住家飯 @ 媽咪屋企 ( 7-FEB-2014 )

三色椒炒帶子

蒸白灼蝦

冬菇髮菜蠔豉燜排骨 - 冬菇同髮菜真係好鹹呀   我初初以為係我熱氣添   原來家姐都覺得鹹

炒黃芽白

粉葛鯪原豬橫脷湯

日本蘋果 + 火龍果

( 7-FEB-2014  FRI )

終於要番工喇   不過第一日番工係星期五   咁啲時間都過得好快嘅   番多日又放假真係唔錯 ~

早餐食奶油多   又加咗 $2   好多餐廳都會喺新年之後加價 ~

番到菇場忙呀   因為要做 Report   所以最花時間呢 ~

今日有 Lunch Box   我啲同事都覺得好出奇   呵呵 ~

忙到 4 點半   咁做完即 Send Out 個 Report 比同事啦   點知佢話做咩 sent 比佢 ?!   2 月份係 Partner 做喎   真係晴天霹靂啦   原來係白做   只怪自己睇嘢唔清楚啦   不過我覺得唔係我做就唔好 Sent 埋比我啦 ~

今晚里奧大人食 Annual Dinner   所以我番媽咪屋企食飯   好在媽咪尋日打比我咋   如果唔係我都唔記得話比媽咪知去佢屋企食飯添 ~

7 點開飯   家姐一入屋除鞋就比利是我同媽咪呀   駛唔駛咁心急呀   哈哈 ~      

家姐話上次同糟糟行 Log-on 時   家姐見到 Line 公仔   就即刻停低自己睇呀   佢話本身有個係熊大件衫寫住 Happy Birthday   但佢地話呢個得意啲   不過我都覺得拎住扎花得意啲   唔知以為佢送比情人添   哈哈

食完飯之後   家姐不停係咁食甜嘢   我話唔好再食食食啦   佢話今晚媽咪煮啲嘢好鹹   所以要不停食甜嘢喎   但今晚啲餸真係好鹹   我食慣濃味嘢都覺得鹹   上次淡今次鹹   真係出去食好過   大家都唔駛辛苦呢   正衰女包   哈哈 ~

8 點 45 分走喇   番到屋企即開機洗衫   之後就沖涼休息喇 ~

里奧大人差唔多 11 點先番到屋企   都算早喇   因為佢老闆好鍾意唱歌   前年佢就係唱幾首歌先抽獎   如是者係咁唱係咁抽   搞到好夜先喺大陸走得   不過里奧大人話今晚 6 點抽獎抽到 10 點   好在唔係又唱住抽   唔係就慘   今晚佢哋基本上係人人有獎   里奧大人都抽到 $1,000   開心開心 ~

睇多陣電視就瞓喇   都已經 11 點 45 分   我聽日要番工咋   唔係繼續睇呢 ~