茄汁燴雞柳 + 磨豉醬炒脆肉瓜 + 番茄紅衫魚湯 ( 3-SEP-2007 )

尋日鬧鐘響咗...但灘咗半個鐘先願起身...太攰喇...所以拿拿聲焗個福麵食就番教會喇...尋日喺係守主餐既關係...所以就比較遲少少先散會...之後同里奧大人去街市熟食檔飲茶...食左蝦餃 + 雞扎 + 山竹牛肉 + 炸兩...好飽呀...之後再食阿婆豆腐花...顛咗呀...食咁多野...

食完就同里奧大人橫掃日本城...Jusco...百佳...街市...

我發覺呢期既節目就係同里奧大人去超市同家品店買嘢...無計啦...近屋企嘛...因為里奧大人忙讀書又忙做功課...地方唔可以超過屋企範圍 100 公里...咪唯有行呢啲囉...不過我都好開心....因為可以買嘢....唔知點解無時無刻都想買嘢嘅呢...一個人嘅時候仲更加厲害...明知有嘅都會買...無就梗加唔洗講...呢期手痛唔可以拎咁多重野...唔係仲買得勁呀...因為我買野唔會 1 支支 1 件件咁買...一買就係 4 件咁買...不論大件細件...以前買廁紙都會買定 6-7 條...比里奧大人...朋友...屋企人問係咪顛...話住村屋就話啫...超市喺附近咁方便...洗鬼嘥地方擺同埋幫人清存貨咩...所以我先盡量買少啲咋...幾唔慣呀...

見里奧大人話熱氣...所以我就即刻煲夏枯草比佢飲...之後心癢癢...就試焗左個牛油蛋糕...成功呀....仲好好味添...係我同里奧大人都覺得啫...我真係好怕開焗爐整野呀...因為我上兩次整曲奇都唔得呀...搞到我情緒極之低落 + 無哂信心...所以好抗拒焗野...今次成功真係有莫名嘅興奮...自信心番哂嚟喇...哈哈...

尋晚煮茄汁燴雞扒 + 磨豉醬炒脆肉瓜 + 蕃茄紅衫魚湯...唔好睇好似好簡單咁...我用左 9 萬倍心機嚟整...雞扒起皮切少件嚟醃...個汁用茄汁 + 喼汁 + 紅蔥頭蓉 + 蒜頭蓉 + 薑絲...要好細心處理㗎...

脆肉瓜就易啲...炒完焗下就得....個湯又係唔簡單㗎....因為我最怕整魚....仲要親手將條魚用鹽醃...煲湯之前又要煎一煎...番茄又難拻皮...其實係唔想洗多個煲既關係...好煩㗎...鬼叫自己想飲魚湯咩...不過唔知係咪無落薯仔索油...好似好多油呢...

條街仲係濕濕哋...無得跑步添...唯有做下家務郁下啦...之後仲做埋 Mask...睇下報紙...食下生果...再睇埋阿蘇就瞓 lu...因為星期一唔夠精神番工係一件好慘嘅事...仲有就係 CC 放假...無得同佢 MSN 傾下偈...20 幾萬個慘呀...CC 對我嚟講真係好好好好好好重要㗎.....我開工的時候...哈哈...

今朝食咗腿蛋治 + 熱鴛鴦 ($14)...兩個字...悶 + 飽...

番到公司都好忙呀...忙寫 Blog 同埋同茄子 MSN 囉...係咪顛㗎...呢啲叫忙...

晏晝又係食番尋晚嘅餸...覺得好難食添...可能悶悶不樂...影響食慾呀...漫長既日子...叫我一個人點捱呀...

里奧大人呀...你仲要讀多年半 MBA...我好慘呢...又唔敢成日開口叫你陪...驚阻住你做功課...同朋友去街又驚你食埋出面啲嘢無益...同埋又覺得自己好似好衰咁...你咁辛苦讀書做功課...而我就咁辛苦同朋友 Shopping 買嘢唔係咁好...咁點好呀...咁啦...不如你每個星期比千零二千蚊零用錢我啦...等我可以買下野散下心平衡一下...大家體諒下咁啦...哈哈...