蕃茄肉碎扁意粉 + 蒸節瓜 + 脆門鱔魚皮 (外賣) ( 11-NOV-2024 )

( 11-NOV-2024  MON )

尋晚瞓得都一般   今朝鬧鐘響都再校到 7 點 55 分起身   不過最後都係瞓唔到   所以起身 lu ~

早餐食爆漿餐包   估唔到又幾好味喎   個餡有啲椰蓉   好似食緊雞尾包咁 ~

今朝班車晏咗   所以可以食完就靈修 10 分鐘呢 ~

落車收到家姐電話   佢問我今晚去邊 ?!   我話唔係特登拎番啲朱古力比我嘛 ?!   佢話比朱古力更緊要   因為佢買咗日本晴王提子比我   想今晚交收   我話無問題啦   今晚都唔會出街 ~

菇場忙咗陣就做自己嘢   唔錯唔錯 ~

Lunch Time 蒸完飯就去買粟米同炸魚皮   之後再周圍行下就番菇場 lu ~

呢包炸魚皮要 $35   我覺得貴呀   但今晚見到家姐   想同佢 Share 食呀   同埋大家都啱啱好番   唔敢食咁多呀

阿齋問我有無買麵包 ?!   我話食薯仔都好飽喇   之後阿花就問就有無再帶飯 ?!   我話其實食薯仔真係好飽   哈哈 ~

裝得滿得滯   搞到個蓋都污糟埋   好在無油咋   唔係要拆出嚟洗

唔忙又做自己嘢   再望個鐘又已經 5 點幾   好快就放工喇 ~

我頭先 Whatsapp 家姐話記得今晚喺紅磡等   家姐放工即打嚟話唔係鑽石山咩 ?!   我話係喎   打錯咗添   哈哈哈哈   因為家姐搭唔同線嘛   所以唔可以錯   真係唔 Remind 佢仲好   依家搞到佢亂埋   哈哈 ~

6 點 20 分入去地鐵站等   因為依家好多線   我唔敢喺月台等   咁我講出口位置   家姐話唔見   問我見到啲咩商舖 ?!   之後行入啲先見到 7-11   我覺得自己好似大鄉里出城咁呀 ~

我好少搭地鐵   仍都好唔鍾意搭地鐵   今晚見識到放工時間係咁多人搭地鐵   我覺得好似淪陷咁呀   多人到呢 ~

交收完傾幾句就走喇   家姐趕住去搞嘢   我又趕住番屋企煮飯呢 ~

6 點 45 分番到屋企   我換埋衫即預備晚餐   7 點半可以開餐   我覺得算好快㗎喇 ~

是日晚餐 - 蕃茄肉碎扁意粉 + 蒸節瓜 + 脆門鱔魚皮 (外賣)

蕃茄肉碎扁意粉 - 煮呢個意粉又係好方便   如果唔駛煮肉碎就仲更加方便呢 ~

蒸節瓜 - 食剩 10 幾粒   里奧大人話飽   我就夾落佢個 Lunch Box 度   我話呢碟係 2 個份量   我食咗 1 個有多嘅份量   食咁少仲話飽   所以依家多數煮瓜類   佢食唔哂就比埋佢   等佢無藉口話唔食   呵呵 ~

脆門鱔炸魚皮 (外賣) - 好味喎   但里奧大人話鍾意食之前嗰間   因為比較薄身啲   但最搞笑係佢又係咁食喎   不過咁都好   一齊食先開心嘛   哈哈 ~ 

洗埋碗就開機洗衫   之後即沖涼喇 ~

日本晴王 + 呂宋芒   家姐買咗 30 個呂宋芒呀   不過我話要 2 個就夠   好在仲未熟咋   唔駛趕住食   哈哈

我會剪開一粒粒放雪櫃   咁樣好放啲

個紙盒好厚身同好重   所以可以保護到啲提子   不過我唔會咁樣放落雪櫃囉   哈哈

家姐 3 日之內比咗咁多生果   所以夜晚唔煮咁多   想食哂啲生果先呀   因為生果唔留得耐嘛

抖多陣就食提子   真係超級好味呀   我同家姐都覺得好甜   同埋有陣果香味   定叫香水味呢 ?!   我唔識點講   總之就係好味   哈哈 ~

提子雖好味   但糖份係好高   好在家姐無瘋狂買咋

睇陣 Youtube   今晚 10 點 40 分瞓覺 ~