茄汁豚肉扁意粉 + 辣菜甫白菜心 ( 8-APR-2019 )

( 8-APR-2019  MON )

尋晚瞓得麻麻哋   咁今朝鬧鐘響咗   見里奧大人仲未出門口   我話你今朝遲到呀 ?!   里奧大人話比我嚇一嚇   之後話我早咗起身   依家 7 點 15 分咋   哈哈哈哈 ~

因為我星期六會早 20 分鐘起身同家姐食早餐   尋晚臨瞓先校鬧鐘   所以唔記得校番 7 點 35 分   不過我其實都瞓唔番   只係懶床到 7 點 35 分先醒 ~

早餐食芝腿治烘底   茶記多人又焗   如果唔係等埋 8 卦   我食完即走喇   焗到個人好眼瞓 ~

菇場忙呀   好在真係忙   唔係瞓着都似 ~

Lunch Time 出去打簿再行陣   再買牛筋丸河番菇場   已經 1 點喇   要快啲食了 ~

我次次都要加辣椒油   但其實咁滿係因為我加埋醋   所以茶記啲人成日話我食得好辣   哈哈

食食下覺得口感唔同   之後先發覺比錯牛丸   哈哈

仍然忙   所以好想快啲放工 ~

放工即走喇   咁仲有 2 個站落車   但我居然瞓着咗   好在無瞓過籠咋 ~

預備好晚餐就拖地   今晚里奧大人放工之後睇醫生   佢話食咗盒 Market O 之後條頸無啦啦好痕  同埋有啲粒粒   我話應該皮膚敏感   之後佢好驚啦   今朝又手痛   驚係麻疹   咁睇完醫生   佢話醫生話駛咩咁驚呀   麻疹係咁咁咁家嘛   哈哈 ~

我嗰時就真係試過德國麻疹   咁我肺癆康復之後   無啦啦就出疹   好記得嗰日仲係星期日   好在有診所開咋   同埋醫生話我好彩啦   佢有麻疹針   仲話無諗過我尾水先出疹囉 ~

咁我一路打機一路聽緊翡翠台嘅獨孤 xx   突然間聽到對白話好 Juicy   咁我好奇怪啦   點解古裝劇會講 Juicy 嘅 ?!   之後先醒起我轉咗睇 J2   哈哈 ~

本來今晚叫里奧大人搭快車番嚟   可以早啲食埋西瓜   點知都要 7 點半先開飯 ~

是日懶餐 - 茄汁豚肉扁意粉 + 辣菜甫白菜心

茄汁豚肉扁意粉 - 懶呀   順便清埋啲扁意粉   其實煮埋唔夠一碗   不過我今晚無咩胃口   所以我食一啖就夠 ~  

辣菜甫白菜心 - 尋日喺街市買架   菜婆話 $10/2 斤好抵    係咁要我買   咁我買啦   但無咩菜味嘅   下次都係堅持買 1 斤算喇   哈哈 ~

洗埋碗都即沖涼喇   睇多陣電視   11 點唔夠都瞓喇 ~