金宴酒家 @ 九龍灣 ( 31-MAY-2019 )

黃金大蝦球 ($108) - 好味喎   呢個餸係里奧大人叫㗎   佢平時一定唔會叫蝦   因為驚有蝦殼   但因為係 Ivy 生日飯   所以要叫蝦喎   搞笑

紅燒乳鴿 ($38) - 得我同 Ivy 食咋 

秘制沙薑雞 ($48/隻) - 4 個人可以叫 1 隻   雞肉唔鞋喎   同埋都好大隻   

海味上湯什菜煲 ($88) - 清清地唔錯   估唔到份量咁多

南瓜西米露   呢個非常之好味道   好香南瓜味   無諗過免費都咁好味

紅豆沙都好味呀   唔太甜又多紅豆

( 31-MAY-2019  FRI )

咁快就 5月最後一日   咁都好嘅   好過渡日如年嘛   哈哈 ~

今朝食吞拿魚治烘底   呢樣又係由細食到大都唔厭   可能我鍾意食啲醬   我鍾意他他醬㗎   但好多人都唔鍾意   因為有啲青瓜粒   我反而鍾意有啲咬口 ~

番到菇場   咁我去 Pantry 洗杯   溫總話我將保溫杯成日洗得咁乾淨會唔保暖   我話洗外面咋喎   雖然有阿姐洗杯   但都覺得表面立立哋咁   所以我點都會用洗潔精洗多次   同埋我每次開工前   都會抹電話同 Keyboard 同 Mouse 同埋電腦 Mon   再抹埋張枱   如果假期番來   係成張枱啲嘢拎起哂來抹㗎   所以啲同事成日望住我抹嘢   哈哈 ~

話咁快又 Lunch Time   出去行咗陣就買墨丸河番菇場慢慢食 ~

忙咗陣又可以抖下   最緊要放工可以即刻走 ~

去到九龍灣   等埋里奧大人就去酒樓喇   無耐 Ivy 同 Jack 都到埋   咁叫嘢食之後就傾偈 lu ~

呢排小組有啲煩嘢   好在我哋無所謂   最緊要大家開開心心 ~

呢餐係請 Ivy 同 Jack 嘅生日飯   佢兩公婆係 5 月頭同月尾生日   所以一次請埋   哈哈 ~

之後又約定下次約埋其他弟兄姊妹去佢地屋企打邊爐   我梗無問題啦 ~

原來都 9 點幾   係時候番屋企喇 ~

沖埋涼就開機洗衫   睇多陣電視   11 點瞓覺 ~

海景粥店茶餐廳 @ 九龍灣 ( 30-MAY-2019 )

菜遠牛肉炒河粉 - 好味道呀   

艇仔粥

( 30-MAY-2019  THU )

感恩一覺瞓天光   但呢排里奧大人起身   我都懶床   所以其實唔好   但我又唔想咁早起身   本來想做下家務   不過我試過一起身做家務   個人暈暈哋咁呀   可能未食嘢   哈哈 ~

今朝早咗   所以轉場食早餐   我已經慢慢食   但都食到出汗   根本無開冷氣咁 ~

菇場忙咗陣   之後又 Hea 過 ~

好眼瞓咁   所以 Lunch Time 試下瞓   點知由 12 點半瞓到 1 點 10 分   無諗過瞓咁耐   但瞓完真係精神好多呀   哈哈   之後拿拿聲食埋麥片 + Flakes 就開工喇 ~

忙下停下好快放工   番屋企抖陣先 ~

6 點半出門口   里奧大人都到咗餐廳 lu ~

食完就去九龍灣聽嘢   今晚 9 點半左右散會 ~

番到屋企即沖涼   抖多陣   10 點 45 分即瞓覺 ~   

BBQ 味薯片 ( 29-MAY-2019 )

( 29-MAY-2019  WED )

今朝又落毛毛雨   不過咁都好   唔駛咁焗熱 ~

無咩胃口   早餐食奶醬多 ~

菇場唔忙   但繼續清嘢囉 ~

Lunch Time 去買酸辣米線   今日一定要食飽啲   因為要頂到 10 點㗎 ~

4 點又有 Urgent 嘢   好在 5 點搞掂咋 ~

放工搭地鐵去 APM   咁去買麻糬比里奧大人   之後我就行 H & M   行到 6 點 45 分就差唔多上戲院   感恩里奧大人 6 點 53 分到咗   因為睇 7 點場呢   今晚睇 "復仇者聯盟 4: 終局之戰" ~

里奧大人話前 2 個鐘有啲悶   怪不得見佢打喊路啦   之後我後面個女仔又係咁講   但我又 OK 喎   因為我完全唔記得之前幾集啲劇情   哈哈 ~

7 點 04 開場   9 點 54 分散場   咁就過咗 3 個鐘 ~

第 1 次係無人行㗎   因為我第哋係第 1 個行出去   哈哈 

去埋 MUJI 睇嘢就番屋企喇   反正又唔想食嘢 ~

唔知係咪落雨關係   我覺得凍咗好多呀   我睇戲又無帶外套   凍到呢   好在無飲汽水添咋 ~

沖埋涼就休息   里奧大人 11 點幾就瞓   我就 12 點先瞓 ~

什錦餃子 + 芫茜皮蛋魚片湯 ( 28-MAY-2019 )

( 28-MAY-2019  TUE )

感恩一覺瞓天光呀   呢排真係超級攰   一定要瞓得好先有精神呢 ~   

早餐食腿蛋治   無咁熱氣   哈哈 ~

菇場唔忙   成日以為要做長命 Report   仲心諗點解咁耐都未比我   原來我記錯以為依家係月頭呀 ~

Lunch 食 Flakes + 豆奶   快快清埋就唔再食住   都係想食啲熱嘢   哈哈 ~

無啦啦又忙   好在個幾鐘就搞掂 ~

放工去牛下街市買餸   估唔到買完係無出汗   實在太好 ~

番到屋企即預備喇   太耐無煮飯   要啲時間適應   雖然都只係淥嘢   嘻嘻 ~

一路滾湯一路執下廚房啲嘢   話咁快又已經 7 點半   里奧大人差唔多番到   我都要淥餃子喇 ~

是日懶餐 - 什錦餃子 + 芫茜皮蛋魚片湯

什錦餃子 - 如果雙拚或者單款就 $24 有 20 隻   我樣樣要啲就得 19 隻   其實我次次都無數㗎   今晚就咁食餃子   我又唔想食菜   所以加 2 條粟米就算 lu ~   

芫茜皮蛋魚片湯 - 呢個湯最簡單   最緊要唔駛煎魚   咁芫茜又有益   所以得閒滾呢個湯真係唔錯呢 ~

洗埋碗都 8 點 40 分   本來想徑步   但都係唔徑喇   頭先執嘢執到一身汗   想快啲沖涼   但點都要拖埋個地先   家務呢樣嘢   做開就好想做   因為之前好忙   番到屋企只想抖呢 ~

沖完涼就開機洗衫   里奧大人就熨衫   樣樣家務都唔願做   唯獨係熨衫就最主動   佢熨衫真係好有心機   我就只係熨佢啲裇衫有心機   哈哈 ~

睇多陣電視   11 點 20 分都瞓覺 lu ~

榮基打冷小菜 @ 官塘 ( 27-MAY-2019 )

招牌牛腩河粉

五香牛什 + 招牌雲吞河粉

腐乳通菜

( 27-MAY-2019  MON )

感恩一覺瞓天光呀   今朝起身都好精神 ~

早餐食芝腿治烘底   突然間好想食鹹嘢 ~  

菇場忙呀   不過都預咗呢 ~

Lunch 食朱古力蛋糕   最搞笑里奧大人問我真定假 ?!   我話真喎   無咩胃口 ~

仍然忙呀   好快就放工 ~

呢幾日喉嚨痛   加埋今朝耳仔都痛埋   所以去睇醫生   醫生話唔係咁嚴重   我話我耳仔痛所以先嚟睇囉   我心諗唔係以為我呃病假紙呀嘛   同埋我都無諗過要病假紙囉 ~

所以佢問我要唔要病假紙 ?!   我話唔要   佢態度又好番好多喎 ~

今晚里奧大人去姑奶屋企整嘢   咁我去埋 Taste 買生果都番屋企 lu ~

番到屋企即抹哂所有嘢   好似好耐無做家務咁   呢個月真係超過忙   我真係番到屋企只係沖涼瞓覺咁   同埋差唔多一個月無煮飯   但下個月又係咁忙   所以依家都要早啲瞓   咁樣先有抵抗力   哈 ~

差唔多 8 點幾就同里奧大人食晚餐   之後都番屋企喇   本來想徑步   但落雨囉 ~

沖埋涼休息下   睇埋新聞都瞓覺喇 ~

短宣 + 永發廚房 @ 九龍灣 ( 26-MAY-2019 )

五香牛雜湯米 ($34) - 無味喎   勁

香濃芝味鮮蝦扒伊麵 ($48) - 里奧大人話無味   咁我唔食啦   之後我突然又想試下係咪無味 ?!   點知食第 1 啖已經覺得啲汁係酸   但因為我食湯米加咗醋   之後飲啖水   再食真係有酸味囉   即同個類似經理嘅人講話呢碟汁酸嘅   佢話取消張單

之後見佢無同廚房講嘢喎   因為佢拎完碟嘢就行番出來   我同里奧大人講話以後唔好再嚟呢間食店食嘢   再問里奧大人點解會食唔出係酸味 ?!   我話佢一定係由細到大都係食呢種酸叔味道嘅食物   同埋係未煮熟嘅食物   無理由咁大個人都唔識分   因為嗰時喺佢屋企食炸豬扒   幾乎每次都唔熟   救命

( 26-MAY-2019  SUN )

今朝 6 點幾比雨聲嘈醒咗   之後都瞓得唔係咁好   因為 7 點 15 分要起身   我會倒數時間   呢樣最唔好囉 ~

8 點出發去食早餐   之後收到消息去唔到聚會地方   所以臨時改為去另一個聚會地方崇拜 ~

9 點即出車   感恩準時到聚會地方   咁我哋真係純粹去崇拜   但佢哋邀請我哋牧師証道   再邀請我哋一齊唱詩歌讚美主   好在佢哋練習我有聽到咋   唔係真係唔識唱呢 ~

因為佢哋同我哋愛宴   佢哋要預備   咁我哋全部人就即刻去另一個姊妹屋企做探訪 ~

番到聚會地方   大家又一齊傾偈   我覺得短宣呢段時間   當中大家都有分享   更加認識對方   最搞笑係姊妹 W   佢問我啲嘢   我答完之後佢就話: 係喎  上次妳講咗   哈哈   但無計啦   次次喺教會傾親都匆匆忙忙   今次就可以多啲時間傾偈喇   步伐都唔駛咁快添呀   哈哈 ~

所以我依家真係好鍾意去短宣   可以事奉神同服侍人   又可以同弟兄姊妹相交   實在有太多嘅恩典呢 ~

食完飯接近 1 點   我哋要番香港喇 ~

感恩分享之後就休息   今日好焗熱   大家都出咗一身汗   所以好攰 ~

我今次真係感受到神嘅恩典   因為我星期六朝早臨時臨急帶多件短 Tee 放喺自己個袋   咁今日就可以着短袖 Tee 咋 ~

平時我一定唔會兩手準備   因為我同里奧大人只拎個大袋   如果樣樣兩手準備   個袋一定超級重呢   所以真係好感恩 ~

牧師同弟兄 ML 又係好似我咁   因為上次短宣落雨   突然間超級凍   咁我地知道呢幾日會落雨    所以個個長袖 Tee   咁牧師都好啲   有帶埋短 Tee   弟兄 ML 就要全程長袖 Tee 喇 ~

4 點左右有個 Break   個個都買嘢食   好似買手信番香港咁   哈哈 ~

感恩車程順利   5 點 20 分到落馬洲喇 ~

同牧師 + 弟兄 ML 兩公婆 + 弟兄 A & K + 姊妹 A 一齊搭火車   我哋諗住比牧師坐啦   點知有個女仔攝埋嚟坐   仲要啤咗牧師一下   真係黐鬼線 ~

之後去九龍塘轉車   講番頭先攝位單嘢   姊妹 A 都話唔知發生咩事   無啦啦攝埋嚟 ~

我地九龍灣落車   去 A1 買麵包同埋去 Circle-K 拎嘢   之後就去食晚餐喇 ~

食完都即番屋企沖涼喇   開埋機洗衫就休息 lu ~

10 點唔夠已經想瞓   不過大食打嚟又同佢咗陣   傾咗 15 分鐘真係頂唔順   我話勁攰要瞓覺   里奧大人都話我好早瞓   哈哈 ~

短宣 ( 25-MAY-2019 )

( 25-MAY-2019  SAT )

今朝里奧大人 5 點 50 分起身   到佢搞掂哂   我都起身沖涼喇 ~

感恩唔太攰   但喉嚨有啲痛囉   嗚嗚 ~

6 點 25 分出門口   去到火車站要等多 2 班車先去落馬洲   所以里奧大人話搭羅湖班車   咁坐頭等就無咁多人   舒服好多呢   始終拎多 1 個袋   唔想企囉 ~

去到落馬洲   8 點半齊人   9 點 15 分開車   感恩感恩 ~

似乎想落雨

黑咖啡唔少得   我次次都會買多 2 支   因為有 3 個弟兄姊妹鍾意飲   我哋可以 Share   反正我次次飲 1 杯仔就夠

我見里奧大人食個朱古力蛋糕食到 "呢咁 Hea"   咁我諗住 10 點幾喺車上面食家嘛   但我驚整到架車好污糟   所以去美心買個珍寶叉燒包   我見腸仔包都要九蚊雞   呢個十蚊雞㗎   好似抵食啲咁   但唔好食嘅

上到車就齊齊用詩歌讚美主   再為事工上祈禱   之後就休息 ~

話咁快就 12 點   望到個天就嚟落勁大雨了

向後望   個天仲更加黑   哈哈

12 點幾有個 Break   好在停雨咋   因為真係要鬆一鬆腰骨   咁食下小食又傾下偈   所以短宣真係好開心呢 ~

1 點 15 分到飯店   今餐餸菜超好味   可能有啲酸菜   個人特別開胃   哈哈 ~

2 點半左右到聚會地方   大家各自 Set-up   依家我喺兒童牧區幫手   牧師會做栽培   我又可以學習   實在太好了 ~

5 點 15 分左右再一齊練歌   練完就番酒店休息 ~

6 點半去飯店   一路食一路傾   弟兄 ML 話同我咃喺大陸食飯多過喺香港   話時話又真係喎   香港真係比較難夾時間   始終個個放工時間唔同   咁短宣時間就係固定   一定可以一齊食早午晚餐呀   哈哈 ~

7 點半到聚會地方 Set-up   感恩今晚好多弟兄姊姊到咗   一齊詩歌讚美主   一齊玩遊戲   一齊聽証道   真係好開心好開心   期望越嚟越多人參與啦 ~

9 點 50 分左右完畢   番到酒店沖埋涼   就一齊去牧師間房食燒嘢 ~

10 點 40 分人齊開餐   今晚只得弟兄 ML 兩公婆同埋弟兄 A + K   又係一路傾一路食   笑到肚痛 ~

講起麥當勞   佢哋好怕漢堡包入面塊酸青瓜   家姐同里奧大人又係好怕   但我非常之鍾意食喎   我會覺得食塊漢堡無咁油膩囉   雖然我唔係食得好酸   但又勁鍾意食酸瓜㗎喎 ~

次次都係臨散會先食哂啲嘢   所以個個都會話好飽   哈哈 ~

原來都 12 點   怪不得開始攰啦   所以番到房都即刻可以瞓覺喇 ~

囍雲天酒家 @ 官塘 ( 24-MAY-2019 )

魚腐魚湯浸勝瓜 ($88) - 好味呀   可能我太耐無飲湯   哈哈

燒汁野菌牛柳粒 ($98) - 好惹味   自己整到咁味道就好了

咕嚕滑雞球 ($78) - 酸酸咪咪無得輸   我覺得雞肉仲好味道

( 24-MAY-2019  FRI )

感恩一覺瞓天光   呢排周身骨痛   唔好係風濕就好了 ~

早餐食奶醬多   好味道 ~

菇場唔忙   咁就好喇   個人無咁緊張嘛 ~

Lunch 食酸辣米線   又係咁大碗嘅   已經扣底喇喎   不過今次食豬軟骨好似比較滯啲咁   下次都係叫番紅腸算喇 ~

仍然唔忙   放工即走 ~

行咗陣一田   點知喺群組傾偈   傾到唔知時間   好在里奧大人打比我話佢上咗車   咁我都即刻搭車   唔係就遲到㗎喇 ~

差唔多 7 點到姊妹 J 公司   同佢傾咗陣   8 點左右就一齊去食飯 ~

去到酒樓   咁我行最後嘛   聽到里奧大人話咁啱嘅 ?!   原來係見到弟兄 ML   我哋以為約咗小組喺度食飯呀   哈哈 ~

之後里奧大人話弟兄 ML 見到我哋   就行出來接我哋   好似真係知我哋喺度食飯咁呀 ~

傾呀傾   又已經 10 點   我哋要走喇   聽朝要好早起身呢 ~

打的番屋企   順便兜埋姊妹 J   咁我哋會安心啲 ~

沖埋涼抖咗陣   差唔多 11 點半先瞓   好在有睡意咋   因為頭先飲咗 1 杯茶   好驚瞓唔着呀 ~

永發廚房 @ 九龍灣 ( 23-MAY-2019 )

豉椒排骨炒麵 - 呢個幾好味   同埋都有啲脆麵   最好食係呢啲   哈哈

星州炒米 - 但呢個無味嘅

( 23-MAY-2019  THU )

尋晚發惡夢呀   出盡力嗌咗幾聲   嗌到自己都醒埋   不過之後又瞓番 lu   感恩又瞓得好喎 ~

早餐食吞拿魚治烘底   好想食酸咪咪嘅嘢呀 ~

菇場唔太忙   呢幾日所有大粒唔喺度   希望唔好有嘢做啦   哈哈 ~

做做下嘢有 3 字頭電話打來   咁我聽啦   原來係銀行打嚟   佢話我開咗 4 張支票   但簽名同佢哋電腦不符   咁佢講咗銀碼出來又啱   之後問我係寫比邊個 ?!   同我核對資料   叫我講生日日期同埋喺呢間銀行有幾多張信同卡   再問我戶口另一個人叫咩名   因為係聯名戶口   咁我就即問佢   你係咪 xx 打來 ?!   佢話係   咁我又答佢啦 ~

咁我答完佢   佢又唔出聲   但我就聽到打 Keyboard 聲   之後成 2 分鐘都唔出聲   我以為佢收咗線啦   我再問佢係咪仲喺度㗎 ?!   之後佢又答我話搞掂 ~

之後我又好驚喎   但諗落佢真係講啱哂 4 張支票嘅銀碼   真係好彩係教會奉獻   咁個銀碼就會係統一同埋係整數   所以我即刻記到個銀碼   如果係呃人就唔會見到啲支票家嘛 ~

最後都係穩陣啲打番去銀行問   等佢答嘅時候真係勁驚   好在佢答話真係係佢間銀行咋 ~

驚完一輪   成個身凍哂 ~

Lunch Time 出去買牛筋丸米粉番菇場食   仍然覺得好好味   哈哈 

呢兩日腳趾公好痛   又腫咗   應該係啲腳甲吉咗入肉   所以個人都無咩心機   只想快啲放工去睇醫生 ~

放工即走   Book 咗 5 點 45 分   去到即刻有得睇 ~

我同醫生講話今次嚟睇腳趾   講完我都覺得好搞笑 ~

咁同佢講話腳甲入咗肉   佢一睇就話見到腳甲   之後問我怕唔怕痛 ?!   我話怕   但痛一次好過我繼續痛   佢話夾唔到就要 "界" 一下   我即問會唔會流血㗎 ?!   佢話可能會   呢下我勁驚囉   但見佢拎工具只係 2 個夾   咁都無咁驚   應該係夾唔到先會 "界" ~

佢將我隻腳放喺佢對腳上面   我話我好重   驚唔驚整斷你隻腳 ?!   佢話唔驚   最緊要放鬆   哈哈 ~

佢揭開我隻腳趾啲肉   仲話粒腳甲好尖   再用個夾挾粒腳甲出來   真係當堂唔痛喇   再幫我搽啲藥膏就搞掂   我見到粒腳甲好似一粒小米嘅一半咁   唔好睇佢咁細 Size   但殺傷力勁大囉   痛咗我兩晚呀   所以今次三百六蚊真係抵比   哈哈 ~

搞掂哂就行住等里奧大人啦   感恩佢 6 點 40 分到九龍灣   咁我可以喺餐廳等佢嘛 ~

咁我講番醫生挾粒腳趾甲出來   之後唔痛   佢話粒腳趾甲咁細粒咋 ?!   我話唔好睇佢咁細粒   都足以影響我痛足兩晚呀   所以第時我指腳甲真係要小心啲呢 ~

食完就周圍行   咁落完扶手電梯就直行   里奧大人掛住覆訊息   差啲撞到頭   我即拉開佢   佢個樣好驚啦   行多兩步肯定撞頭   所以我即刻鬧爆佢   覆訊息你都睇下前面係乜環境先得㗎   我下次見到咁   我一定唔會拉開你   等你知道痛   就會知道要睇路囉 ~

8 點番教會聽嘢   今晚我同組員變咗棄嬰   好在佢今晚突然可以番咋   唔係得我一個仲慘   哈哈 ~

9 點 45 分走人   里奧大人又係盲中中落樓梯   我又要再鬧爆佢   我話你整親係累到我呀   我要照顧你㗎   唔該你睇下路啦   又唔係盲   點解可以唔睇路嘅呢 ?!

有次佢又係落樓梯   好在我拉實佢咋   之後整到我隻手痛   麻鬼煩   咁 Q 大個人真係睇路啦 ~

番到屋企 10 點幾   開埋機洗衫就即沖涼   睇埋新聞都要瞓覺喇 ~

T Club @ 官塘 ( 22-MAY-2019 )

鮮蜆蒜苗雞清湯 - 估唔到好鮮甜喎   又多蜆   仲以為無味添   哈哈

意大利黑醋沙律 - 份量都好多   佢哋食完之後   黑醋味仍久久不散   哈哈

黑松露野菌意大利粉 (素) (會員 $188) - 好味呀

西班牙式烤乳豬配杏桃果蓉及烤菠蘿 (會員 $168) - 佢哋一講乳豬   我即刻話要呢個餐呀   隻豬好入味

美國頂級肉眼扒 (12 安士) 配帝皇大蟹腳 (會員 $298) - 我哋要 7 成熟   但似 9 成熟呢   肉質比較 "鞋"   不過我又非常之鍾意喎   薯格都好香脆 

迷你西班牙海鮮飯 (會員 $208) - 蝦同帶子好新鮮   但個飯無咩味   

是日精選甜品   我已經好飽   所以無食 lu

@ T club

( 22-MAY-2019  WED )

今朝又涼番啲喎   最緊要唔好焗熱   之前成個星期真係焗到暈   真係好辛苦呢 ~

早餐食芝腿治烘底   突然好想食 ~

菇場忙下停下   好快又到 Lunch Time 了 ~

Berry 瞓到咁  

Lunch 食 Flakes + 乳酪   食完真係好鬼凍   要飲番杯熱茶暖暖身 ~

仍然忙下停下   不過個人有啲攰   所以好想快啲放工   哈哈 ~

今晚姊妹週   但我哋 2 組夾埋一齊食飯   勁開心呀 ~

本來想搭巴士   但都係搭地鐵穩陣啲   所以約 Ivy 九龍灣站一齊去官塘   今次我帶路啦   但其實座 Building 好易搵呢 ~

去到都係 6 點 10 分   我哋 Book 咗 6 點半   所以我哋可以揀位坐   哈哈 ~

傾到咁上下   見姊妹 TT 同 SF 都一齊到咗   姊妹 M 就 6 點 45 分到   等埋佢先一齊叫嘢食 ~

叫完嘢食就開始傾偈   乜都傾一餐先開心   所以好感恩我班弟兄姊妹又傾得又玩得   哈哈 ~

之後又講去小旅行   本來小組諗住一年一次全組旅行   但依家我地邊個就到時間就去㗎喇   但仍都會搵一個地方係個個都想去嘅   咁就留番全組一齊去呢   諗起都開心 ~

食下傾下   以為 9 點半要走   點知原來係 10 點半   咁繼續傾啦   之後一齊玩個童顏 Apps   影完出來笑到標眼淚   我直頭要按住自己個口   唔可以咁快笑出來呀 ~

姊妹 M 影一張要好耐   我話做咩咁耐嘅 ?!   原來佢見我笑   佢又係咁笑   隻手震哂影唔到呀   哈哈哈哈 ~

影咗好多張相呀   個個笑到流眼淚   要拎紙巾出來抹眼淚   我哋笑足半個鐘   真係消耗咗好多熱量呀   正呀   哈哈 ~

10 點半走人喇   各自唔同路番屋企 ~

番到屋企沖埋涼   再同里奧大人傾陣偈   12 點先瞓呀 ~