯 @ 媽咪屋企 + 瑜珈 ( 28-AUG-2008 )

尋晚又要學瑜珈   所以約家姐去麥記 Share 魚柳包打底~

其實瑜珈都幾多招式   次次番到屋企都唔多記得學咗啲咩嘢   想玩下都唔得添   有啲好簡單都記得嘅   但又唔記得幾時吸氣同呼氣囉 ~

學完瑜珈就同家姐打的番媽咪屋企食飯 lu   今次媽咪又係去睇大戲   所以又係得番家姐  工人同我食咋 ~

家姐睇埋 "家好月圓" 就番屋企喇   好在朱朱未瞓   可以陪下我   比我影下相   比我攬攬咁啫 ~

又係等到媽咪番咗屋企先安心瞓覺   所以 12 點幾先瞓呢   但過了瞓覺時間   好難入睡呀 ~

今朝 7 點起身同媽咪 朱朱食早餐   連家姐都嚟埋   好開心呢 ~

食完番屋沖下涼   睇睇報紙就番工喇 ~

依家喉嚨有啲痛   唔知係咪唔夠瞓呢   不過都應該係架喇   因為我依家超級眼瞓呀 ~

晏晝又番媽咪屋企食飯   因為里奧大人今朝上咗大陸開會呢 ~ 

青 BB 晚餐 - 薑蔥雞絲 + 蒜片炒脆肉瓜 + 芫茜皮蛋魚片湯 + 印尼香蒜撈麵 ( 27-AUG-2008 )

呢幾晚都係好攰咁   所以都無咩心機學煮新餸   費事無心機整得唔好食呀 ~

去到街市買要芫茜 ($3) + 鯇魚片 ($10) + 4 條脆肉瓜 ($4) + 4 隻皮蛋 ($6) + 雪藏雞肶 ($6)   經過饅頭店   突然好肚餓   所以買咗個熱辣辣嘅饅頭 ($3) 番屋企食呢   橫掂里奧大人探奶奶未咁早番   食少少嘢係好啲嘅 ~

番到屋企食呀食   估唔到區區 1 個鏝頭係咁飽肚喎 ~

食完之後就開始做嘢喇   煲菊花茶   熨衫再滾湯   諗住睇一陣電視先 Ready 晚餐   點知里奧大人話 On the way   搞到我要即刻煮喇 ~

是日青 BB 晚餐 - 薑蔥雞絲 + 蒜片炒脆肉瓜 + 芫茜皮蛋魚片湯 + 印尼香蒜撈麵

薑蔥雞絲 - 雞肶隔水蒸熟   放涼後拻成絲   之後再放大量薑蔥蓉   加少少麻油   我覺得超正呀 ~

蒜片炒脆肉瓜 - 啲菜太貴   又驚食唔哂   所以整脆肉瓜   因為好易整 ~ 

芫茜皮蛋魚片湯 - 里奧大人生飛滋   所以要滾呢個湯比佢下下火呢 ~ 

印尼香蒜撈麵 - 係 超為食卡姑 介紹嘅   原來係同 7 仔嗰啲一樣㗎   以後可以唔駛再去 7 仔食 lu ~

尋晚又幫里奧大人 "鍊錬" 骨   等佢可以舒舒服服瞓覺 ~
 
今朝食芝蛋治烘底 + 咖啡 ($16)   就嚟食到唔知食咩好喇   真係有得食又煩   無得食又煩 
番到菇場靜英英   打 Keyboard 都要細細力打呀 ~

晏晝同里奧大人去美心食焗豬扒飯 + 凍奶茶 ($39)   個飯超唔掂呀   唔多熱   啲飯又腍   唔係講笑   我整得仲好味過佢呀 ~

隔夜晚餐

尋晚放工陪媽咪配眼鏡   所以成 8 點先番到屋企呢

唔好話我懶呀   真係唔想架   計叫自己同里奧大人食咩   食唔哂就要留番做隔夜餸囉   唔通嘥咩 

就係咁    唔駛買餸    番到屋企只需要收衫  洗衫就當做咗家務喇  

是日懶餐 - 入味喼汁骨飯 + 入味隔夜湯 + 菠菜豬肉餃米粉
入味喼汁骨飯 -  放埋一碟靚仔 d

入味隔夜湯 - 唔係讚自己架   里奧大人真係一路飲一路話好甜架 

菠菜豬肉餃米粉 -  因為唔想里奧大人食隔夜餸   所以特登煮樣新嘢佢嘆   等佢覺得屋企好溫暖


食完洗完沖埋涼   諗住瞓   點知做 "亮相"   所以同里奧大人一齊睇埋先瞓覺   見里奧大人呢排咁攰   所以我好主動咁輕聲同里奧大人講   同你 "練" 骨丫   里奧大人話唔好   因為驚我 d 手指會痛   我就話唔驚   幫你 "練" 骨當做運動囉   當下里奧大人超級感動   不過同時彈句 "如果妳唔發脾氣又真係幾好嘅"   車車車   我都好小發脾氣之嘛   佢實在太唔了解我喇   比小小甜頭佢居然咁話我   車車車 

  

      

今朝呢   天氣好好   心情都唔錯   所以去 kfc 食鬆餅 + 奶茶 ($11)

番到菇場忙咗陣就做下自己嘢   咁先似番工家嘛

晏晝同里奧大人去餐廳食魚皮餃河粉 + 鹹魚肉餅飯 + 凍檸茶 ($41)   食到好飽都唔驚   因為行到番公司已經成身汗   差唔多所有嘢都消耗哂喇 

喼汁骨 + 青紅蘿蔔粟米栗子豬骨湯

尋日同里奧大人食 tea   食完就去買放大鏡比平仔   因為佢依家對眼好難 focus   佢又想睇聖經   但 d 字太細   所以買副放大鏡比佢   等佢可以睇   時間又可以過得快 d 呢 

番到屋企已經 4 點   所以要開始煲湯 lu 

是日晚餐 - 喼汁骨 + 青紅蘿蔔粟米栗子豬骨湯
喼汁骨 - 買 6 件金沙骨 ($12)   呢個餸係跟李派林喼汁提供嘅食譜整嘅   但人家嘅喼汁骨好深色同 d 汁好杰   但點解我整嘅唔係咁嘅   但我跟足哂步驟架噃   點解會咁架   我仲加埋老抽   但都無人家咁深色   點解呢點解呢 

青紅蘿蔔粟米栗子豬骨湯 - 好耐無煲湯   所以真係好好好好好好飲 

要快快手洗碗   沖涼   做 mask   因為要睇奧運閉幕呀   張大導真係好勁呀   睇到我嘩嘩聲   真係令人嘆為觀止呀


 

      

今朝要抽血   去到醫院超多人   因為星期五打風無開   所以個個都拿拿聲去補番抽血   今次人多反而早咗抽完血   估唔到可以嘆埋麥記早餐先番菇場開工呢

番到菇場忙到嘔茄   未停過手呀   打 blog 睇 blog 睇報紙都唔得閒呀

晏晝里奧大人同同事 farewell   所以我拿拿聲去媽咪屋企痴飯食呢