上海婆婆 @ 九龍灣 ( 15-DEC-2016 )

毛豆肉辣醬炒年糕 ($76) - 呢個辣辣哋好味呀   如果得我同里奧大人就唔會叫呢個餸   里奧大人唔係咁鍾意食煙韌嘢  

黃金四季豆 ($70) - 估唔到咁多鹹蛋黃   正呀     

宮保雞丁 ($78)

椰菜回鍋肉 ($72)

糖醋魚塊 ($78) 

上海粗炒 ($70)

黃金炒飯 ($72)

排骨擔擔麵 ($60)

花雕醉雞 ($76)

青花椒湯雲吞 ($48)

( 15-DEC-2016  THU )

今朝凍咗喎   雖然得 17 度   但就唔係話好凍好凍囉 ~

早餐食豬扒包   之前成日覺得食蛋好悶   依家無得食又勁想食   真係犯賤   哈哈 ~

我覺得好似對拖鞋咁   哈哈

菇場忙下停下   所以啲時間好快過 ~

Lunch Time 未餓   出去買龍眼肉   仍然係買 4 包有 85 折   原價 $46/包   折咗只係 $39/包   好開心又買到平嘢   之後再去一田同一零食店行下   原來都已經 1 點幾喇   買完諗住買粉果番菇場食   點知無哂   咁食墨丸河啦   因為個人仲係好凍咁   唉   一到冬天   菇場啲冷氣特別勁咁   真係好驚 ~

好嘢   終於可以 Hea 過喇   揀下相又傾下偈   又放工 lu ~

今晚慶祝兒生仔番新工   所以里奧大人請食飯   同埋九龍區嘅姑奶一齊去上海婆婆食飯 ~

咁我放工再去一田買包朱古力比家姐   之後再去淘大買嘢   諗住買埋怪味糖   不過無貨   再殺落去 Piago   但都無怪味糖嘅   激氣 ~

行到都差唔多 7 點   咁約里奧大人喺地鐵站   一齊行去上海婆婆度 lu ~

我依家好驚同水姑食飯   食親飯就浸浸浸   食黑糯米糖水就吐吐吐   完全令人反胃   今晚佢又叫人比多 3 隻碗同 3 杯水   又浸浸浸   另一個姑奶又浸   炒飯都浸   仲話無咁肥同埋幾好味   我忍唔住話咁妳做咩唔食白飯 ?!   話白飯無咁好味喎   黐黐哋   真係好失禮人呀 ~

之後個侍應見到佢哋浸浸浸   乸埋哂口面問點解要浸   姑奶話怕油   個侍應就擰哂頭   佢哋覺得侍應無禮貌   但其實人哋覺得妳地勁核突啦   枱面有 4 隻浸咗油嘅碗呀   同埋唔係呢一間係咁   佢去到邊度食嘢都係要人比多幾個碗同幾杯水   搞到啲侍應都黑面   因為佢係浸完幾碗水   之後又叫人再比幾個碗同水佢繼續浸   比妳都覺得煩啦   大佬   佢咁做根本完全影響人哋食慾   佢仲話唔理人點睇先衰格嘛   咁鬼驚油就咪出街食啦   講真   得妳怕油咩 ?!   我夠怕啦   咁妳第晚咪食番清淡啲囉   浸完又食   成碗係油   妳不停都係浸緊嗰碗水   咪一樣有油   所以同佢哋食飯真係影衰哂 ~

食完都 9 點   我同里奧大人去馬莎睇西褲   不過唔啱款   所以都番屋企 lu ~

我都話食完上海婆婆啲嘢係好口渴啦   里奧大人番到屋企即飲包豆奶   真係得佢哋話上海婆婆好食㗎咋 ~

沖埋涼都 10 點幾   睇埋 "阿爺廚房" 同新聞就瞓喇   今晚凍凍哋   應該好好瞓   哈哈 ~