尋晚瞓得都 OK 但熱醒咗兩次囉 大陸酒店啲被真係好暖 上次去短宣啲酒店又係咁 ~
8 點起身 我把聲拆哂呀 勁驚唔舒服 可能尋晚大叫又大笑 唔失聲已經偷笑 哈哈 ~
8 點半去食早餐 無諗過無位 但後尾見到姊妹 J 佢啱啱坐咗張 8 人枱 無耐後面張長枱又無人坐 我哋又可以 14 人坐埋一齊傾計喇 ~
炸饅頭 / 哈哈笑薯餅
右邊係炸榴槤卷
兩款都差唔多嘅白菜
蕃薯 / 芋頭 但咁多水嘅
我要食元氣早餐 所以青菜唔太啱我
腸粉好味道 所以分咗比里奧大人 Ivy 同 Jack 每人 1 條咁大把 哈哈哈哈
里奧大人呢碟早餐好搞笑 一定係食炸嘢 所以要食西瓜清熱
我嘅腐乳白粥
左邊呢條 係唔似油炸鬼嘅油炸鬼
我好想食嘢但唔知食咩好 所以食朱古力 Waffle 里奧大人好奇怪隻碟有幾條榨菜 ?! 我話我用來送粥㗎
我話把聲拆哂呀 姊妹 LM 即話我尋晚係咪食咗荔枝呀 ?! 又係喎 但我哋已經用鹽水浸咗啦 應該係叫得犀利 哈哈 ~
原來尋晚好多人都熱醒呀 弟兄 AL 直頭話熱到出汗 我哋冷氣已經校到 19 度 基本上真係只有凍囉 之後發覺原來熱醒嘅人係瞓埋邊 怪不得里奧大人無話熱啦 哈哈 ~
食下傾下 差唔多 10 點就上房 因為個個都未執好嘢 ~
搞掂哂都 11 點 咁啱 Ivy 打比我 話一齊落去影相 咁好吖 反正我都正想咁樣 ~
我哋每去一個地方就一定會影大合照 我哋叫做團體相 真係勁開心㗎 好難得大家啱傾之餘 又可以有時間一齊去旅行 始終大家都忙 好難就家嘛 ~
11 點半上車 不過等埋 Check 房 差唔多 11 點 45 分先出發 我覺得真係大陸先 Check 得咁認真 我去曼谷同台灣 真係 Check-out 完就直接走得㗎 ~
我哋坐呢架旅遊巴都新淨
領隊講嘢唔太多
中門有得落車就最方便
差唔多 1 點就到食店 因為今日兩餐係圍餐 所以我地就要抽簽 其中 4 個人坐另一枱 咁就最公平呢 ~
5 個月內嚟咗 3 次 每次坐嘅位置都唔同
特色木桶雞餐
白切雞 但應該唔係咁叫法
鴨 ?! 幾好味喎 因為唔羶 哈哈
酸菜腐竹豬潤煲 - 我只食酸菜腐竹 好味道
椰汁南瓜芋頭 - 正呀 我最期待呢個餸
唔知咩魚 但見到勁多骨
好似係梅菜五花腩肉
豆角炒茄子 係一個打斧頭嘅餸 哈哈
仲有香蕉薄餅 熱辣辣好味道 所以姊妹 J 個女勁鍾意食 咁里奧大人叫多碟比佢啦 好似 RMB25 不過要等 15 分鐘 我哋都無所謂啦 反正仲有半個鐘頭時間 哈哈
2 點起程去另一個景點 "百合花卉小鎮" 我同佢哋講話唔行喇 會搵個地方坐 咁姊妹 J 個女仲搞笑 都無問媽咪就跟我同里奧大人 佢超勁怕熱 所以勁鍾意我把風扇仔 咁就要黐住我囉 哈哈 ~
我之前同佢哋講咗 話無花睇㗎 唔好以為係維圓花卉展咁呢 之後佢哋唔夠 10 分鐘都嚟埋 不過坐咗陣又去一間店舖影下相 話咁快又一個鐘了 ~
夢羅麗花 哈哈哈哈
睇花到 2 點 45 分就去最後一個景點 "壹方城" 但只逗留個半鐘咋 5 點半要集合 ~
見到條龍嗎 ?!
登鄧 見到嗎 ?! 哈哈哈哈
呢個就係龍頭喇
@ 壹方城
咁我哋第一時間就去搵喜茶 真係好感恩 里奧大人排第 6 個 所以好快到 但就要等好耐 所以弟兄 ML 同 J 一齊坐喺喜茶店入面等呢 我哋就去買嘢 哈哈 ~
@ 喜茶
里奧大人負責買飲品 佢聽到弟兄姊妹落 Order 就縐哂眉頭啦 個個叫唔同飲品喎 呵呵 所以我叫佢哋唔好走開 到點單嘅時候再講啦 里奧大人真係記唔到咁多㗎 哈哈
叫咁多杯 里奧大人一定記唔到啦 呵呵
咁我哋比錢啦 里奧大人指住個男人 問睇下邊個 ?! 原來係姑奶個契女兩公婆一家 估唔到喺深圳見到囉 真係搞笑 之後再問埋呢度係咩地鐵站 想下次再嚟行下呢 因為我地只行咗 1 間店舖咋 ~
商場好大
@ Decathlon
同一款浴巾又會出現 2 個唔同名 仲要一個中一個英
小朋友對自拍神棍最感興趣 哈哈
比完錢都 5 點 原來啱啱先有得拎嘢飲咋 所以即番去喜茶集合了 ~
原來佢哋都等咗起碼半個鐘 哈哈 我哋坐咗 15 分鐘都走人喇 ~
芒果芝芝 (RMB32) - 今次同里奧大人 Share 一杯 因為一陣好快會食晚飯呢
鹹蛋黃千層吐司 (RMB24) 完全食唔出鹹多味噃
一齊去龍頭影合照 曬到呢
呢條就係龍尾喇
見到一條龍嗎 ?!
型呀 我話係咪假㗎 ?! 之後全部人話我黐線 哈哈
白鴿操控員 佢一吹雞 白鴿全部番哂來呀
5 點 40 分仲有 1 組夫婦未齊 領隊打比佢哋 佢哋話遲多 10 分鐘先到 領隊話唔等喇 已經遲咗 10 分鐘 加上全團嘅人已經到 叫佢自己打的去 無耐就見到佢哋跟住我哋後面 姊妹 J 仲話聽到佢哋話一早到咗 呃鬼咩 一話叫佢自己打的就衝上嚟啦 最憎呢啲自私人 ~
唔記得影咩添
自制安全島
里奧大人一定行最後 哈哈
@ 黃記豬肚雞
好方便
客家私房菜
見到碟豉油已經覺得勁吸引 之前喺大陸食雞 一定有呢啲豉油㗎 但唔知點解呢兩次食雞都無囉
胡椒豬肚雞煲 好勁胡椒味呀 正
其實張枱好大 但都只係坐 10 個人 所以坐得好舒服
職員好細心幫我哋 "北" 啲油出來 呢個職員真係非常之抵讚 勁有禮貌 又細心又主動 真係好難得呀
食完雞 就落其他嘢喇 始終有時間限制 真係唔可以十下十下囉
淮山 / 腐竹 / 娃娃菜
大陸嘅肉丸真係好彈牙
魚皮餃都好味道
其他配料嘅份量都好多
臘味飯 - 職員問有無人要飯焦 ?! 里奧大人話要 我都好奇怪 佢怕熱氣家嘛 原來係比我嘅
食到天黑 哈哈哈哈 呢餐好滿足呀
咁食食下我同里奧大人講話你望下個男人喺邊個 ?! 佢記得係 Uncle 呀 哈哈 我哋即出去同 Uncle 傾陣偈啦 實在太有緣啦 咁等埋 Auntie 出埋來就一齊影張相留念 真係好難得嘛 之後 Auntie 居然比埋佢手機號碼比我哋 呢樣真係無諗過 ~
佢同埋仔仔一齊去玩 佢教得個仔好好㗎 同埋個仔仔又好孝順 之後佢又同個仔介紹我哋識 話我哋兩公婆好識諗 我話表面扮㗎咋 唔好咁讚我哋啦 哈哈 ~
其實我好多時同里奧大人去旅行 都會見到熟人 今次仲咁短時間見 3 個添 所以都唔知話世界大定少呢 ~
食完飯都 7 點半 最搞笑我哋其實未食完 因為一路食一路傾 好似覺得啱啱先開始食咁 ~
我喺車度都瞓咗陣 佢哋話頭先塞車呀 ~
今晚好多人番香港呀 感恩我哋都可以入到車廂 哈哈 ~
番到屋企都 11 點 即沖涼啦 再同姊妹 J 傾一陣偈 原來都 12 點 要瞓覺喇 ~
沒有留言:
發佈留言