大食會 @ 姑奶屋企 (大埔) ( 18-DEC-2016 )

( 18-DEC-2016  SUN )

尋晚半夜里奧大人起身睇書   佢話我鼻鼾聲好大   嘈到佢瞓唔到喎 ~

我都係買番個硬身啲嘅枕頭   次次瞓太林嘅枕頭   我啲鼻鼾聲就會超大   不過佢話係我肥   所以先咁大聲喎 ~

今朝我 9 點都醒咗   咁啱電話響   原來係姑奶打嚟   之後聽到里奧大人話 5 點到   我同里奧大人講話唔好成日咁早打嚟啦   好煩   妳早起唔代表人哋早起嘛   同埋一早已經講話 5 點到啦   駛唔駛咁早打嚟問幾點到呀 ?!

之後我懶床到 10 點鬧鐘響   諗住番教會   但沖埋涼出門口   都已經 10 點 40 分   咁番唔切番會 lu   咁好啦   食完番屋企執嘢 ~

大致上其實執好   但有啲濕碎嘢仲未清哂   咁我又執下廚房   搞掂就執好啲相   執下又睇下   所以都執咗好耐下   哈哈   之後比里奧大人睇我啲表妹細細個嘅樣   佢話有啲個樣係無變   大佬   我哋無整容嘛   哈哈 ~

家姐星期四去咗多多買曲奇餅同杏仁條比我   所以佢今日點都要比我   話想我新鮮食   咁我又比埋啲薯片朱古力比佢   順便比埋個調味架比佢   之前喺淘寶買   裝好之後原來好大個   所以無哋方擺   唯有比家姐   呵呵 ~

佢 1 點半嚟到   一見到我就話我咀唇好白   其實我好耐之前講過我唔夠血氣   所以成日咀唇白   自此之後   佢每次見我都望我咀唇先   之後唔同佢講啦   咁唔駛佢咁擔心呢 ~

佢比完嘢就講啲開心嘢我知   我哋坐喺車度傾咗半個鐘   勁開心 ~

番上屋企繼續清嘢   差唔多 3 點幾先食下午茶呀 ~

食完去搭 74X 再轉小巴去姑奶屋企   今晚里奧大人屋企做冬 ~

去到 5 點幾   佢哋傾偈   我就幫手煎下雞翼同炸春卷   企喺喺爐頭個幾鐘   真係好鬼熱   唔怪得啲廚師成日要飲啤酒降溫   哈哈 ~

諗住 6 點開餐   但搞搞下都要 6 點 45 分開餐呀 ~

里奧大人姐夫係都要我飲紅酒   話我個人好虛喎   所以今晚飲咗杯紅酒同乳酪酒   飲到臉紅紅   同埋飲完覺得好鬼凍   哈哈 ~

之後又傾下幾多點瞓覺   佢哋話有次睇電視   話越早起身就越精神   11 點幾瞓到 4 點幾就起身就最好   我話人哋係做運動又煮嘢食比小朋友先咁早起身   大佬   我當自己 5 點起身   做一個鐘頭運動都只係 6 點   沖埋涼洗埋頭 6 點半   仲有個幾鐘點用呀 ?!   要我咁早做家務 ?!   咪由朝做到晚咁 ?!   我唔得囉   之後另一個姐夫話咁有規律嘅生活   應該係平淡同無壓力生活嘅人先做到   呢方面我認同   等如里奧大人知道第日要見客   腦海根本不停喺度諗要點 Prepare   唔係話想瞓就瞓到囉   不過其實我地都應該要放鬆嘅   始終生活唔應該係咁   人生唔係因工作而活嘛 ~

食到 8 點半   我地坐 74D 出官塘   但一個鐘一班車   咁 9 點有班車   姑奶就帶我地去巴士站喇 ~

番到屋企都差唔多 10 lu   沖埋涼又睇陣電視   里奧大人想要部 Tablet 睇嘢   但搵唔到   之前一晚係我用緊    但我記得想用嘅時候   里奧大人又叫我做嘢   最後都無用到 ~

咁我好驚喇   唔知係咪掉咗   垃圾袋係白色   Tablet 個套又係白色   有時掉起嘢上嚟真係唔覺   但里奧大人話咁重   唔會掉咗嘅    之後我再諗番起果晚做過啲咩   好在我記得係一路睇電視   一路整 Recipe   之後我即開櫃桶啦   原來真係夾埋咗喺 Recipe 度   太論盡喇 ~

估唔到里奧大人又幾好脾氣喎   佢話尋晚已經想用   不過搵唔到就唔用住   佢知我係最後嗰個用   但佢又無發脾氣話我無手尾喎   如果係佢亂擺   我直頭發顛鬧佢添呀 ~

終於搵到 12 點幾先瞓   如果搵唔到   我應該瞓唔着㗎喇 ~