食食食 ♡ 番禺長隆景區 + 珠海 + 澳門美食純玩 3 天團 DAY 3 (PART 1/2) ( 5-FEB-2014 年初六 )

( 5-FEB-2014  WED )

7 點半 Morning Call   我哋都係 7 點起身   梳洗之後就去食早餐喇 ~

天色唔多好呢

7 點 26 分已經到咗餐廳 lu

我唔敢食   我覺得啲人會將人哋無食過嘅包包   擺番上去囉

去旅行   我唔會食奶類嘅嘢㗎   但又會飲咖啡   哈哈

天氣凍凍哋   最好食皮蛋瘦肉粥啦   好綿㗎   加埋榨菜同蔥粒好好食呀   不過條香腸嘅口感好怪

唔知一陣幾時先到澳門   所以要食啲飽肚嘢頂住

里奧大人居然夠膽食芝士   呵呵

煙肉都唔係脆卜卜嘅

食完番上房   再沖埋涼都係 8 點幾   所以睇下電視啦   佢哋播緊電視劇 "愛情公寓"   又幾好睇喎 ~

終於等到 9 點半出發喇   咁我哋同另一個團坐一架巴士過關   咁另一團嘅導遊小姐話   尋晚睇新聞見拱北好多人過關去澳門   所以問我地去唔去橫琴過關   因為橫琴係小過拱北 2/3 嘅人   如果就每人比 RMB 25   叫司機車我哋過去呢 ~

咁我哋實去橫琴啦   好在全車人都係咋   如果唔係呢   司機唔會車我哋去囉 ~

仍然天陰陰

唔好落雨就得㗎喇

去到橫琴過關   都好快搞掂   不過我哋仲要坐 RMB3 巴士去澳門   等巴士就多人喇   不過見條龍都會郁   同埋啲巴士都幾密   我哋差唔多 12 點就到澳門   感恩感恩 ~

勁多人過澳門

好在啲大巴都幾密   唔係唔知要排幾耐 lu

人生第一次拖住個喼周圍行   感覺都幾得意   同埋都幾麻煩   哈哈 ~

因為無 Planning   所以就坐免費 Shuttle Bus 去威尼斯人   入到去勁多人啦   又焗   不過點都想睇下囉   嘻嘻 ~

入去喇

係靚嘅   不過好鬼焗囉   同埋我聞到煙味   所以就覺得更加辛苦呢

船伕用英文同佢地講嘢   不過佢地居然無理人   繼續自己影相   我睇到船伕個樣勁尷尬呀

本來諗住喺 Food Court 食啲嘢   不過真係好鬼焗   最後都係走呢 ~

差唔多 1 點就打的去新馬路附近   第一時間去搵食   好在有間食葡菜啫   我好想食嘛 ~

佢哋介紹食 Set Lunch

個湯唔熱

炸魚 + 蕃茄飯

我覺得似食麵粉多啲   哈哈

酸酸哋嘅豬肉同蜆   見人哋食得津津有味   我就唔識太欣賞啦   啲肉好 "鞋" 呀

熱朱古力咖啡   好味道

里奧大人最後飲凍 Mocha   我都奇怪好少會最後先叫嚟飲   原來佢話好焗   所以想飲凍嘢喎

間餐餐其實真係焗   所以飲完咖啡都好眼瞓咁囉   咁唯走走啦   點知一出去呢   成個人精神哂呀   哈哈 ~

呢間餐廳   得我同里奧大人係東方人   其他全部都係葡國人   夠地道喇啩

一出去就好清涼啦   舒服哂   其他舖頭都係食中菜

好好天氣呀   感恩感恩

今次我想去澳門原因係我勁想睇舊式嘅建築物   如果香港學澳門咁保育就好啦 ~

好多新舊建築物   而賭場就無處不在呢

新新舊舊黐埋一齊

澳門樓都唔平喎 

都已經 2 點幾喇   周圍行下咁啦

地下都好有特色

等過馬路時影㗎   個個就過馬路   我話要影相留念呀   里奧大人話要快喎   唔好阻住人

郵箱好得意呀   好似個亭   佢喺馬路中間位置   所以見到咁樣就覺得好特別

個招牌懷舊到呢

雖然睇咗天書   不過最後決定都係周圍行就算 ~

超勁多人呀   好恐怖


到新馬路喇

好有新年氣氛   我好鍾意呀

喺香港好少見到呢啲商舖喇   唔係藥房就係連鎖店

真係好有特色呢

好曬呀

相比起其他人   婆婆好似好孤單咁

好多塗鴉

靚到呢

夜晚經過都幾陰森㗎   哈哈

綠色嘅窗好靚呀

里奧大人掛住影相   我出咗公園佢都唔知呀

繼續周圍行周圍影   避開哂啲人群

我哋只係影咗個 Map   咁去大三巴時真係唔知點去   因為我哋都唔知行咗去邊   咁唯有問人啦   好在比我聽到有個女人問另一個女人尋晚番幾點   咁即係喺澳門打工啦   唔係唔會問呢啲  就係咁   我哋就聽佢指示點行去大三巴喇 ~

完全無諗過咁多人

見到大三巴喇   多人到呢   里奧大人話無心機影

我話影人仲好玩啦   唔知以為自己喺深圳


每一個角落都係大陸人

無啲公德心

個個都買嘢坐喺大三巴前面食食食

迷你郵政局

呢日未完㗎 ^^