蠔油燜雞膇排骨 + 蒸節瓜 ( 12-NOV-2024 )

( 12-NOV-2024  TUE )

感恩一覺瞓天光呀   好耐無試過咁喇 ~

早餐仍然食醬爆餐包   今朝食個半   所以覺得都幾甜 ~

里奧大人陪我等車   所以變咗佢都早咗出門口   我話雖然依家有 Apps 睇到班次   但我都會早啲到巴士站等車   有時會無啦啦早幾分鐘   到時送車尾就慘 lu ~

菇場唔忙就做私人嘢啦   咁樣時間過得快啲 ~

Lunch Time 出去行陣   小 A 話我個咀唇好白   又話我之前咳到好辛苦   咁有無睇中醫 ?!   我話睇緊啦   佢話係咪唔夾 ?!   我話唔係   因為醫師話我唔夠血氣   所以加咗阿膠   我飲完反而瞓得唔好囉   佢話阿膠補血可能燥   我都覺得係囉 ~

今日 Lunch Box 仍然係蕃茄薯仔湯   我覺得好好味同好飽肚   但就無食飯咁滯 ~

好在呢兩日係我自己蒸熱   因為個碗邊咁多湯   拎出嚟都麻煩呀 

開工無耐   阿爽就食嘢   阿輸話妳唔飽咩 ?!   勁似里奧大人呀   我次次一食任何零食   佢都會講妳唔飽咩 ?!

藍莓做下午茶都唔錯

唔忙仍然做私人嘢   所以好快放工 ~

買埋雞骨草比里奧大人就番屋企   今晚都係蒸餸好簡單 ~ 

里奧大人話 6 點幾番到屋企   叫佢沖埋涼先食飯   因為仲未食得 ~

是日晚餐 - 蠔油燜雞膇排骨 + 蒸節瓜

蠔油燜雞膇排骨 - 今次好味道呀   因為上次燜到有啲鹹 ~

蒸節瓜 - 我放碟餸喺枱嘅時候   里奧大人話尋晚食咗   估唔到今晚仲有   我話每次買菜都買定 2 餐嘛   唔係你真係以為我成日出街就咁行喇喎   要買埋瓜菜㗎   唔係點會咁快番到屋企煮飯   佢真係慘   講兩句比人煩十句   哈哈 ~

洗埋碗就即沖涼   咁就可以同里奧大人一路食生果一路睇沖遊泰國 ~

睇完再睇陣 Youtube   今晚 10 點 20 分都瞓覺 lu ~