外賣街頭小食 @ 媽咪屋企 ( 2-AUG-2008 )

尋朝家姐一早打嚟問我夜晚得唔得閒   又問 3 問 4   其實就係想我陪佢食晚飯   因為媽咪睇大戲   無人睇住朱朱呀 ~

咁我即問里奧大人幾時放工呀   佢話最快都要 8 點   叫我自己食飯先喎 ~

咁就好喇   咁即係我唔駛煮飯啦   所以我話上媽咪屋企陪家姐同朱朱喇   等佢放工再陪過佢食啦   講講下我真係好忙呢 ~

放工一支箭咁飛去買煎釀 三寶 + 豬頭肉生腸雞腳  (橙色嗰啲)   因為家姐勁鍾意食尖椒   買完就番媽咪屋企喇 ~

番到屋企第一件事又係同朱朱影相   朱朱一見到我拎相機同電話就好怕㗎喇   因為次次番屋企都影   影都媽咪都話我成日影   都唔知有咩好影喎   可能有閃光燈關係   所以朱朱成日避   甚至乎走開添   所以好難影正面呢 ~

無幾耐家姐買埋生菜魚肉  + 腸粉番屋企   所以可以開餐喇   同家姐食嘢最開心   其一佢咩都食   其二係絕對唔會浪費食物   幾飽都要食埋去   好好呢 ~

太多嘢食喇   食到我哋 "眼嘆嘆" ~

之後家姐就餵朱朱食營養糊仔   朱朱唔 Like 食   所以成日掙扎   媽咪話自己要餵成一個鐘㗎   因為蝦媽咪呢   家姐就好啲   因為餵慣餵熟嘛 ~

之後兩個都攰喇    朱朱就作瞓    家姐就 "灘" 喺梳化睇報紙 ~

9 點幾朱朱瞓咗   咁啱里奧大人又放工   所以一齊走 lu ~

陪里奧大人食車仔麵   我就食咖喱牛柏葉魷魚   費事唔食嘢霸住人哋個位嘛 ~

番到屋企都 11 點   咁啱睇到有線做詹瑞文同阿 Sa 嘅 "戲劇之王"   又幾好笑   所以睇到 12 點幾   不過都睇唔哂   因為好眼瞓   所以唯有錄咗尾段留番得閒先睇 ~

今朝路路暢通   所以好他條去 KFC 食鬆餅 + 奶茶 ($11)   如果我整到咁好味嘅鬆餅就好喇 ~

 
番到菇場無咩 Mood 又好眼瞓   但有嘢做喎   好在 Half Day   唔係都幾慘 ~