韓樂 @ 旺角 ( 13-NOV-2024 )

辣八爪魚炒野菜年糕 ($66) - 年糕都煙韌   八爪魚無味   基本上係成碟都無味   我話我煮仲好味過佢哋   家姐話我好勁呀   我話加韓國辣椒醬炒之嘛   我煮到就唔係勁啦

韓風香酥炸雞 ($38) - 我同家姐唔鍾意呢啲咁嘅炸雞   因為張相影出嚟係唔同   比佢呃咗   哈哈 

菠菜 (加配 $12) - 有啲醋調味   我哋覺得好味道

( 13-NOV-2024  WED )

感恩又一覺瞓天光呀   不過今次又係差唔多天光就醒醒哋   但我會等到鬧鐘響先起身呢 ~

早餐食紅豆吐司   今次搽花生醬   咁樣里奧大人又覺得無咁寡 ~

里奧大人陪我等車   之後又見到阿妹   落雨個個擔遮   唔係佢行過嚟   我都見佢唔到呀   哈哈 ~

菇場唔忙   咁就 Skype 啦 ~

Lunch Time 都唔落去喇   唔想行行下落雨   阿齋好搞笑   話唔好出去啦   喺度坐下好過啦   講到我好似啲外人坐喺公司等咁   哈哈 ~

今日都係有 Lunch Box   唔出去真係多咗好多時間食咁呀 ~

仲有 3 盒要食   好在我都鍾意食藍莓咋

唔忙就繼續 Skype 啦   里奧大人今日去送機   所以我就約家姐食飯喇 ~

放工搭地鐵去旺角   諗住買麵包比家姐   點知手機聽唔到聲音   我真係勁驚係壞咗   打比里奧大人又係咁   聽 Whatsapp 又唔得   後尾我熄咗藍牙就無問題   之後家姐問係咪 Headphone 無熄到藍牙 ?!   原來我真係無熄   我都有印象上次聽完歌只係熄手機藍牙   真係太論盡喇 ~

6 點 10 分去到新世紀廣場   估唔到 Moko 都唔少人行喎   咁去壽司郎等位啦   又係好多人   本身家姐話去千兩   但我話要食平民壽司   哈哈 ~

家姐 6 點半到都仲未有位   所以都係轉場喇 ~

咁我唔想食牛扒同上海菜   家姐話去阿莊平時去食間韓國餐廳   我話都好喎 ~

食到 7 點 45 分都走喇   我哋話呢間食物真係麻麻哋   家姐話阿莊多數係食飯同麵話幾好食   不過呢間唔會再去食㗎喇   哈哈 ~

食完就去行花園街   家姐就去整嘢 ~

依家好多日用品都係用熊貓公仔   以前真係會買   依家就唔會咁 lu

估唔到無收穫   諗住買件 $50 黑色短身外套   但我其實已然有件長身   所以最後都忍手唔買   好唔慣兩手空空呀 ~

8 點幾就收哂檔咁滯   係咪以前都係咁呢 ?!

搭小巴番屋企   等咗好耐   之後收到公司群組訊息   話 11 點 20 分掛 8 號風球   無諗過咁突然喎 ~

見到架小巴嚟緊好開心啦   點知家姐打嚟問我喺邊 ?!   想有嘢比我   咁我話我去搵佢啦   真係好在佢早十幾秒打嚟   唔係我就上咗車㗎喇 ~

搞掂就同家姐一齊搭地鐵番屋企   我依家真係好少平日夜晚出街   我覺得地鐵都多人   究竟係打風定係平時都係咁 ?!   家姐話係打風關係喎 ~

9 點 45 分番到屋企   里奧大人以為我買到唔知時間呀   哈哈 ~

沖埋涼就睇下 Youtube   今晚 11 點 15 分先瞓 ~