麻辣手撕雞 & 梅菜扣肉飯 (外賣) + 旺菜 + 芫茜皮蛋魚片湯 ( 30-APR-2019 )

( 30-APR-2019  TUE )

感恩尋晚一覺瞓天光呀   所以今朝起身都好精神 ~

早餐食芝腿治烘底   其實唔烘底都好味   如果麵包係新鮮嘅話   哈哈 ~

菇場忙呀   好快又到 Lunch Time 了 ~

家姐送比我本簿   我又唔捨得用   但又唔想擺喺屋企   所以拎番菇場擺喇   哈哈

順便執下個文具籃   原來我開咗咁多支潤唇膏

今日唔出去喇   叮生麵王   又幾好味喎   份量少少就最好 ~

仍然忙   好在 4 點幾搞掂哂   終於可以抖抖喇 ~

放工即走   番到屋企都即滾湯   今晚叫里奧大人買手撕雞番嚟   因為我諗唔到煮咩呀 ~

里奧大人坐快車番屋企   所以 7 點可以開餐 lu ~

是日懶餐 - 麻辣手撕雞 & 梅菜扣肉飯 (外賣) + 旺菜 + 芫茜皮蛋魚片湯

麻辣手撕雞 & 梅菜扣肉飯 (外賣) - 我本來要雞腎   但里奧大人話唔好食咁多內臟   所以買半隻手撕雞   再買埋盒梅菜扣肉飯   咁我唔駛又特登煮飯   因為呢幾晚都唔會煮呀 ~ 

旺菜 - 清埋 2 個旺菜 + 1 條粟米   但粟米要留番晏啲食喇   實在太飽食唔落   哈哈 ~

芫茜皮蛋魚片湯 - 太耐無滾湯   居然唔記得買茶瓜添 ~

洗埋碗再抖 10 分鐘就出去徑步   徑 25 分鐘就番屋企   沖埋涼就食埋條粟米 ~

依家我都鍾意睇倚天   所以同里奧大人睇到 1 點先瞓呀   好在聽日放假咋 ~

韭菜餃 & 菜肉餃 (外賣) ( 29-APR-2019 )

( 29-APR-2019  MON )

尋晚半夜去完廁所   個人好似醒醒哋咁   勁驚囉   好在無耐都瞓番   但瞓得唔係咁好 ~

鬧鐘響咗都要懶床   感覺頭先好似全完無瞓咁 ~  

早餐食吞拿魚治烘底   食呢啲開胃啲 ~

菇場 3D   但我勁忙啦   仲要係一收到資料要即刻做   終於 12 點 10 分搞掂   真係要抖下   因為個腦非常之實呀 ~

諗住 Lunch 唔想出街   但頭先忙到死   所以真係要出去吸吸新鮮空氣   之後再買牛筋丸河番菇場食呢 ~

仍然忙到顛   放工前搞掂哂   但知道聽日都會有 Urgent 嘢做   咁唔緊要   唔好今晚 OT 就得喇 ~

放工即去買餸   順便買菜買粟米   又買咗 1/4 個西瓜   勁重呀   要快啲番屋企 ~

番到屋企整好哂嘢就拖地   唉   明明今日食咗消炎藥   隻手無咁痛   點知頭先拎完重嘢   隻手即刻痛番   嗚嗚嗚嗚 ~

里奧大人 7 點左右番到屋企   可以即開餐   今晚唔駛煮飯同麵實在太好   可以洗少一樣嘢嘛 ~

是日懶餐 - 韭菜餃 & 菜肉餃 (外賣)

韭菜餃 & 菜肉餃 (外賣) - $24 / 20 隻真係好抵   味道又唔錯   今次用旺菜同粟米做湯底   懶健康咁   哈哈 ~

洗埋碗都 8 點幾   今晚勁攰   所以唔徑步喇   咁開埋機洗衫就沖涼休息   里奧大人就熨 2 機衫 ~

睇多陣電視   11 點唔夠都瞓 lu ~

腐皮卷 & 齋滷味 (外賣) ( 28-APR-2019 )

( 28-APR-2019  SUN )

今朝 9 點 45 分起身   沖埋涼就出發食早餐   落到樓下   里奧大人話唔無拎銀包   又要上番去拎   如果唔係就可以搭到班車了 ~

今次早餐等咗好耐   最搞笑里奧大人話餓   我話你尋晚唔飽呀 ?!   佢話尋晚好飽呀   不過我有時會覺得   夜晚果餐好飽   第朝反而更加肚餓㗎 ~

今日講題係愛   但我覺得愛一個人真係唔簡單   我做唔到愛人如己   因為有啲人真係唔值得我愛   愛係相向嘛   同埋我真係最憎人得把口   而得把口嗰啲   其實都知道係咪真係愛妳啦   我仍都好怕呢啲人   以為講幾講咗就係   當人白痴咩   真係自我感覺太良好喇 ~

我對住唔鍾意嘅人   我唔會對佢衰   只係唔會對佢好   當佢一個路人就算   唔會將佢啲事擺喺心入面咁呢 ~

崇拜之後約咗弟兄講解關於短宣要做嘅嘢   傾咗差唔多 15 分鐘就搞掂 ~

同里奧大人去 Taste 買餸同生果   之後買埋 2 條餈飯就番屋企喇 ~

里奧大人好似皮膚又敏感咁   佢話食完嘢就沖涼   之後搽藥膏   咁一齊睇倚天嘛   睇睇下都完全唔記得搽藥膏呢回事   我突然間醒起咋   即叫佢快啲搽呀 ~

咁佢搽完就瞓覺   我就幫佢去買麵包做早餐   唔想夜晚買   硬係好似唔新鮮   雖然聽朝食都係唔新鮮㗎喇   哈哈 ~

唔知點解勁眼瞓   我 4 點 15 分瞓到 45 分   其實仲想瞓   不過我驚夜晚瞓唔到   都係睇下電視好過 ~

里奧大人仲勁   4 點瞓到 5 點半   我話 6 點半開餐   咁樣可以早啲去徑步 ~

是日懶餐 - 腐皮卷 & 齋滷味 (外賣) 

腐皮卷 & 齋滷味 (外賣) - 好耐無食喇   覺得好好味   哈哈 ~

洗埋碗就抖陣   8 點出去徑步   今晚徑 20 分鐘就算喇   因為我好攰 ~

番到屋企沖埋涼就休息   睇多陣電視   11 點都瞓喇 ~

住家飯 @ 阿 Mi 屋企 ( 27-APR-2019 )

開飯喇   樣樣都係我鍾意食   所以我要食 1 碗飯呀   呵呵

咖哩單骨雞翼都好味   最衰我掛住食乳豬   食咗半隻雞翼咋   但見阿 Mi 煎嘅時候   真係好吸引   阿 Mi 又話簡單   我覺得其實都唔簡單   因為都煎咗 15 分鐘都有   間唔中又要兜幾兜

苦瓜少豆豉鯪魚 - 好味道呀   最鍾意整到咁乾身   里奧大人第 1 樣就夾呢個餸呀

清蒸金馬頭魚 - 正呀   我自己一定唔會煮   同埋一定唔會贊豉油熟油呢

阿 Mi 買咗我最愛嘅乳豬   勁感動   同埋我覺得好似自己生日咁   哈哈

( 27-APR-2019  SAT )

今朝瞓到自然醒   但 9 點半都起咗身 lu ~

沖埋涼就出發去荃灣   10 點 15 分上小巴   感恩好快坐滿人呀 ~

好快去到荃灣   里奧大人就幫我去麥記買咖啡   我就去美心皇宮搵阿 mi 喂佢哋 ~

衰 Mi 又整鬼我   我喺出面搵唔到佢哋   又掛住搵個 Table Number   之後我盲中中入去搵佢哋   但又唔見佢哋喎   好奇怪佢哋仲未到   點知有個人撞我   仲叫我唔好睇電話   原來係衰 Mi   嗰下我都真係啤住佢   因為我唔知係佢呀   明明我差唔多去到酒樓嘅時候   我都已經係咁前後望住   佢哋成日整鬼我   點知我都係衰咗   哈哈 ~

今次要等好耐呀   但就唔轉場喇   行來行去仲嘥時間   一路傾一路等好過 ~

傾得太興奮   我完全唔知杯咖啡漏哂出來   原來個蓋唔實呀   好在阿 Mi 見到咋   我即刻出去整好去啦   里奧大人就幫我抹乾淨大堂嘅地下   咁我用環保袋拎嘢比阿 Mi   個環保袋濕咗呀   阿 Mi 話掉咗去   里奧大人最大反應話唔得㗎   Baby 最緊張個環保袋㗎   咁真係喎   個環保袋尺碼又好   又厚身係好難得家嘛   番屋企洗番乾淨就可以啦   好在咖啡無落糖同奶   唔係就麻煩了 ~

終於 11 點半先有位   大家都開始餓餓地   哈哈   今次坐大堂   可以叫點心車嘅點心 ~

客家葉仔角 - 唔好味嘅

得阿 Mi 同家姐陪我食咖哩魷魚㗎咋

春蛋燒賣

煎蝦米腸   一定唔會係我叫   因為我唔鍾意食蝦米   呵呵

阿喂要食泡飯   話時話   佢飲茶一定要食飯咁㗎噃

炸錦滷雲吞 - 好多材料呀   阿喂就麻麻哋呢個   但我同阿 Mi 就鍾意食呀

我叫芋角比阿 Mi 食   因為唔想成日只叫我哋鍾意食嘅嘢呢

食下傾下都唔知幾點   之後阿 Mi 帶我哋去 Citystore 買袋   之後佢哋就去買餸   辛苦佢哋了 ~

但里奧大人話都係唔買   始終唔係成日番大陸   好似好浪費咁 ~

咁我哋周圍行啦   因為約咗喺商場入面等   我哋唔敢走開啦   唔係一陣又搵唔番   哈哈 ~

見到偏光太陽眼鏡又去睇下   做緊特價 $338   我好想買呀   里奧大人話又買 ?!   但之後又即問老闆有無新 ?!   咁即係買比我啦   個老闆見里奧大人行去比錢   同我講話佢係好老公   因為好多人話又買   最後真係無買比老婆   哈哈 ~

但其實我上年先買完太陽眼鏡   咁里奧大人真係唔會買比我   所以我都問佢做咩又買比我嘅 ?!   佢話見我呢排好乖喎   問佢點乖 ?!   佢又只係話乖   咁即係咩呢 ?!

行行下   我叫里奧大人買定麵包聽朝做早餐   佢話好吖   之後話聽日都唔駛番工   係星期日喎   好在佢記得咋   因為呢排好多時星期日先出街   咁咪買埋囉   唔記得今日係星期六添 ~

去到阿 Mi 屋企都 3 點半   今晚晚餐唔駛咁早預備   所以一路食零食一路傾偈   勁開心 ~

杜拜茶   哈哈

我頭先買咗包芥辣杏仁同蜜糖腰果   大家一齊食先開心

好似 $85.9 有 2 包

阿 Mi 又比包手信比我   實在太客氣   始終都係要又食又拎   哈哈哈哈

阿喂同里奧大人唔知講開啲咩   之後阿喂去廚房拎盒豆奶出來   係都要叫里奧大人拎去飲   阿 Mi 即喺廚房飛出來   話你就好啦   有 1 盒   係 1 盒呀   我只可以飲 1 啖咋   笑到我哋死死下   衰喂成日蝦阿 mi ~

阿 Mi 話尋日已經睇定乳豬㗎喇   今日又見到靚豬呀   仲問師傅脆唔脆皮 ?!   最搞笑阿 Mi 講咗幾次話師傅話脆皮㗎   唔脆就下次話鬼佢   哈哈

傾下傾下又陪阿 Mi 預備晚餐   今晚 6 點半可以開餐喇 ~      

講開足球   阿喂話如果有機會去西班牙   問我地會唔會買波衫 ?!   我一定唔會啦   我未至於咁狂熱嘛  ~

咁阿 Mi 就話阿喂叫佢買波衫   之後阿喂就奸笑繼續再講   話會買對方球隊嘅波衫比阿 Mi 
去自己支持嘅球場位置坐   之後阿 Mi 比人打完   再買番自己支持嘅波衫比阿 Mi   再去對方嘅球場位置坐   因為阿 Mi 唔認識咩球隊   即係話阿喂一定買對手嘅衫比老婆着啦   我話佢貴一貴都會買   因為想個老婆比人打   哈哈 ~

好在我醒咋   我明明想食啖飯   但我知阿喂一定係整鬼阿 Mi   所以我即放低隻碗先   聽埋佢講先食飯   真係笑到我成身熱哂呀   里奧大人都話笑到流眼水   阿喂真係超級衰呀   哈哈哈哈 ~

好少食呢啲涼粉   終於感覺涼粉係苦呀   我買一盒盒嗰啲涼粉係好甜   咁即係加咗好多糖啦

阿喂話聽日放假   今晚可以夜啲   之後阿 Mi 即刻話聽日我哋要番教會呀   哈哈哈哈 ~

10 點 Call 車   一上車司機就好有禮拜叫我哋扣安全帶   落車嘅時候又叫我哋睇清楚有無漏嘢   好少司機咁好禮貌   最搞笑頭先先同阿喂佢哋傾開的士   里奧大人仲話依家好少見到有禮貌嘅的士司機添   哈哈 ~

10 點半左右就番到屋企   沖埋涼就睇陣電視   11 點幾都瞓喇 ~

樂園 Happyland @ 尖沙咀 ( 26-APR-2019 )

廚師發板
1. 牛油檸檬汁煎帶子刺身
2. 香煎加拿大特大號虎蝦
3. 黑魚子鵝肝多士
4. 烈油煮布冧
5. 鹽水煮榮螺 (冷盤)
6. 蒜片配香煎安格斯牛柳
7. 蟹捧
8. 和風雜菜沙律
9. 戀之花煙三文魚

咩都有啲

日式胡麻烤雞沙律 ($78)

意大利黑松露吞拿魚比薩 ($168)

卡邦尼扁意粉 ($138) - 師母講咗幾次話我鍾意食卡邦尼扁意粉    所以係都要叫   但其實我上次舉例叫啲咩咋   哈哈   不過都好感動   佢記得我講過卡邦尼扁意粉

烤焗西班牙黑毛豬架配薯條 ($198) - 黑毛豬好味呀   我覺得豬味唔濃   同埋好 Juicy

有隻貓貓樣

香煎帶子刺身蕃茄汁扁意粉 ($188)

香煎牛柳粒飯配秒製燒汁 ($168) - 幾乎樣樣食物都配有乾冰

醬爆雞翼 ($68)

薯蓉芝士焗西蘭花 ($68)

煙三文魚蟹籽炒飯 ($148)

我嘅夢幻樂園 (菠蘿 + 雪梨 + 奇異果 + 黑加侖) ($68) / 師母嘅笑口常香 (芒果, 橙, 蘋果 + 黑加侖) ($68) - 我同師母都覺得無咩特別   之後見到其他姊妹啲飲品   師母話我地果杯最唔靚   我話我都覺啦   我諗住我杯好有層次嘛

姊妹 K 嘅豬古力   我話要影相呀   隻雞仔好得意

姊妹 J 嘅榛子摩卡咖啡 ($68) - 我話借來影張相先   因為好得意呀

呢杯係姊妹 LW   好似幾好味咁   哈哈 

Ivy 叫嘅化學實驗品   哈哈

消費滿 $1,000 就送呢個 "怪獸蛋糕"   我睇餐牌要 $208 㗎   我哋大人細路見到勁開心呀   超級大個嘛   影咗好耐呀   影到最後一張   蠟燭都熄埋   哈哈

( 26-APR-2019  FRI )

今朝里奧大人出咗門口   無耐又入番屋   不過我無問佢係咪漏嘢呀 ~

咁我起身見到電視機個總制無熄到   仲以為自己尋晚無熄   之後諗番頭先里奧大人再入番屋   佢應該係開番電視機個總制   因為今晚出街食飯   驚錄唔到比我睇呢 (我估) ~

我習慣出門口先開手機   之後佢 Line 我話唔好熄電視   咁即係佢真係特登再番嚟開電視機嘅總制啦   真係好感動㗎   知我好鍾意睇就會記住   點都要錄到呢 ~

早餐食奶醬多   雖然唔想食甜   但覺得食佢無咁飽囉 ~

菇場 3D   不過我好忙囉 ~

Lunch Time 唔駛出街   因為 8 卦叫咗外賣   佢幫我拎埋 ~

回鍋肉飯   豬肉好鹹呀   但估唔到個汁有少少麻辣   咁又幾好味喎   幾個同事見我食飯就會覺得好奇怪   個個都問我食咩   所以似似食飯都一定要答完先可以食   哈哈

3 點幾終於忙完喇   可以 Load 相 ~

里奧大人 4 點去尖沙咀見客   見完都 5 點半   可以直接去新蒲崗同教會弟兄組食飯喇   我就同姊妹組去尖沙咀食飯呢 ~

放工去拎藥   原來都 6 點半   之後 Ivy 都到咗尖沙咀   可以一齊上去 Cafe 喇 ~

少女心即刻番哂來   嘩哈哈哈哈

Cafe 入面有 2 隻貓   呢隻肥嘟嘟好得意   但一影佢就頭 Dup Dup

終於影到佢喇

但其實佢點都唔會望鏡頭

幾不耐煩嘅樣呀   哈哈

另一隻白貓   佢喺度瞓覺

之後肥貓都入埋個籠   唔彩我哋呀   哈哈

好鍾意呢套餐具 

傾下影下   今次主要係大家分享自己嘅嘢   因為師母話平時喺小組   多數分享老公仔女屋企人嘅嘢   大家都無咩時間了解大家   籍住今次全女班   就大家一齊分享下 ~

其實咁樣真係唔錯   可以講自己嘢唔駛就住就住   所以真係好感恩我小組嘅姊妹都好好人   大家又啱傾呢下先最難得呢 ~

雖然今次聚會有啲小風波   但大家都好開心   感謝主 ~

我掛住影相   同埋今日 Lunch 又好飽   所以今晚無咩點食嘢添 ~

差唔多 11 點 10 分先走   一齊行去搭地鐵番屋企 ~

番到屋企都已經 11 點 45 分   估唔到里奧大人啱啱先沖完涼   同佢傾咗陣   差唔多 12 點 15 分先去沖涼 ~

睇多陣電視   吹乾埋頭就都即刻瞓喇   已經 12 點 45 分喇 ~