八方雲集餃子專門店 @ 官塘 ( 31-DEC-2016 )

( 31-DEC-2016  SAT )

本來今朝約咗家姐食早餐㗎   但驚每月一到唔舒服   所以都係取消喇 ~

今朝 8 點起身   估唔到個肚唔痛喎   感恩感恩 ~

早餐食奶醬多   難得有胃口   呵呵 ~

菇場唔忙呀   但我就好鬼攰囉   勁想瞓覺 ~

放工即番屋企   坐坐下都瞓着咗   差唔多 2 點半就醒咗   即落去食嘢喇   勁肚餓 ~

食完行一陣   之後番到屋企又係睇睇下電視瞓咗   瞓到 6 點   爽呀 ~

6 點 45 分落樓食嘢   之後里奧大人自己去舖頭幫手   我就番屋企沖涼休息喇 ~

差唔多 9 點幾個肚有少少少少痛   咁一路睇電視一路等里奧大人啦   其實我知道自己已經瞓着咗   哈哈 ~

里奧大人 10 點半番到屋企   我就食藥瞓覺喇   佢就睇劇   我叫佢 12 點就叫一叫醒我啦   不過佢話數字嚟啫   無咩特別   咁預咗佢唔會叫我㗎喇   難得我熟睡   哈哈 ~

咁又好呀   一路好瞓到 2017   呵呵 ~ 

福源餐廳小廚 + 港記糖水 @ 官塘 ( 30-DEC-2016 )

菠蘿生炒骨 ($60) - 酸酸咪咪又夠鑊氣   正呀

馬拉盞炒雜菜 ($50) - 呢個麻麻哋

例湯 (免費) - 今晚係白菜豬骨湯   

@ 港記糖水
芝麻糊 (熱) ($18) - 正喎   同埋真係好熱  

綠豆涼粉 ($20) - 里奧大人食咋   話頭先食完生炒骨有啲熱氣  

( 30-DEC-2016  FRI )

今朝無咁凍喇   再多幾年   香港可能無冬天㗎喇   唉 ~

早餐食腿蛋治   依家 8 卦又會一齊食早餐   多數我幫佢叫定   最搞笑係個侍應話 8 卦前日嚟咗先   但又唔幫我叫定   不過我又唔會叫 8 卦叫定囉   反正一坐低無耐就有得食嘛 ~

菇場唔忙   可以揀相   揀相又係好大工程   因為見人行過又要 Close 個畫面   要一眼關七咁嘛   哈哈 ~

好想食熱嘢   所以 Lunch 食酸辣米線   老闆娘見到我問我係咪照舊   豬腩肉少辣   我真係食豬腩肉同豬耳咋   其他無咩興趣 ~

  
仍然 Hea 過   呵呵 ~

今日居然每月一到   唔怪得無啦啦個肚勁肚住啦   但又唔痛   其實之前幾日已經成日好眼瞓   仲以為瞓唔夠   原來如此 ~

放工即番屋企喇   熨 1 機衫又執下嘢   真係執不完咁   哈哈 ~

里奧大人 6 點 45 分放工   咁等埋佢電話就落去食嘢   諗住食 KFC   不過里奧大人怕我感冒   所以唔食   咁我再去睇其他食店啦   最後都係去番飯堂食算喇 ~

食完又食糖水   全場滿座呀   見有人食刨冰真係好正咁   不過今晚一定唔敢食啦 ~

番到屋企即開機洗衫   之後沖涼休息 ~

睇埋 "阿爺廚房" 就瞓喇   聽日要番工呢 ~       

住家飯 @ 姑奶屋企 ( 29-DEC-2016 )

煎鯪魚肉 - 我鍾意就咁鯪魚肉   但里奧大人屋企人就習慣加埋豬肉呢

薯仔餅 - 熱就好食   凍就好難頂   始終有豬肉   同埋又煎   凍食口感好怪      

蒜蓉炒豆苗 - 我真係覺得太少菜喇   唔係咁慣   下次真係要講講   哈哈 

( 29-DEC-2016  THU )

感恩都瞓得好   不過如果可以瞓耐啲就更好   哈哈 ~

早餐食芝腿治   可以慢慢咬 ~

菇場唔忙呀   但無咩 Mood 咁 ~

Lunch Time 出去譚仔食米線   之後再行陣   食飽行下真係舒服好多   哈哈 ~

又墨魚丸又米線   真係超級脹胃   下次唔敢再食喇 

仍然 Hea 過   咁揀相啦   居然仲未揀哂   暈 ~

放工走人   等埋里奧大人放工就一齊番姑奶屋企   好在佢 6 點 45 分放工咋   咁我唔駛行咁耐   呵 ~

番到去已經可以開飯 lu   其實真係唔慣啲餸凍冰冰   我接受到微暖   但凍真係好難頂   唉 ~

姑奶感冒   我就更加驚   因為我次次都好易中招   佢應該一早講啦   咁我今晚唔會嚟囉 ~

今晚放工同食飯之後都同冰冰 FB 傾偈   佢以為我好唔開心呀   因為好少呢啲時間同佢傾偈嘛   嚇親佢添   哈哈 ~

其實我無唔開心   只係要啲時間適應   同埋有啲嘢我唔想講   因為我一講   我一定唔會掩飾同修飾所講嘅嘢   但呢啲先係我真正感受嘛   但係啲人係鍾意聽自己認為啱嘅同開心嘅嘢嘛   咁我講嚟都無謂啦 ~

食埋生果就沖涼   唉   開始沾寒沾凍又頭重重啦   嗚嗚 ~    

睇下報紙又睇埋 "阿爺廚房"   11 點就入房訓喇 ~

住家飯 @ 姑奶屋企 ( 28-DEC-2016 )

豉汁蒸鯧魚 - 好細條咋   無咩肉添囉   唔怪得 $15 咁平啦
  

臘腸炒芥蘭苗 - 太少菜喇   真係唔知佢哋食得少   定我真係大食囉   我都有買開菜   我估呢度得半斤都無   我平時煮 1 斤㗎   依家 3 個人食咁少   暈  

糯米飯 - 得 1 碗仔   仲要同里奧大人 Share 食   唉

西洋菜鹹鴨腎豬骨湯 - 鹹鴨腎硬過鐵頭   但家姐煲嗰啲唔係咁喎   我仲食哂成隻添   老實講   今晚啲餸真係份量好少   好在晏晝食得飽咋   唔係一定唔夠飽        

( 28-DEC-2016  WED )

今朝得 13 度咋   真係覺得勁凍呢 ~

雖然已經星期三番工   但其實心態都係星期一番工咁   即係有啲眼瞓   哈哈 ~

早餐食蛋治   因為真係要食啲熱嘢呀 ~

菇場唔忙   爽呀 ~

諗住 Lunch Time 出去行下   但真係好凍   最後都係買車仔麵番菇場食 lu ~

仍然 Hea 過   眨下眼又放工 lu ~

放工去荷里活廣場行下   里奧大人 6 點 50 分先放工   好在可以坐住等   呵呵 ~

一齊搭車去姑奶屋企   坐低無耐就食得飯 lu ~

今晚好攰   食完飯即沖涼喇 ~

我睇電視   里奧大人睇雜誌   睇睇下我都瞓着咗   之後醒咗就睇埋 "阿爺廚房"   睇完就瞓覺 lu ~

住家飯 @ 家姐屋企 ( 27-DEC-2016 )

煎釀三寶 - 工人買嘅尖椒超級勁辣呀   連家姐都話辣   之後我食到半隻又係超級勁辣   食完條脷即麻咗呀   所以比埋家姐食   最搞笑里奧大人又要試   不過佢哋話唔辣囉   因為之前瀨咗嘢嘛   哈哈   

煎雞翼 - 工人話特登用印尼粉煎比我食㗎   不過我食咗 1 隻咋   因為食其他餸食到好飽  

大頭菜粉絲花甲 - 我覺得無咩味咁噃   

蠔油燜冬菇鴨掌 - 我之前勁想食冬菇   所以家姐即叫工人整   家姐係咁夾冬菇比我   但其實以前我麻麻哋冬菇㗎   呢年口味真係轉哂   

蒜蓉炒芥蘭 - 好味呀   

西洋菜鹹鴨腎生魚湯 - 我飲咗 3 碗   好耐無飲老火湯喇   食咗好多西洋菜   再係埋個鹹鴨腎   好味道呀  

飯後果就係人參果  + 王林蘋果   好味道  

( 27-DEC-2016  TUE )

今朝都係 10 點幾自然醒   之後去食早餐 lu ~

開始有啲凍喇   聖誕節就應該凍啦   有啲氣氛嘛   哈哈 ~

食完就番屋企熨 3 機衫   估唔到個幾鐘頭就搞掂 ~

沖埋涼就抖陣   再分類好衣櫃   不過 2 點幾都出去食下午茶喇   好餓呀 ~

食飽有氣力   再繼續分類啲衫   我覺得係好大工程   但唔分類又唔得囉 ~

5 點 15 分叫家姐車我哋去姑奶屋企   放低啲嘢就去家姐屋企 lu ~

一落車就 Feel 到勁凍   但啲風係好清爽   感覺好似行緊山頂咁   正呀 ~

咁家姐叫我出露台 Feel 下啲凍嘛   咁我番番入屋嘅時候   掛住望啲狗   一腳撞埋玻璃   Bomb 一聲   嚇死佢哋   哈哈   我仲驚啦   整爛塊玻璃就慘喇   家姐話佢已經捉住我隻手   但佢又唔係拉住我   如果唔係唔駛撞埋玻璃咁樣衰   哈哈   我話妳塊玻璃門真係好乾淨呢   呵呵 ~

姐夫 6 點半番到嚟   今晚又係 6 點 45 分開飯   其實家姐想話打邊爐   知我鍾意   不過我話前晚去阿 mi 屋企已經打咗   所以我想食住家飯   哈哈 ~

阿 mi 有件衫唔啱   我又唔啱   我話比家姐   咁諗住比番錢阿 mi   但佢點都唔要喎   咁家姐着上身真係 Fit 哂   仲話其實係咪阿 mi 特登買比佢㗎   哈哈   阿 mi 真係太客氣   又比衫又比潤唇膏比家姐 ~

食完飯又食生果   今晚我又係好開心   所以食咗好多餸   真係捧住個肚走   所以要坐多陣先可以坐車走 ~

里奧大人離遠睇到咁多生果   問家姐真定假   哈哈

家姐聖誕節抽到嘅禮物   同我 Share 食   正呀   

家姐想睇 8 點半電視劇   所以我哋 8 點鬆啲就走喇 ~

今晚真係超級凍   家姐一關車門就問駛唔駛開窗   我話唔駛啦大佬   就咁坐都凍呀   仲開窗 ~

番到屋企執埋啲手尾就沖涼喇   之後睇電視   9 點幾里奧大人食豬肉乾   我問佢係咪唔夠飽 ?!   佢話擺得太耐驚壞   我話菜又唔見妳驚壞 ?!   同埋放咗雪櫃 3 個星期之嘛   點會壞喎   人哋舖頭可能放咗一年添啦 ~

睇埋 "阿爺廚房" 就瞓喇   聽日要番工   又凍   都係早啲瞓好啲 ~

銀咖哩 @ 九龍灣 ( 26-DEC-2016 )

( 26-DEC-2016  MON )

今朝 8 點幾醒咗去廁所   咁順便開機洗衫   之後再瞓番   瞓到 10 點半都醒 lu   咁就去食早餐啦 ~

食完番屋企抖陣   原來都 11 點幾 lu   諗住行山   但都係覺得晏咗   所以最後去西貢行下算喇 ~

今日好熱呀   坐小巴又焗   所以一落車覺得勁眼瞓   哈哈 ~

問里奧大人食唔食菠蘿包   無諗過佢話食   諗住整鬼佢之嘛   不過我話我唔食㗎   估唔到佢都照食   放假果然好擦得   但難得新鮮出爐   佢又話太熱食唔到   咁行下先囉 ~

$10/個   但越整越細個囉   

居然有隻牛   唔知佢點樣行上去呢 ?!

行去大街   咁買埋雞屎滕   里奧大人知我鍾意食煙韌嘢   話不如買多份茶粿   我話唔喇   食完太飽肚   我依家真係唔會咁隨便買嘢嘛   買多咗掉又浪費   格硬食又辛苦   咪搞 ~

越行越攰   又熱喎   行到 2 點即去茶餐廳飲杯凍奶茶   唔係頂唔住要瞓㗎喇 ~

司華力腸薯條 - 條腸賣相好得人驚

星洲炒米 - 第一次見星洲炒米有咁大隻蝦   平時得急凍蝦毛仔嘛   

等咗半個鐘先有得食   仲要半個鐘頭內聞到 2 次煮燶味道   我估得一個師傅煮嘢   因為隔離枱又等咗好耐   催咗一次佢哋話整緊   咁實係咁答你啦   不過佢最後都係埋單走人呢 ~    

食完周圍行下   再行下海旁   實在太熱   行咗 20 分鐘都走人喇 ~

                          

又諗起冰姑   哈哈哈哈

今日都幾大浪   同埋見人玩獨木舟   好似唔駛用力撐   就可以飄到出海中心咁呀

有人同狗仔玩拋波波

粉紫色嘅花花好靚呀 

搭小巴去九龍灣   等車等 20 分鐘   但車程都只係 18 分鐘   哈哈   一上車都即瞓喇   無計啦   尋晚夜瞓   有得補眠就即補咯 ~

諗住睇戲   見 mega BOX 嘅 Shuttle Bus 唔駛等就即標上車啦   咁即 Check 有咩戲睇   不過無戲睇   咁諗住去麥記食新地   但無新地囉   所以即坐番 Shuttle Bus 走人喇   遊車河   哈哈 ~

去到德福就食雪糕   食完就精神好多咁喎   咁行多陣   6 點半去食嘢   食完就番屋企喇 ~

沖埋涼就食雞屎滕同睇電視   今晚好攰   真係咩都唔做要休息 Hea 呀   哈哈 ~

$13/盒其實都抵   因為有 12 粒   但我無即時食   咁夜晚番到屋企先食   無咁煙韌   但就唔係硬   下次買呢啲都係即食好啲   我要一口氣食哂啦   飽到上心口   依家怕咗佢添喇   哈哈

11 點都瞓喇   年紀大唔捱得夜   一晚夜瞓   要幾晚早瞓先補到眠呢 ~          

打邊爐 @ 阿 Mi 屋企 ( 25-DEC-2016 )

芫茜皮蛋茶瓜白蘿蔔湯底 - 好清甜呀   我一定要飲埋湯㗎   我問阿 Mi 拎隻匙更   佢以為我係用嚟撈嘢食嗰啲   我話係用嚟飲湯呀

邊爐架  

魚肚 / 海參 - 阿 Mi 屋企存貨   魚肚爽哂啲湯   好味呀   不過我唔係幾咁食咁多魚肚呢   

脆肉鯇 - 好爽脆呀   唔怪得次次見呀喂喺屋企打邊爐都要食佢啦   

水魷 - 我話要食呀   買咗 1 份大嘅   

廣島蠔 - 阿 Mi 雪櫃存貨

黑豚肉 - 又係阿 Mi 雪櫃存貨   不過好搞笑   食到最後幾啖係豬潤味   之前打邊爐無咁㗎喎

炸魚皮 - 新鮮炸起即買   所以買咗 2 包   阿喂一食呢   好似咬緊玻璃咁 "b lee ba la" 咁響呀   今次真係最脆呀 

水餃 / 雲吞 - 喺牛丸哥哥度買㗎   估唔到幾好味   下次要再買嚟食   其實我哋仲買咗墨魚卷   不過太飽   真係食唔落呢   

豆卜 / 冰菜 - 我要食豆卜呀   所以買 4 兩   不過最後都食唔哂   又留比阿 Mi   我同里奧大人第一次食冰菜   $10/半斤   但 $15/一斤   本來買半斤   但阿喂話一斤抵啲   咁我哋試下生食塊葉嘅口感   如果當沙律菜咁食就好飽肚囉   都係熟食好啲   哈哈    

白酒 - 好飲呀   不過我唔敢飲咁多   驚眼瞓   咁下半場就要早啲走人㗎喇         

芒果黑糯米 - 我拎出去嘅時候   里奧大人碌大對眼   好驚訝話玫瑰花呀     

仲有椰汁西米露做底   我飽咋   唔係想食多 2 球黑糯米   次次約去阿 Mi 屋企   一定係食 4 餐   想唔 Fat 都難

( 25-DEC-2016  SUN )

今朝 7 點 45 分起身   沖埋涼就番教會喇   諗住好多時間   所以拖慢哂手腳   差啲遲到呀 ~

崇拜完畢就搭地鐵去荃灣   約咗阿 Mi 喂去美心皇宮飲茶   全馬正式開始   開心開心 ~

我地用 Apps 拎飛   無啦啦可以一分鐘叫 20 張枱   所以我同里奧大人都按咗 3 次呀   諗住我哋最快拎到位啦   點知原來阿喂最快拎到 ~   

我無睇到幾點呀   因為今日玩足全日   幾多點對我嚟講唔重要啦   大把時間   哈哈 ~

去到酒樓見到阿喂一個   阿喂話阿 Mi 仲喺屋企執嘢   其實都唔駛點執啦   間屋勁乾淨   都唔明點解可以無塵   真係搵粒塵都難   但佢成日開窗㗎喎   真係百恩不得其解   好想喺佢屋企住一晚   第朝睇佢點樣抹嘢做家務囉 ~

咁我好驚一陣眼瞓嘛   所以諗住去茶記買杯凍啡   之後阿 Mi 話樓上有 MX   咁仲方便啦   同埋只係 $12/杯   算平呀   茶記起碼要 $16 囉 ~   

阿 Mi 超勁   一嚟到就記得幫我手機整 Google 語音   之後又教埋里奧大人   好在阿 Mi 幫我整咋   唔係真係唔識囉   佢整咗好耐喇   真係好有心機研究   搞到我都唔好意思   原來係咁麻煩嘅 ~
  
五柳炸雲吞   

龍蝦湯鮮竹卷 

最鍾意食素粉果

珍珠雞 - 阿 Mi 叫我睇啲嘢   笑死我 

荔芋鴨腳扎

鳳爪又係好味道   但里奧大人唔食㗎   所以阿 Mi 同家姐同我飲茶   一定會叫鳳爪   多謝家姐   哈哈哈哈

潮州粉果 - 好似好厚皮咁   

炸芋角 - 依家好少酒樓有炸芋角 lu

鹹魚雞粒炒飯 - 阿喂話食排骨飯 $50 唔抵   不如叫個炒飯喎   我呢排勁想食臘腸卷   同阿 Mi 講定飲茶一定要食   所以佢話轉場去美心皇宮啦   點知最後話無哂臘腸卷   嗚嗚   不過算啦   食臘腸卷好滯   一陣夜晚食唔落仲慘   哈哈      

傾下食下   時間真係過得好快   咁就到 1 點半   之後一齊去街市買餸喇   去完街市街買李祥和糯米粉就去另一個街市買餸   好在今日唔熱   呵呵 ~

里奧大人最搞笑   我哋去到邊度買嘢   佢就影下相做記錄   感覺好似一齊去緊旅行咁   哈哈 ~

2 點 15 分左右買完   即搭小巴去阿 Mi 屋企   一入屋已經有熟悉嘅感覺   好舒服呢 ~

今次終於唔駛開冷氣喇   同埋我覺得打大赤腳有啲凍凍哋添呀   所以間唔中都要搓下對腳取暖   但就唔敢着番對襪   我驚撻死   依家喺阿 Mi 屋企都可以快步行   第一次真係要慢慢行㗎   個地板立立令   就咁睇都已經覺得會好跣咁   哈哈 ~

今次又食又拎啦   阿 Mi 送咗聖誕禮物比我呀   要即場拆   呵呵   其實佢買咩比我都咁鍾意啦 ~

阿 Mi Handmade 潤唇膏   真係唔捨得用呀   同埋連家姐都有呀   愛屋及烏   家姐發達啦   哈哈

仲有里奧大人最愛嘅辛辣麵   我話一陣打邊爐開包嚟食   佢雙眼發光呀   龍眼肉就係我嘅

無耐阿喂同里奧大人就入房整淘寶集運嘢   我就陪阿 Mi 就喺廚房預備晚餐   次次都係咁   搞笑 ~

今次記得要飲咖啡喇   呵呵   齋啡好飲   雖然唔苦   但都係鍾意加番啲糖   哈哈 ~

我坐喺地下睇下個零食籃有咩嘢食   見到有盒開心果又拎嚟食   真係 8 卦又為食   哈哈 ~

因為啲開心果腍咗   阿 Mi 就話等佢自己食埋去   一大盒呀   唔脆真係好難頂喎   所以真係好鍾意佢唔浪費食物   比着我真係即掉囉 ~

阿喂叫阿 Mi 焗番熱佢   咁喺呢段時間阿 Mi 就教我整 Blog 相   唔夠 10 分鐘就搞掂   之後阿 Mi 聞到香味呀   所以即飛去廚房呢 ~

3 點 3 又 Tea 一 Tea   次次真係口不停    又係傾下食下   都唔記得傾到幾點又去廚房預備 lu ~

阿喂話想加淮鹽   阿 Mi 果然有求必應   即刻落鑊加淮鹽炒啦   不過都預咗唔會入到味    不過我食下食下   都食咗好多   唔知點解今日特別餓呀     

我陪阿 Mi 喺廚房整嘢   之後腳趾抽筋   最後都係要着番對拖鞋保暖   衰喂話我呢招好高   可以唔駛幫手做嘢呀   哈哈哈哈 ~

阿 Mi 一番到屋企就煲好啲白蘿蔔   再加埋魚片頭同魚頭   就咁已經好想食   哈哈 

6 點 45 分準時開餐   今日我講咗好多次好肚餓呀   可能今日個人好開心   我真係好期待今晚㗎 ~

差唔多食完   阿喂無啦啦自己坐梳化   原來佢話凍   梗係啦   着短袖衫   不過我同阿 Mi 就覺得有啲熱呀   因為啲蒸氣吹哂我哋嗰邊呀   所以開咗把風扇吹開啲氣囉 ~   

好喇   好似 9 點幾食完   咁當然要陪 Mi 洗埋碗先啦   今晚里奧大人提議玩 German Bridge   個個第一次玩   玩得有紋有路   但其實可能錯咗都唔知   哈哈 ~   

11 點食甜品   都估到係我鍾意食嘅甜品㗎喇 ~

食完洗埋碗再玩   估唔到 German Bridge 咁好玩   玩玩下真係會錯㗎   自己有皇牌唔出就抄人   但其實咁係輸囉   連阿 Mi 咁精明都係咁炒呀   之後阿喂幾快咁問阿 Mi 妳無牌咩 ?!   但阿 Mi 真係有牌   阿喂同里奧大人捉人就最快最叻   不過阿喂仲爆   玩玩下問番轉頭係咪跟第一隻牌   咁都算   我地問佢出幾多棟   問咗 2 次佢都唔答   咁以為佢諗緊啦   之後再問   佢居然好有氣勢想出牌   笑到我同里奧大人楝眼水呀   又無啦啦出第 5 隻牌話自己贏   笑爆肚呀   最勁係明明阿 Mi 贏   佢又拎咗阿 Mi 副牌當自己贏   真係笑到肚痛   所以我已經講明下次要再玩呀 ~

我要食香口膠醒一醒神   之後我再拎埋其他糖   估唔到全部都係薄荷   我由細到大都好鍾意食薄荷嘢   真係得呢樣嘢無變過咋   

玩多 2 個 Round 已經 1 點喇   最搞笑里奧大人以為只係 11 點   快樂不知時日過呀呢 ~

又係 Call 的士番屋企   阿 Mi 喂送我哋落樓   好在佢哋送我哋落樓咋   原來司機喺另一邊等我哋 ~

20 分鐘唔駛就番到屋企   其實司機開得好快   但就唔 Chok 呢 ~

沖埋涼都即瞓喇   好在聽日放假   呵呵 ~