敏華冰廳 @ 九龍灣 ( 20-MAY-2019 )

黯然銷魂飯 ($60) 配熱飲 - 里奧大人想試好耐   今晚試咗   其實無咩特別   但叉燒真係幾好味嘅

  
蔥油豬扒煎雙蛋飯 ($47) - 我本來叫豬潤米粉   但佢哋話無豬潤   諗住食榨菜肉絲米   但我又覺得早餐可以食   咁里奧大人叫我食呢個豬扒飯   豬扒都 OK 嘅   但整體都係普通嘢囉   特別係啲蔥油   我覺得家姐工人整得好味過佢添呀

( 20-MAY-2019  MON )

尋晚瞓得麻麻哋   今朝起身又周身骨痛 ~

早餐食吞拿魚治烘底   茶記冷氣凍咗好多   勁舒服   因為之前有啲焗㗎 ~

菇場忙呀   好快又到 Lunch Time ~

Lunch 食酸辣米線   咁我等外賣嘅時候聽到有個男仔要走酸唔要辣   但佢係叫小鍋米線湯底   即係酸辣喎   咁點解佢唔叫清湯呢 ?!   之後我同里奧大人講呢單嘢   佢以為我講笑   哈哈 ~

仍然忙下停下   不過個人好鬼攰囉 ~

放工去一田買咖啡   之後去德福行陣等里奧大人   佢 6 點 45 分就到喇   咁去食飯先 lu ~

食完就去百老滙換熨斗   尋晚里奧大人話一路熨一路滴水呀   換完都番屋企喇 ~

頭先我話要徑步   仲好大聲同里奧大人講話任何人都唔可以阻止我   點知行行下見到好多飛蟻   勁驚囉   之後話唔徑步喇   衰奧就即番串我啦   仲大大聲聲話無人可以阻止我   我話飛蟻唔係人喎   呵呵 ~

番到屋企都即沖涼喇   其實我今日好攰   腰又痛   所以都唔徑步係好啲 ~

食埋榴槤就休息   以前唔怕燥熱   依家年紀大就真係唔講得笑囉   最慘係內熱到瞓唔到呀 ~

睇多陣電視   11 點都即瞓喇   今晚應該好好瞓   哈哈 ~