貓廬 @ 紅磡 ( 22-NOV-2024 )

香草煎雞扒 ($78) - 好味呀   同埋雞扒份量都好多

泡菜湯烏冬豚肉 ($83) - 里奧大人以為係泡菜湯底

( 22-NOV-2024  FRI )

感恩瞓得都唔錯   今朝里奧大人早過我起身   所以刷牙沖涼先   不過其實佢起咗身   我都醒咗   但等到鬧鐘響先起身呢 ~

同里奧大人出去食早餐   我其實係叫芝士吞拿魚治   但比錯芝蛋治   不過都無問題   我可以同里奧大人 Share 食 ~

我趕唔切班車   所以去里奧大人公司坐陣先番工喇 ~

菇場唔忙   可以做自己嘢 ~

家姐打嚟講臘味張單要點寫   講完又傾其他   傾咗 45 分鐘呀   好在西瓜唔喺度咋   因為我都唔知傾咗咁耐   嘻嘻 ~   

Lunch Time 去食鯪魚球米   之後即去一田睇嘢喇 ~

今次買得唔多   仲要咁啱齊頭 $150 就可以用 $24.9 換洗衣液   咁阿花話唔駛換洗衣液   我就即打比家姐   佢即刻話咁抵要 2 支   我話我買得 $150 咋   不過真係無咩嘢好買   所以好難換到 2 支   哈哈 ~

藍鑽石鹽焗杏仁/蜜糖杏仁 ($65/2 包) / 座山豬肉鬆脆脆米餅 ($25/2 包)

果道太郎魚柳 ($60/2 包) / ARIEL  AB抗菌洗衣液 (買滿 $150 換購價 $24.9)

買完又周圍行啦   又比我見到筍嘢   我同里奧大人講話買 1 個旅行袋   佢話妳鍾意米奇老鼠 ?!   我都忍唔住笑出嚟   我話呢個袋質地唔錯呀   同埋黑色唐老鴨更加唔鍾意囉 ~

Disney 卡通可插桿旅行袋 (一田獨家優惠價 $79   原價 $129)

喺 Circle K 買咗本小新記事簿   其實無咩用   不過好想買   哈哈

唔忙就做自己嘢啦   家姐特登打嚟話我知幫我拎咗醫生紙   因為驚要比錢   黐鬼線   哈哈 ~

放工即走   今晚同里奧大人出去食   里奧大人明明話 6 點 15 分走得   點知 6 點 45 分先放工   好在餐廳今晚唔多人咋 ~

食完就即番屋企   里奧大人晏晝番屋企開機洗衫   所以我沖埋涼就要熨 3 機衫   估唔到個幾鐘搞掂 ~

睇陣福寶   差唔多 11 點先瞓 ~

富華燒味餐廳 @ 紅磡 ( 21-NOV-2024 )

脆脆肉絲炒麵 ($50) - 個麵脆卜卜   如果下午茶嚟食就唔會咁㗎   所以我鍾意夜晚先嚟食

招牌焗鮮茄豬扒飯 ($50) - 都估到里奧大人會食呢個飯   但其實我自己都係食番肉絲麵   哈哈   不過佢哋嘅豬扒係幾好味嘅

( 21-NOV-2024   THU )

尋晚瞓得都唔錯   不過我就忍住唔去廁所   如果唔係就瞓得更好 ~

早餐食雜錦包仔   咁都都要 $21   不過原來係有啲餡嘅   咁就抵番啲   哈哈 ~

   

奶皇包 / 朱古力包 / 紫薯包 / 紅豆包   咁我食嘅時候見到有餡   我就咬一半之後比里奧大人食   食另一個又係咁   之後我話拻開咪得囉   駛咩咬咁核突喎   真係啱啱瞓醒   咩鬼都諗唔到   哈哈

今朝里奧大人陪我等車   不過叫佢陪我一陣就可以   始終落雨好麻煩呢 ~

因為落雨   我就行入商場   我鍾意周圍望㗎   如果有新店可以晏晝行下嘛   行行下有個人喺我面前停低   好鬼驚啦   原來係船頭   我無諗過喺度會見到佢嘛   尋朝仲搞笑   我洗杯嘅時候見到西瓜   我個樣係呆咗   之後佢都好似比我嚇親咁再講早晨   因為我無諗西瓜咁早喺 Pantry 出現囉   所以比唔切反應呀 ~

菇場唔忙   可以做自己嘢 ~

Lunch Time 同家姐傾咗陣電話   因為我叫佢聽日幫我拎張醫生紙   我話如果佢唔記得拎   就要比番五千幾蚊比我   之後佢話其實點解要佢比番錢   同埋關佢咩事喎   最多之後去拎番咪得囉   哈哈哈哈   佢又講得啱喎 ~

蒸完飯就出去買嘢   差唔多 12 點 20 分就番場開餐喇 ~

唔忙就做自己嘢同 Skype   咁樣就唔會悶呢 ~

我搭車個巴士站係有幾條線嘅   所以一有車就要望前面   睇下佢哋會唔會上車   今晚巴士到咗   隔離站有對夫婦想衢上車   但司機無開門   其實其他司機會開門   因為前面架巴士停咗喺度上客   但佢就等埋前面架車開咗   再喺我哋排緊隊條線開門   我覺得佢係唔想比對夫婦打尖上車   因為有次我上車   佢話我前面嗰人   下次要排除唔好打尖   同埋我有次企咗喺門口無按鐘   佢問我係咪下站落車呀   如果佢無問   我真係唔知自己無按鐘㗎   所以覺得佢好好人呀 ~

今晚同里奧大人出去食晚餐   食完就番屋企喇 ~

開埋機洗衫就即染髮   搞掂就即沖涼   抖陣就執嘢   差唔多 10 點幾先搞掂 ~

之後同家姐開單買臘味   再整呢樣嗰樣   成 11 點幾先瞓 ~

錦鹵咕嚕肉 + 魚香茄子煲 (外賣) ( 20-NOV-2024 )

錦鹵咕嚕肉 ($68) - 估唔到有兩塊錦鹵雲吞   我覺得好好味呀   因為仲係好脆呢

魚香茄子煲 (78) - 本來叫蓮藕炆腩仔   不過無哂   所以又叫番魚香茄子喇

前日買咗   今晚要食埋去 lu

( 20-NOV-2024   WED )

尋晚去咗次廁所   之後都好快瞓番   今朝 7 點 18 分都醒咗   但點都等到鬧鐘響先起身 ~

同里奧大人出去食早餐   今次覺得好好味呀   可能之前一係唔舒服   一係唔夠瞓   所以無咩胃口食   咁就咩都覺得唔好味道呢 ~

菇場唔忙   又可以 Skype 喇 ~

Lunch Time 仍然落雨   所以都唔去行 lu   反正今日有 Lunch Box ~

阿齋話見到 Uber 入公司   不過玻璃門無關到   但我話我只見到阿怪入嚟咋   所以唔知邊個無關囉   其實就算見到對門無關好   妳都要關番好啦   容乜易啲外人入嚟呀   Uber 個人都係自私㗎喇   成日斟完啲水又唔 Refill 啲水落熱水煲   西瓜已經寫張告示   叫同事記得 Refill 水   我好記得有一日   我斟咗 3 次水   但每次個水煲係無水   真係唔知邊個咁衰囉 ~

西瓜係最高層   但佢每朝都會 Refill 水煲嘅水   等我哋有得飲   所以佢有時唔喺公司   個水煲就無水   真係救命 ~

唔忙就做下自己嘢同 Skype   咁就會好快放工㗎喇 ~

今晚唔煮   所以可以買埋嘢先番屋企 ~

一入屋   覺得間屋好熱咁   所以開完窗再開冷氣   咁我正想開冷氣嘅時候   見到 Remote Contol 啲制着咗   原來里奧大人又唔記得熄冷氣   好在係校咗風啫   唔係又浪費電   真係離哂大譜   成日咁無手尾都有嘅   所以原生家庭係咁   個底都係咁   不過我依家醒喇   佢成日放完啲嘢唔擺好   之後係咁搵   試過搵咗 15 分鐘   我真係坐喺度笑㗎   我絕對唔會幫佢搵囉   呢啲人鍾意浪費時間搵嘛   其實正正常常用完就擺番好   咁下次用咪唔駛浪費時間搵囉 ~

烚完粟米就沖涼   里奧大人差唔多 7 點番到嚟   可以開餐喇 ~

抖陣就開機洗衫   之後就睇 Youtube 喇 ~

睇下睇下又 10 點半   係時候瞓覺 lu ~

蕃茄金沙骨扁意粉 + 辣菜甫蒸節瓜 ( 19-NOV-2024 )

( 19-NOV-2024  TUE )

感恩尋晚瞓得唔錯   去完廁所再瞓多陣就鬧鐘響了 ~

早餐食QQ 麻糬 + 黑岩餐包   里奧大人話一個餐包唔夠飽   所以我就再買多個包喇 ~

麻糬 QQ 只有少少麻糬   同埋係墨西哥奶酥外皮   但都幾好食   

今朝涼咗好多喎   我都要着件長身外套   里奧大人就最開心   因為佢成日要我着外套   話驚我冷親   因為佢怕凍   我怕熱   佢之前都已經着長凍裇衫   我話見到都熱呀 ~

菇場忙咗個幾鐘   咁都好   有啲嘢做下嘛

Lumch Time 蒸完飯就出去買粟米   再行到 12 點 10 分就番菇場開飯喇 ~

幾個同事見到呢幾粒嘢   都問係咪蕃茄仔   之後話我好健康   我話食唔哂先拎番公司食咋

唔忙又 Skype   咁好快就到 5 點幾㗎喇 ~

放工買埋雞骨草就番屋企   諗住里奧大人好晏放工   估唔到 6 點鬆啲就番到 ~

是日晚餐 - 蕃茄金沙骨扁意粉 + 辣菜甫蒸節瓜

蕃茄金沙骨扁意粉 - 尋日食剩嘅金沙骨   今晚煮少少扁意粉   里奧大人就有 Lunch Box 喇 ~

辣菜甫蒸節瓜 - 本身唔想加辣菜甫   但唔加就好似兩樣都係食番尋晚嘅嘢咁   哈哈 ~

洗埋碗就沖涼   之後食蕃薯   里奧大人仲搞鬼   話想食芒果涼粉   之後即去買盒涼粉番嚟   咁唔整唔得啦 ~

我覺得榴槤蕃薯   係細細隻先甜啲咁呢

我比碗涼粉比里奧大人   佢由心而發咁講唔該哂   我真係好少聽到   哈哈

又睇下 Youtube   里奧大人 10 點 15 分瞓覺   不過我都好攰   10 點 25 分都瞓覺 lu ~

蕃茄燒汁金沙骨 + 蒸節瓜 ( 18-NOV-2024 )

( 18-NOV-2024  MON )

尋晚好難先瞓得着   但感恩係一覺瞓天光 ~

早餐食黑岩餐包   唔知幾時食厭呢   哈哈 ~

又話會涼   但我行到番菇場都有汗出喎   好在我無着外套 ~

菇場忙咗陣就做自己嘢喇   難得西瓜唔喺度嘛 ~

Lunch Time 有阿齋幫我蒸飯   所以出去行陣先   行咗 25 分鐘就番去開飯喇 ~

西蘭花柄喺底再加 1 湯匙冷麵   另外一個就裝滿牛仔骨   我同事成日話我唔食飯   但我覺得中午食飯真係好滯咁囉

唔忙就 Skype   咁樣時間過得仲快   哈哈 ~

放工同阿花一齊行   咁我好鍾意捉住佢隻手講嘢   之後佢皺哂眉頭話我做咩呢排隻手咁凍   係咪又嚟好耐咩咩   我話係呀   同埋菇場真係超級凍呀   我着埋外套都覺得凍囉 ~

番到屋企即預備晚餐   里奧大人就幫手熨衫   唔駛等我下下叫先做呢 ~

是日晚餐 - 蕃茄燒汁金沙骨 + 蒸節瓜

蕃茄燒汁金沙骨 - 買咗好多金沙骨   所以要食幾晚   因為我要一次過煮呀   咁今次就加埋蕃茄洋蔥一齊煮   無咁悶呀   哈哈 ~

蒸節瓜 - 就咁食   豉油都無落㗎   但我覺得咁樣好好味呀 ~

食完就要去里奧大人公司拎嘢   我同佢講我喺度番足 7 日工   佢好奇怪我點解咁講   我話係喎   我只係呢 3 日先去你公司   我都唔知點解咁講   哈哈 ~

番到屋企即沖涼   之後就休息喇 ~

我話食芒果   里奧大人好開心話可以食芒果涼粉喎   我話你更係開心啦   又要我特登切粒粒

睇下 Youtube 又打下機   今晚 10 點 45 分就瞓覺 lu ~

醬爆牛仔骨 + 金沙骨 + 西蘭花 ( 17-NOV-2024 )

( 17-NOV-2024  SUN )

今朝起身有啲攰   但要去里奧大人公司幫手   所以點都要起身呢 ~

食完早餐就去里奧大人公司   做完嘢就陪阿妹去 Pantry 食早餐喇 ~

崇拜完畢就去買麵包   番到屋企放低之後又出發去食午餐 lu ~

食完要去里奧大人公司幫手   今日踩成日   真係有啲攰   不過都係開心嘅   哈哈 ~

差唔多 5 點幾先走   番到屋企都要即刻預備晚餐喇 ~

是日晚餐 - 醬爆牛仔骨 + 金沙骨 + 西蘭花

醬爆牛仔骨 - 好想食   所以買咗 5 條牛仔骨   咁就可以做 2 餐呢 ~

金沙骨 - 剩番大半包醬爆牛仔骨嘅汁   咁整埋去啦   估唔到又幾好味 ~   

西蘭花 - 呢期都係食深色菜   同埋唔想買 1 斤菜心   因為雪櫃無咩位放呀 ~

洗埋碗就沖涼   之後同里奧大人一齊睇中年好聲音 3   唔知係咪做完呢   因為我哋唔會睇到最尾   哈哈 ~

今晚要食 2 盒藍莓喇   真係唔想擺咁耐   我同家姐講話依家仲有 1 個澳洲芒 + 1 個呂宋芒 + 半盒藍莓   佢就仲有 6 個呂宋芒 + 1 個澳洲芒 + 2 盒藍莓 + 2 盒提子   但之後再買咗好多盒藍莓同牛油果   所以姐夫都話咁多生果食嘅   其實里奧大人都話點解晚晚有生果食   哈哈   家姐話佢今次買咗接近 $2,000 生果   我話預咗啦   咁樣買法 ~

家姐真係好無聊   間唔中就會問工人   Berry 最鍾意邊個   但工人次次都係答係我   好搞笑囉

依家又睇泰國廣告   真係幾好笑   所以睇到 11 點先瞓 ~

雞絲炒冷麵 ( 16-NOV-2024 )

( 16-NOV-2024  SAT )

感恩瞓得都唔錯   今朝瞓到 10 點先起身呀 ~

依家天氣涼涼哋好舒服   所沖埋涼先去食早餐   如果夏天就唔會   因為食完番屋企會一身汗   沖完又再沖   好攰㗎   哈哈 ~

難得唔駛番工   又要執冬天衫出嚟喇   之前求其放入袋   今日真係好認真歸類番哂所有衫褲   咁拎起上嚟都方便好多呢 ~

搞掂都差唔多 1 點   里奧大人要番工喇   我就抖下先 ~

2 點出發去買埋午餐去里奧大人公司   食完就要去 LA 事奉喇 ~

完畢就去街市買嘢   番到屋企抖陣就番崇拜 lu～

崇拜完畢就番屋企   今晚可以有時間煮飯   因為里奧大人 8 點先番到屋企 ~

是日晚餐 - 雞絲炒冷麵

雞絲炒冷麵 - 尋晚食剩半隻雞   今晚就拻成肉絲啦   買咗 1 斤冷麵嚟炒   估唔到咁多   又要剩番聽晚食 lu ~

洗埋碗再開機洗衫   之後沖涼休息喇 ~

我覺得澳洲芒係無咩味   好耐之前買過都已經覺得係咁呢

睇下 Youtube   今晚 11 點先瞓 ~

馳名蔥油田園雞 (外賣) + 脆門鱔魚皮 (外賣) ( 15-NOV-2024 )

( 15-NOV-2024  FRI )

今朝鬧鐘響咗   里奧大人叫我自己食早餐   佢瞓得唔好   所以晏啲番   咁我想瞓多 5 分鐘先起身啦   之後望下手機   原來係 7 點 05 分咋   里奧大人唔知做乜鬼校咗咁早起身   搞到我之後都瞓得唔好 ~

臨起身前記得發過嘅夢   唔記得同邊個睇劇   睇完會坐喺好似跳樓機嘅物體   如果睇 12 集就由 12 樓直衝落去   我發夢嘅時候都感受到離心力呀 ~

有個夢係叉完電無耐   但得 3%   我又要趕番工   之後坐咗好似咖啡杯啲車去番工   咁去完洗手間   同事變咗傻婆   好鬼驚 ~

最後個夢係我整爛家姐件線衫   間舖頭叫我打佢電話就知商舖號碼   里奧大人即打   真係即刻有顯示到舖頭夠   但呢間商場有幾間補衫嘅舖頭   里奧大人話呢間可能好貴   我話睇佢補得幾好所以搵佢   咁搞掂就去拎衫   點知鬧鐘響   如果唔係里奧大人教錯鬧鐘   我應該知道件衫補得好唔好啦   哈哈 ~

去番屋企附近食早餐   今日只飲咗 2/3 杯咖啡咋   再飲一啖覺得已經好反胃   瞓得唔好就會咁 ~

菇場唔忙   咁好喇   可以有時間睇下買啲咩   哈哈 ~

Lunch Time 出去一田   家姐想買洗手液   咁我一定幫佢買啦   所以同埋船頭 阿花一齊行   到咗一田再分頭行事   之後再一齊去比錢 ~

本身諗住潔手液就走   之後見到阿花佢哋買好多嘢   咁我又睇下有無嘢買先

滴露滋潤蘆薈泡沬潔手液 ($30/2 件) - 家姐話買 4 支   我買夠 6 支比佢

味滋康金麻醬粗粒 ($36/2 件) - 同家姐 Share

日匠本物海鮮米餅 ($35) & 大洋牌蒜辣魚肉腸 ($19.9/2 件) - 見佢哋買   我又買

熊本熊熊本縣白蛋 ($39/2 件) - 阿花話好食   咁就買喇

比完錢先發覺原來已經 12 點 35 分   咁本身話食八芳   阿花知我食唔哂   我話食唔哂拎走   佢話唔好啦   食車仔麵   不過我哋總共 4 袋嘢唔會堂食   咁我話我買燒賣粉果算喇   佢哋就去買第啲嘢食番菇場 ~

船頭整㗎   好好味呀   有隻仲好辣添呀   佢係買鮫魚拆肉再打   佢又係煮嘢食高手   之前整麵包又係好好味呢

咁我幫阿花加 $25 買洗衣液   佢比我 $50   我話收 $20 得啦   但我居然係找番 $20 比佢   之後佢無啦啦又再比 $5 話齊頭   我定一定話妳比咗 $35 呀   哈哈哈哈   所以我同佢有時買嘢   成日都計錯數囉   笑死 ~

我比 2 條辣魚肉腸比阿花   佢又比番魚片我   我話唔要咁多啦   佢叫我收聲   之後我話唔得喎   失聲試過無得出聲好慘   呵呵

唔忙就 Skype   今日全日好似喺屋企咁 Free 咁   哈哈 ~

放工去買晚餐   買完就番屋企

里奧大人話 6 點 25 分放工   點知 6 點 55 分先放工   我叫佢食快啲呀   因為搞到我做嘢要推遲半個鐘 ~

是日晚餐 - 馳名蔥油田園雞 (外賣) + 脆門鱔魚皮 (外賣)

馳名蔥油田園雞 (外賣) - 今晚食半隻雞就夠   留番半隻聽晚食呢 ~

脆門鱔魚皮 (外賣) - 好想食   但又係食 3 日   因為里奧大人話驚熱氣唔陪我食呀 ~

洗埋碗就開機洗衫   之後即沖涼喇 ~

睇埋 "沖遊泰國" 就熨衫   再睇陣 Youtube 同打陣機   今晚 10 點半都瞓覺 lu ~   

橋鍋居 @ 紅磡 ( 14-NOV-2024 )

金菇牛肉卷拚吉列炸蝦 ($68) - 我最鍾意食呢兩個餸

叉燒煎蛋餅拚炸腐皮蝦卷 ($68) - 里奧大人仍然食番呢兩個餸

( 14-NOV-2024  THU )

尋晚雖然瞓唔錯   但間唔中比自己鼻鼾嘈醒呀 ~

今朝唔知幾點嘅時候   里奧大人話 10 點 20 分先改發 3 號風球   可以瞓到自然醒 ~

我哋瞓到 9 點 35 分自然醒   其實我都校定 10 點鬧鐘   始終一陣要番工   都係穩陣啲好 ~

之後再見到家姐喺群組比信息話 10 點 20 分改發 3 號   佢話好驚我哋唔知醒起身   哈哈 ~

早餐仍然食紅豆吐司   搽花生醬真係好味啲 ~

抖陣就沖涼   之後再開機洗衫   晾完衫就即出門口   買埋午餐就去里奧大人公司一齊食喇 ~

依家鍾意食泰式濕炒豬肉河   同埋今次一定要 Share 食啦   因為食完早餐無耐嘛   哈哈

食完就即番工喇   阿花 12 點 23 分 Whatsapp 我話一半人已經番咗   佢都係啱啱番到   好在我已經喺九龍城咋   其實 1 點番到去都無問題   因為 12 點 20 分仍然係 Lunch Hour 呢 ~

番到菇場   得小 A 同阿渠未番   好在最遲唔係我咋 ~

唔忙就做自己嘢啦   之後又 Skype   所以真係好快又放工咁   哈哈 ~

放工要同里奧大人去搞啲嘢   之後先去食晚餐 ~

食完即番屋企   沖埋涼就休息休息 ~

呂宋芒真係最好味   又甜又香   不過我唔識揀囉

仍然睇 "沖遊泰國"   之後睇陣 Youtube   今晚 10 點 50 分先瞓覺 ~