米線陣 @ 官塘 ( 15-MAY-2019 )

麻辣蕃茄肥牛餃子皇米線套餐 ($74)

川辣青瓜牛展粒 (細) + 1 杯飲品

手打豬肉丸 / 紫菜 / 鮮蝦雲吞米線 (麻辣蕃茄湯底)

( 15-MAY-2019  WED )

雖然一覺瞓天光   但都好攰呀   哈哈 ~

早餐食奶醬多   唔夠瞓就想食甜嘢 ~

菇場忙呀   咁又好喇   無咁眼瞓 ~

Lunch Time 去幫里奧大人拎皮鞋去整   之後去銀行入票   搞掂哂即去買魚皮餃河   條街超級焗熱呀 ~

仍然忙   今晚都遲咗一陣先放工呀 ~

去埋拎皮鞋就去買大樹菠蘿   經過麵包店又買個包比里奧大人做早餐   順便又買支雞骨草比佢   拎住一袋二袋   個天又開始想落雨   好在快快腳行到巴士站   等咗一陣就有巴士   感恩感恩 ~

番到屋企執一陣嘢又出門口   同里奧大人去米線陣食嘢   之後再去拎淘寶 ~

本想係飲紅豆冰   里奧大人食完一啖紅豆就叫我食   佢話覺得啲味唔同咗   我一食就話酸嘅   即刻叫人換杯龍眼冰   今次里奧大人醒喎   好記得同佢去食品展   佢好開心咁同我同家姐講   話嗰檔啲腰果定花生好味道   我同家姐即去試啦   但係 "益" 嘅   之後鬧鬼佢啦   "益" 都話好食   定佢好彩揀粒係無 "益" 呀 ?!   自此之後   我哋絕對唔再相信佢味覺了 ~

之前淘咗好多廚房用品   地拖都淘埋   香港買 $100   嗰次都已經想買   但食完嘢又唔記得咗件事   今次喺淘寶只係 RMB58   所以試下好唔好   反正我買把地拖都要 HK$41 嘛 ~

因為加埋成 1x Kgs   諗住分幾袋   點知佢哋 Group 埋一袋   辛苦里奧大人了 ~

番到屋企即拆箱掉箱   之後我拖埋地   我叫里奧大人沖涼先   我要執廚房啲嘢 ~

我開埋機洗衫就大清潔廁所   沖埋涼就休息 lu ~

呢兩晚太夜瞓   所以今晚 11 點唔夠大家都瞓喇 ~