塘廈曼佧特國際大酒店 @ 東莞 (純玩天半團) DAY 1 ( 12-MAY-2019 )

( 12-MAY-2019  SUN )

今朝 9 點半起身   沖埋涼就去食早餐喇 ~

今次要食出前一丁餐喇   但一定要慢慢食慢慢咬   唔係就會超級脹胃   依家要還啦   哈哈 ~

今日係母親節   崇拜講題都有講關係父母嘅   開頭 2 分鐘片段   喊到我死死下   實在傷感 ~

崇拜完之後   就同埋 Ivy 兩公婆一齊去地鐵站等其他弟兄姊妹   因為有姊妹 LW 要侍奉   所以我哋話崇拜之後喺 Pie & Tart 等   咁順便買埋嘢食   1 點 20 分人齊出發 ~

勁開心呀   我哋一行 14 人出發去東莞玩   依家有天半團   咁樣大家可以番埋崇拜先一齊出發呢   唔錯唔錯 ~

3 點去到羅湖集合   我哋 2 點 45 分都已經到咗   但唔見領隊   因為好多時領隊都會早過我哋喺集合地點   再拎住支旗等團友家嘛   無諗過佢真係搭正 3 點先見人   仲話自己無遲到   救命   咁事實佢又真係無遲到嘅   但睇得出你份人做嘢係點囉 ~

 

今次我同里奧大人 + Ivy & Jack + 姊妹 LW 兩公婆 + 姊妹 LM 一家三口 + 姊妹 J 一家三口   如果小組齊哂人   我哋直頭可以包團去玩添呀   期待期待 ~

今次跟昇寶旅遊嘅純玩天半團 ($629/人   另強制性國內司機 + 導遊服務費天半團 $120) ~

感恩今日天氣好好呀   有陽光但唔係好曬 ~

上車無耐開始餓喇   食完就瞓咗陣 ~

我食雞批 ($12)   里奧大人就食 Muffin ($14)

咁領隊話今晚 7 點 45 分食自助餐   後面嘅團友話太夜   又話乜又物   之後又話以後唔跟呢間旅遊公司   我心諗   夜係夜啲   但我相信妳都唔係無試過咁夜食飯囉   講真   你去飲宴起碼 8 點半先食啦   唔通妳唔食就走咩 ?!

4 點半到酒店   都算快喎   大家一齊上房擺得嘢   5 分鐘後到 Lobby 出發食嘢 ~

入去喇

今次 Book 咗雙人床

間房都算大呀

今次洗手間唔同咗   上次浴缸同花灑係分開呢

房卡

又開雪櫃睇下先

感恩今日天氣又唔算好熱   但就好曬   所以里奧大人係都要我開遮   驚我中暑 ~

好大隻嘅走地雞

威尼斯係咪扮勞力士呀 ?!

一路行一路睇都唔錯

好多小食走鬼檔   不過我唔敢食

行到商場都差唔多 5 點   食埋嘢都 6 點   之後我地兵分兩路   有啲去游水   我同里奧大人 + Ivy & Jack & 姊妹 J & LM 一齊行超市   呵呵 ~

@ 田心綜合市場

無冷氣嘅食街   其實好多食店都好吸引我   但無冷氣真係令我食慾大減   哈哈

呢間價錢超級抵呀   同埋感到都乾淨   所以試下呢間

芒果乳酪好飲喎   但 RMB18 都算貴

地瓜條 (RM8) - 同弟兄姊妹 Share 就最好   新鮮炸起又好香蕃薯味   正呀

實在太熱   要再飲呢杯西柚茶

姊妹 J 食㗎   佢話係酸酸辣辣嘅味道   我話唔食濕嘢   因為好熱呀   哈哈

里奧大人就周圍影

去超市喇

女人一買嘢就最開心   已經講定一陣要買咩添呀   哈哈

一齊行超市最開心   里奧大人同 Jack 就殿後   咁姊妹 J 第 1 個買咗 Pack 山芋片   我話唔駛推車啦   買得 1 包嘢   同埋拎咗就無嘢買㗎喇   咁之後我見到尖叫   里奧大人又話買 2 支   J 又買 1 支   開始唔對路   所以里奧大人話去推架車   哈哈 ~

之後個個見到有車   就係咁買嘢   明明 2 Pack 變 3 Pack   唔想買嘅又買嚟試下咁   終於買咗好多嘢呀   好在個個帶咗環保袋咋 ~

咁大嘅超市   真係好羨慕

 好多唔同種類嘅貨品

里奧大人知我鍾意飲尖叫   想買 4 支比我   但我話咁重   買 2 支就夠喇

呢條 Short Cut 好窄喎   其實可能係我肥   唔可以打直入   哈哈哈哈

好在唔駛縮肚咋

姊妹們買得好開心

價錢都算平

買咗唔少嘢   開心開心

個個買啲嘢都係濕濕碎碎

買完都已經 7 點   要排隊比錢喇 ~

一路行一路傾   之後一齊過馬路先恐怖   條路無交通燈   加上天黑黑   感恩我哋過馬路嘅時候係無車呢 ~

每人一袋二袋

見到酒店就最開心   因為好想放低啲嘢呀

去到酒店都已經 7 點半   即刻上房擺得嘢喇   搞掂哂都 7 點 40 分   落到去餐廳就時間啱啱好 ~

自助晚餐劵

領隊居然將我哋 14 人分開   話 10 人一枱同 4 人一枱   我都忍唔住出聲話佢點安排㗎 ?!   根本係有張長枱   但唔安排比我哋 ~

最後我哋坐嘅 10 人枱   自己再加多一張枱   咁就即變為 14 人枱   咁樣先係嘛   食自助餐梗係坐埋一齊食先開心   同埋根本係有地方   點解要我哋動手安排呢 ?!

一入場就影甜品   因為好少人一開場就食甜品呢   哈哈

好想食粒蛋白餅   但真係好唔想食件蛋糕   所以最後都無拎喇

好似係咖哩牛肉   其實有都唔少嘢食   不過人太多   所以都唔想影 lu

好似係蘿蔔

本來想試炒豆角   但見到啲辣椒好似好辣咁   所以唔試喇

黃芽白 ?!

我嘅大堆頭食物   樣樣要啲咁啦   因為唔想行咁多轉   想傾偈多啲

里奧大人嘅   晚餐一定有薯條

芝士焗龍蝦仔

我仲係好想食蝦同壽司   但今次醒喇   拎 2 件壽司算喇   今次啲飯又唔腍喎

雪糕

食完凍嘢要食番啲熱嘢

Pizza 好味道

食到 10 點   我地個個即上房沖涼   再去組長房 "開會"   其實都係傾下偈玩下遊戲   哈哈 ~

個 Lobby 真係唔錯

差唔多 11 點就過去   里奧大人話眼瞓想唔去   我話一齊啦   之後佢都去   鬼咩   佢頭先食自助餐飲啤酒   所以一定想瞓   呵呵 ~

去到組長房已經差唔多齊哂人   男嘅睇波   女嘅傾偈同食零食   睇完場波就一齊玩遊戲   係兩個小朋友諗㗎   我哋點都要玩啦   最搞笑佢爸爸話唔好理佢   我哋話更係唔好啦   佢哋頭先好認真要我哋寫中文名   用來玩遊戲㗎 ~

有免費波睇真係好

圍埋一堆最開心   其實男嘅睇波   女嘅傾計同食零食   里奧大人就同 Jack 傾偈   所以影到呢張相   哈哈

食咗幾粒荔枝   因為實在太耐無食

山葯脆片幾好味

今次又係比阿 Jack 笑到我哋肚痛   全村人比佢呃哂   我哋個個大叫大笑   真係無哂氣   咁我同姊妹 J 一齊灘喺張床度睇佢哋玩遊戲   勁爽呀 ~

里奧大人就拍 Video   佢話直頭一路拍一路笑   所以成個 Video 係震哂   同埋聽到佢係咁笑   哈哈 ~

玩到 12 點 45 分都要休息喇   但我同里奧大人頭先笑到喉嚨痛呀   我真係第一次咁㗎咋 ~

今次無安排大床   我話自己瞓一張床   因為張床唔係好大   同埋床肉又高   我驚兩個迫埋一齊好熱   同埋驚跌落床呀 ~

呢日行程完畢 ^^