正東胡同烤豬 @ 將軍澳 ( 11-DEC-2016 )

胡同烤豬 (一份 $188)- 好味呀   家姐今次最勁囉   因為我哋係叫例牌   唔係跟餐   點知一上碟得 8 件   家姐問係咪比錯   因為跟餐係 8 件囉   例牌係多啲   咁里奧大人叫喜力啤酒   點知侍應比咗藍妹   估唔到係家姐發現比錯囉   對一個唔飲酒嘅人發現比錯酒   真係覺得佢好勁   今晚乳豬同啤酒都上錯   真係好在家姐發現   唔係我哋一定食咗飲咗   哈哈

蘸芥辣醬都幾特別   不過我都係鍾意蘸乳豬醬多啲   哈哈  

仲有個沙律菜   咁都唔錯喎   

京蔥手切牛肉包 (2 隻) ($38) - 工人唔食豬   所以叫比佢食

二人套餐 ($438) 
滬式二前小食 - 鎮江希肉 / 美味燻魚   其實我都幾鍾意食鎮江肴肉   但里奧大人就唔食   一個人又食唔到咁多   所以今晚食到好開心呢 

北京烤填鴨 - 呢個工人就食得喇   不過佢食咗好少啦 

塊皮超薄   勁好味   但一定要襯熱食   哈哈  

惹味話梅骨 - 呢碟食咗幾粒咋   所以叫家姐打包啦

滬家小籠包

金華腿茸津白 - 呢個好味呀  

香酥小黃魚 - 食剩 1 條半   要打包呢  

原盅清燉雞湯 (2碗) - 熱辣辣最正   佢地個個都唔飲   我飲 2 碗都 OK 嘅   不過就會好快飽囉   呵呵   之後家姐見到只係雞湯   所以叫工人飲   工人又要同家姐 Share   我咪話囉   一早已經叫工人飲啦   因為無豬骨嘛

( 11-DEC-2016  SUN )

今日要等媽咪工人嚟拎嘢   所以番唔到教會 lu ~

瞓到自然醒   其實都只係 9 點半   呵呵 ~

食埋早餐就番屋企執嘢   里奧大人就去姑奶屋企整嘢 ~

媽咪工人 2 點半到喇   佢開始 Pack 嘢   4 點幾已經搞掂   咁就傾下偈啦   佢星期三都飛番印尼睇醫生   咁佢比我睇航班資料   佢個老闆真係超級賤格   居然買朝早 7 點機起飛去新加坡   即係朝早 5 點幾要到機場 Check-in   去到新加坡就 11 點   但就要留喺新加坡一晚   要星期四朝早 7 點機去印尼   咁即係要工人喺機場瞓啦   妳唔買直航都算   妳都唔好咁賤格   要人喺機場瞓一晚啦 ~

咁我驚佢無嘢食嘛   佢即刻話家姐會焗麵包比佢食   哈哈   唔怪得唔驚無嘢食啦 ~

佢每次番印尼   我哋都會比封利是佢   佢又喊   話已經唔係我哋工人   我哋對佢咁好   佢唔好意思   我話唔好咁講啦   佢咁錫媽咪   呢份情我會記在心中   而我會當佢係屋企人   總知一日喺香港   有咩事都唔駛驚   最緊要同我哋講   實幫佢解決呢 ~

最搞笑係佢話當我同家姐係佢阿媽   哈哈哈哈哈哈   我話當家姐得㗎喇 ~

里奧大人 5 點左右番到屋企   我同佢今日好勁呀   無食到 Lunch   不過我其實真係唔餓囉 ~

媽咪工人去家姐屋企瞓   咁將所有嘢拎埋去家姐屋企   咁家姐車佢番屋企   之後家姐又話同埋我哋食飯   因為姐夫同朋友食羊腩煲   家姐唔食嘛   佢又想請工人食飯呢   咁我再問里奧大人點囉   佢話一齊食好呀   因為呢排成日執執執   我都驚里奧大人話攰   如果唔係唔問佢添喇   哈哈 ~   

番咗家姐屋企先   放低羊腩煲就去新都城喇 ~

里奧大人話好餓好餓   自己去廣良興買豬肉粒食   我同家姐就去搵食   家姐話想同我食乳豬   所以去正東   佢講咗幾次話上次同朋友食乳豬   一見乳豬就諗起我喎   所以話點都要同我食喎   見豬如見人   哈哈 ~

食完就去 360 買開心果比媽咪工人   家姐知道佢爸爸鍾意食   所以又講咗幾次買一大包比佢爸爸食   難得番印尼嘛   之後工人又喊   話我哋對佢好好   佢係都話唔要   我哋一拎佢就放番低   我話係買比妳爸爸咋   咁家姐再買一大包鳥結糖同幾包朱古力比佢個仔   買咗接近 $500   家姐真係好錫佢   因為我見家姐買嘢完全唔睇價錢   總知一見大包嘅糖同朱古力呢   就話買比工人個仔   又可以同其他小朋友 Share 食   其實我都好感動   因為家姐平時買零食比自己   特價平咗 $3 已經勁開心   正價零食唔買㗎   所以我成日買零食比家姐就係咁囉 ~

買完就車我哋番屋企   咁就一日 lu ~

沖埋涼又執下嘢   差唔多 12 點先瞓 ~