隨變燒烤麻辣雞煲 @ 佐敦 ( 28-FEB-2014 )

隨便麻辣雞煲 - 小辣 (1隻 $178) - 預咗唔辣嘅   得少少麻囉   不過啲雞就好滑   都唔錯

奇脆炸魚皮 ($32) - 脆就脆   但好腥呢

美國安格斯肥牛 ($128) - OK 啦

新鮮有膏鵝腸 ($45) - 好爽呀   同埋淥熟之後就唔見哂啲肥膏   咁又唔錯喎  

重點必食魚皮餃 ($45) - 麻麻啦

隨便粉 ($22) - 口感好煙韌   最有驚喜係佢呀   哈哈

串燒牛魔王 ($32) - 入口即溶   正呀

燒雞腎 ($22) - 想食咋   籮籮話辣喎   我話孜然粉嚟之嘛   

燒雞軟骨 ($18) - 無特別囉

燒豬頸肉 ($18) - 都係無咩特別囉   同埋好呃人呀   因為有塊係超級細

香燒雞皮 ($18) - 完全唔掂   又唔熱又唔脆 

( 28-FEB-2014  FRI )

又 Happy Friday 喇   但啲天氣就麻麻喇   唔凍但又唔可以唔着褸   着褸又覺得有啲熱   最慘係潮潮濕濕咁呢 ~

早餐食奄列餐   其實呢間嘅早餐真係唔錯   不過嘢飲就唔係咁熱咁囉 ~   

菇場唔忙呀   不過個人仲係好鬼攰   勁想瞓覺 ~

Lunch Time 出去行陣   之後再買酸辣米線番菇場食   我食完成發覺成個身都係酸辣米線味呀   勁誇張   好在之後無味咋   唔係就慘咯 ~  

今晚約咗家姐同糟糟籮籮食雞煲   咁放工即走喇   喺九龍塘站 Join 埋糟糟一齊去尖沙咀   估唔到家姐最快   6 點 15 分就出到尖沙咀   咁佢哋話餓喎   所以去加連威老道食燒賣魚蛋   不過我都食唔落   之後再去貢茶買嘢飲就行 K11 喇 ~   

呢檔鹹濕嘢唔係成日都開檔

買咗 1 包黃色梨仔 + 1 包紅色梨仔 + 1 包魚柳 + 1 包菠蘿粒   總共要 $75   我以為自己聽錯呀    之前買都係 $10 包之嘛   依家梨仔要 $20 包   其他要 $15 包   好貴呀

差唔多 7 點 45 分就行番出佐敦   再去裕華買嘢食就走喇   因為籮籮已經到咗呢 ~

8 點 15 分等到 9 點 45 分   真係人都顛   食店又奇怪   糟糟已經係第 3 個打電話嚟㗎喇   不過佢哋間嘢講到明打電話只係用嚟登記   唔係留位   同埋會比 Walk-in 嘅人入去先   咁講真   最極限都係等兩個半鐘   因為佢哋限時兩個半鐘囉 ~

9 點幾打比里奧大人   佢喺大陸都仲未收工   不過我都話我都唔係好妳好多   我哋仲喺度等緊 ~ 

差唔多 10 點先食呀   籮籮又話辣又呢樣嗰樣   知佢好想快啲食完快啲走   我最鬼驚佢咁   之後都話叫個清湯嘅比佢   佢又唔要   其實我係想佢食嘢   唔好喺度依依哦哦   最後食到 11 點就走啦   睇住我哋 3 個食都無意思   所以我哋 3 個決定下次再去另一間食雞煲   但飛佢   哈哈 ~

籮籮車埋我哋番屋企   我番到屋企都係 11 點 20 分   里奧大人覺得奇怪呀   點解會咁早番喎 ~

里奧大人慘啦   喺大陸 Office 跟開佢嘅 Asst. 比人炒咗   所以佢要由頭到尾跟番哂啲嘢   本來諗好聽日去街都唔去得 lu   不過我又無所謂   因為我其實都好攰   想喺屋企抖下呢 ~     

黑椒牛扒 + 油麥菜 ( 27-FEB-2014 )

( 27-FEB-2014  THU )

尋日行咗成日   所以今朝都好攰呀   哈哈 ~

早餐食奶油多   其實尋晚果餐都未落格   不過唔食又唔得 ~

番到菇場就忙喇   差唔多 12 點先忙完咋   所以覺得好快又 Lunch 咁呢 ~

唔知食咩好   咁就買燒賣粉果   估唔到呢間粉果啲皮煙煙韌韌   下次再買嚟食先 ~

今日家姐打嚟唔知講咩   佢形容個 Size 我聽   話個 Size 好似隻手掌咁   但無手掌咁大   切哂啲手指嘅 Size 咁啦   我話妳話半隻手掌或者掌心咪得囉   駛咩講到切哂啲手指咁恐怕㗎   哈哈 ~

放工走喇   今晚唔駛去買餸   實在太好喇 ~

番到屋企預備晚餐   之後飲埋碗魚湯   抖陣就煮喇   反正我自己食先   早啲食就最好   多啲時間消化嘛 ~          

是日懶餐 - 黑椒牛扒 + 油麥菜  

黑椒牛扒 - 完全唔記得仲有牛扒   因為之前媽咪買咗啲新嘅比我   我都唔記得仲有舊果啲未食   所以拿拿聲食埋   我用淘大黑椒醬煮汁   但得個鹹字 ~  

油麥菜 - 勁喇   星期日買㗎   不過無食   今晚先食   好在無壞咋 ~

里奧大人 8 點幾放工   所以我都沖埋涼喇   之後就淥冬蔭功麵佢食啦   其實我完全唔記得喺泰國買咗番嚟   所以記得食就要食   唔係又過期   過期唔係問題   最大問題係一次過食好多餐先驚囉 ~

搞掂哂都差唔多 9 點半喇   咁里奧大人都陪我一齊睇電視劇   依家睇緊 "The Mentalist"   勁好睇呀 ~

元氣未復   所以 11 點就瞓喇 ~

海洋公園 + Outback Steakhouse @ 銅鑼灣 ( 26-FEB-2014 )

香辣炸雞搥 (伴芹條和藍芝士醬) ($78) - 我哋要中辣   但都唔係好辣   但份量就勁多啦   我初初諗住 6-7 隻   估唔到有 10 隻   所以叫家姐拎走   

昆士蘭沙律 (新鮮沙律菜配雞胸肉粒 ， Monterey Jack 蒙特耐傑克芝士，  車打芝士， 煙肉碎 ， 碎蛋， 蕃茄片， 杏仁片及烤麵包粒配農村沙律醬) ($122) - 份量又好多   好在多菜   啲雞胸好 "鞋"   所以無咩點食

肉眼牛扒拼豬肋骨 (10oz 肉眼牛扒配半份豬肋骨， 焗甜蕃薯及炸薯條 - 黑椒汁) ($252) - 估唔到咁大份   因為我哋用咗 Ruby 嘅份量嚟叫嘢食   Ruby 份量唔係好多   所以相比 Outback   佢哋啲份量真係超巨   食唔哂肋骨同薯條   又叫家姐拎走

是日餐湯 - 好似食扒附送例湯或沙律   我要熱湯   因為頭先飲完凍嘢   哈哈

雲呢拿雪糕朱古力軟餅 (熱果仁朱古力軟餅配雲呢拿雪糕， 忌廉，熱朱古力醬， 伴上朱古力碎) ($58) - 我嚟 Outback 原因係想食呢個甜品   真係好好味   下次嚟再食   

       

芝士蛋糕 - 餐廳送比我嘅生日蛋糕

裝一盒雞膇啫   駛唔駛咁大個紙袋呀   哈哈

( 26-FEB-2014  THU )

尋晚里奧大人手機無啦啦響   之後播生日歌   係 New Kinds On The Block 唱嘅   我第一次聽咋   原來當時係踏正 2 月 26 日嘅 12 點   呢下好有驚喜呀   哈哈   算佢啦   有啲表示 ~

8 點起身喇   去金加利食早餐   不過早餐唔好食   咖啡唔好飲囉 ~

鹹牛肉炒蛋   乾到呢

食完就番屋企   抖陣就沖涼   差唔多 9 點半就出發去海洋公園喇 ~

搭地鐵去金鐘   再搭 629   差唔多 10 點半到海洋公園   都算幾快呢 ~

我覺得對熊貓好大陸 Feel 咁

諗住落雨㗎喇   估唔到有太陽   我直頭覺得熱囉   但最勁係我仲着毛毛靴呀   而里奧大人要換短袖 Tee 添呀   佢自己帶咗黑超   但我無啦   我話佢衰呀   唔提我帶 ~

我生日就 Free   但里奧大人就要比 $320 入場   一入到去   完完全全覺得自己身處大陸   哈哈 ~ 

其實公平啲講   外國人都會無禮貌   不過大部份外國人都會守規矩   會禮讓   絕對唔會打尖   但啲大陸人真係好自私   咩都搶   咩都打尖   我係親眼見識過   又比啲細路周圍當街屙尿   我頭先一落巴士   就見到個小朋友喺街度屙尿   係個媽媽示意佢除褲屙尿添呀    大佬呀   女仔喎   妳點都要好好保護佢啦   點會叫佢咁做㗎   正常人都會叫佢忍住先   反正落條電梯已經係海洋公園嘛   點解唔快快入去海洋公園嘅洗手間呢 ?!

入場喇   都好多人   好多人唔緊要   但最慘係 95% 係大陸人   完全覺得自己又去咗長隆咁 ~

第一站去海洋奇觀   之後去大熊貓之旅睇熊貓同金絲猴   今日都幾多人   又熱喎   所以我都無咩心機影相   叫里奧大人幫我影相算喇 ~  

隻熊貓係咁索隻門

 咁又唔望人 lu

海洋公園真係好識做生意   每去完一個館就會見到 Souvenir 區   真係定力少啲都唔得   哈哈 ~ 

之後去香港老大街同埋玩環迴水世界   其實即係迴轉木馬之嘛   只不過將木馬改為海底動物   不過我都係鍾意坐木馬多啲   兒時回憶嘛 ~ 

坐 Cable Car 上山去南極奇觀睇企鵝   等咗起碼 20 分鐘先上到 Cable Car ~   

@ 南極奇觀

差唔多 1 點喇   而我都開始餓   所以食嘢先   抖陣再行 ~

食完就去坐摩天巨輪   之後再玩 "飛天鞦韆"   因為我 Plan 好要玩   如果唔玩   就真係純粹觀光   唔抵呀   哈哈 ~ 

摩天巨輪

最勁係得我一個人玩咋   里奧大人話幫我影相喎   但其實我去到又唔敢玩呀   因為覺得好似飛得好高咁   對我嚟講都算勁嘢嚟㗎   不過里奧大人話細路都玩   有咩好驚呀   仲話我黐線添呀   哈哈   咁佢咁講   我就玩啦   不過轉嘅時候一高一低都有離心力   里奧大人就負責影醜態   但我無望里奧大人呀   望住個天好啲   因為無咁似跌落嚟咁 ~  

之後去中華鱘館   大到呢   唔駛 5 分鐘就行完   初初仲諗住睇陣先影相   點知好快到出口   我哋仲以為行錯路添呀   因為無可能咁快行哂囉   咁之後去睇鯊魚同水母萬花筒喇 ~

條鯊魚個樣好懵  

@ 水母萬花筒

隻水母好似荷包蛋   所以叫里奧大人即刻影低呀

去埋熱帶雨林天地同熱帶雨林探險徑   就去玩 Game 喇 ~

其實仲有好多毒嘢   仲有唔知邊個國家嘅巨蟑螂   佢哋用可愛嚟形容巨強   路不同   真係唔識欣賞   叫里奧大人唔好影   佢仲特登影多幾張   幾衰呀 

侏狨

成隻老鼠咁   

撩狨

水豚   

知記得咩鳥   我以為係假添

去玩 "雷霆節拍"   上次嚟已經想玩   不過糟糟話驚喎   但其實只係好快速咁轉之嘛   不過衝落去果下有啲啲離心力咁啦   不過我真係唔驚囉   因為唔喺半空嘛   我同里奧大人覺得玩呢個 Game 係勁無聊   但見啲人係咁叫   我哋覺得好好笑   所以我哋都叫埋一份囉   我仲叫埋救命添呀   嚇到前面兩個人即刻望過嚟   哈哈   不過唔好講笑   落車果下真係有啲暈   同埋把聲拆咗   抵死   哈哈 ~

雷霆節拍   

呢個 Game 叫翻天覆地

睇見都腳軟   我仲叫得大聲過佢哋   哈哈

坐 "海洋列車" 落山喇   等咗一陣咋   5 分鐘內就落到山   好快㗎咋 ~   

好多時里奧大人一影相   咁我都會跟住影嘅   我二仔底嘛   咁佢影緊嘅時候   我企喺佢後少少啦   因為我無打算影嘛   之後我聽到佢講 "縮手"   我心諗   又幾堅喎   叫個大陸女人 "縮手"   而個女人真係好驚咁即刻縮手喎   妳知啦   好多大陸人真係唔會理妳家嘛   佢要影就會企喺妳面前係咁影   咁佢影完之後   我正想讚佢夠哂 Man 呀下   點知佢話以為係我隻手呀   哈哈   勁樣衰 ~   

再玩多次環迴水世界   去埋香港老大街行一陣就走 lu ~   

@ 香港老大街 - 呢日熱呀   所以見到西瓜好想食

最後一站當然係去番 "四川奇珍館" 買熊貓公仔啦   其實我一話買熊貓公仔開始   之後到咁上下   都聽到里奧大人講話 "去埋呢度咁咁咁   最後買埋熊貓公仔就走"   佢知我好鍾意   所以佢一定記入心   同埋去到每個 Souvenir 區   佢都會望下有無   如果有就即刻買呢   真係好感動呢 ~    

我今次勁呀   忍到手   因為買滿 $300 有 9 折   但熊貓公仔只係 $199   我又睇仲咗個磁石貼   但都係 $49 一個   咁點都唔夠 $300   但無理由買 3 個同款磁石貼家嘛   所以最後就咁買熊貓公仔算喇 ~

差唔多 5 點去到巴士站   諗住有 629A 直接去銅鑼灣  但原來 5 點 20 分先開頭班車   咁我哋都唔等 lu   坐番 629 去金鐘   再搭地鐵去銅鑼灣 ~

我對腳就嚟斷喇   所以我話去麥當勞坐陣   之後再去 Body Shop 買 2 支細香水就去 Outback 喇 ~

家姐 6 點 45 分到啦   即落 Order 喇   因為佢話好餓 ~

食到 8 點 45 分就走   一齊坐 619   家姐喺官塘再轉車番屋企   我哋就直接番到屋企   唔駛行好遠   所以我鍾意坐 619 多過地鐵呢 ~

番到屋企即沖涼喇   勁攰   所以 11 點瞓喇   哈哈 ~

特價 $89/支   都幾抵   家姐仲搞笑   我同佢講有 4 款味道係 $89/支   我買咗 2 支   不過我都未講完   家姐叫我買埋嗰 2 支   話送比我   但我話我唔鍾意果 2 支啲味道   所以唔買嘛    哈哈   佢梗係以為我唔捨得買呢