魚肉燒賣拚咖哩魚蛋 + 秘制牛雜 + 阿哥家鄉粉仔 (外賣) ( 31-OCT-2026 )

魚肉燒賣拚咖哩魚蛋 ($20) + 秘制牛雜 ($20) - 食剩一半燒賣同魚蛋   里奧大人話比佢做早餐

阿哥家鄉粉仔 ($25/大) - 里奧大人唔食得辣   咁因為 Share 食   我都唔加辣啦   但我覺得真係無咁好食   哈哈

( 31-OCT-2026  SAT )

尋晚半夜去完廁所   感恩好快瞓得番   今朝起身都精神呢 ~   

今朝坐車嘅時候   後面個後生仔同媽咪傾電話   全程都好溫柔   之後仲好開心咁講話今晚見   真係好少聽到男仔係咁嘅語氣㗎 ~

難得星期六咁多時間就出去食   不過其實食一個餐真係好飽   但真係唔想食三文治同多士   哈哈 ~

好盡力咁食哂沙茶牛肉同炒蛋   只係剩番少少麵   食埋呢次要停一停食呢啲牛肉   唔知點解食完有啲反胃   但薄薄哋嘅肥牛又 OK 喎   腸仔同芝士火腿牛角酥就食唔落   咁可以留番聽朝做早餐

菇場唔忙   又係執嘢嘅時候 ~

好快又到 11 月

里奧大人終於有精力熨衫喇   之後問我嗰幾條裙喺邊度買 ?!   無諗過佢會留意到添   不過我話好平質地又好   佢就唔會再問㗎喇   哈哈 ~

放工即走   番到屋企可以抖下先 ~

水姑喺澳洲買比我哋   無諗過佢買咁大包芒果乾呀   不過真係啱哂我   呢排成日好反胃   食啲酸酸甜甜嘅零食就最好喇

仲有位元堂嘅寧夏杞子 & 鴻福堂嘅原味點滴雞精

今日安裝浴室寶   師傅 1 點 45 分就到咗   整到 2 點 15 分就搞掂   咁我同里奧大人去食下午茶 lu ~

水牛城辣汁烤單骨雞翼 ($36) + 新鮮冷壓檸檬茶 (凍 +$3) - 兩樣都鍾意食   無諗過 4 隻雞翼咁多呀

煙肉+漢堡扒意式蕃茄濃湯通粉 ($38) - 里奧大人仲有完全好番哂   所以多數揀蕃茄湯底嘅食物

食完就去買啲嘢就番屋企   差唔多 5 點就同佢一齊番公司   今晚佢要開夜呀 ~

我就去剪髮   感恩髮型師喺度呀   只係等咗 10 分鐘就到我   同佢傾開去旅行   佢鍾意去日本自駕遊   但去郊外就驚有熊出沒呀   我話我朋友話小熊唔係好大隻   同我差唔多高啫   我話佢 6 尺梗係唔覺小熊大隻啦   但隻熊企喺上嚟係同我平頭呀   同埋一掌拍落嚟都無半條人命啦 ~

我話去旅行去到咁驚真係唔好去喇   去其他地方飲飲食食享受下好過啦   哈哈 ~

今次又剪咗 25 分鐘呀   真係傾下傾下又唔覺 ~

剪完都 6 點鬆啲   咁我都去買晚餐喇 ~

買完就去里奧大人公司   差唔多 7 點先開餐 ~

叻叻買嘅生果   兩個日本梨已經好重   仲加埋 3 個木瓜同 4 個橙   我覺得起碼 8 磅呀

食完諗住去家姐屋企比個 Surpise 比佢   點知等咗 20 分鐘都無車   之後到我有巴士   所以唔去家姐屋企 lu ~

去埋惠康買 100 號比里奧大人   之後就番屋企喇 ~

沖埋涼就睇下 Youtube   一路執嘢一路睇真係拖慢哂進度   哈哈 ~

里奧大人 10 點半番到屋企   叫佢快啲沖涼休息喇 ~

今晚差唔多12 點先瞓   好在聽日可以自然醒呢 ~

四喜烤麩 + 蟹粉小籠包 + 百頁結紅燒肉 + 京蔥爆牛柳片 + 蟹粉拌蔥油毛細麵 + 三鮮海皇羹 (外賣) ( 30-OCT-2026 )

四喜烤麩 - 呢個好味   自己識整就好喇

蟹粉小籠包 & 百頁結紅燒肉 - 里奧大人只食 1 粒小籠包   所以我食唔落嚿紅燒肉 lu

京蔥爆牛柳片 & 蟹粉拌蔥油毛細麵 - 即場食個麵應該好味好多   哈哈

三鮮海皇羹好味呀   佢哋食咗 1 碗咋   其實佢哋除咗食哂薑茶湯丸   其他幾乎無食過咁呀   我呢度只係每樣食啲咋   同埋仲有 2 杯檸檬薏米水   真係全個套餐拎哂番屋企咁   哈哈

( 30-OCT-2026  FRI )

感恩瞓得都唔錯   起碼個人無咁熱呀 ~

早餐仍然食吞拿魚包   連食兩日又要停下先食   唔係會好快食厭呀 ~

菇場唔忙   但之前買咗好多嘢   想擺番齊齊整整囉 ~

船頭見我執嘢   我話只係執公司啲嘢咋   屋企嘢真係無動力去執囉   佢話咁妳真係好唔舒服喎   咁鍾意嘅人都無動力執嘢   哈哈 ~

Lunch Time 出去行陣再買餃子番菇場食   家姐問點解唔同佢哋食 ?!   我話佢哋帶咗飯呀 ~

我想飲湯就食餃子喇   船頭依家都知我一定食韭菜餃   哈哈

月桂葉只係 $8 真係超級超級抵   之前船頭買嘅仲靚呀

唔忙又執下嘢   所以好快放工 ~

今晚里奧大人送水姑機   所以我去街市買啲冰鮮豬肉 金沙骨同雞扒   等我好番就可以煮餐飯   成日食出面嘢   真係食到有啲悶呀 ~

水姑叫咗蟹粉足二兩二人餐 (滙豐卡 $448)   里奧大人話水姑話叫多啲嘢食   可以每樣預啲比我   之前我話食酒釀丸子   水姑話叫埋啦   好在里奧大人無叫咋   因為我諗住佢哋食剩宮保雞丁同炒牛肉呢啲   我先叫多個酒釀丸子咋   如果真係叫咗   今晚就咁食丸子都飽 lu

里奧大人 7 點番到屋企   之後佢拎啲食物出嚟   好似完封不動咁呀 ~

整熱埋都差唔多 7 點半先開餐   我覺得今晚食得好豐富呀   哈哈 ~

水姑同里奧大人講話好開心聽到我 Whatsapp 話會注意健康   我覺得好搞笑啦   里奧大人話佢真係好擔心我亂食嘢呀 ~

開機洗衫   終於洗哂我想洗嘅衫   了咗心事應該會好瞓啲   哈哈 ~

同里奧大人一齊睇 "璀璨之城"   睇完又睇陣 Youtube   今晚 10 點 40 分都瞓先喇 ~

RUD 燒肉 @ 官塘 ( 29-OCT-2026 )

牛胸腹定食 100g (日式海苔味噌湯+飯+椰菜絲) ($58) - 里奧大人話夠唔夠飽 ?!   我話一定夠   同埋好似之前同家姐食過類似咁嘅定食   我叫咗 300g 食到好辛苦呀

好大火   隔離左右都係咁

和風豚五花蕃茄湯烏冬 ($59) - 里奧大人話好味道呀   我覺得個湯底都 OK 呀   飲完唔口渴呢

( 29-OCT-2026  THU )

感恩一覺瞓到鬧鐘響呀   好耐無試過喇   哈哈 ~

早餐食吞拿魚包   好耐無食呀   所以覺得好好味呢 ~

菇場忙下停下又傾下偈   所以啲時間過得特別快 ~

Lunch Time 同船頭 阿齋去食車仔麵   三個女人真係好多嘢講   不過我今日收咗好多料   所以好期待下年有好消息呀 ~

滷水鮮豬大腸+咖哩魷魚+酸齋米粉 ($48) - 今次米粉扣底   我話份量啱啱好   同埋又食咗小食   咁其實即係等如 5 個餸   阿齋話唔可以咁計   但船頭就話係可以咁計㗎喎   哈哈

香炸墨魚餅 ($36) - 新鮮熱辣   如果近公司就好啦   放工買番屋企食都好嘛

沙薑豬手 ($38) - 仍然覺得好味道   但一定要船頭食腳趾嗰嚿   哈哈

豬手咁疊上去   其實好易跌落嚟   不過用隻大啲嘅碟好過啦

船頭同阿齋係 4 個餸再叫飲   加埋要 $94   阿齋話食車仔麵都咁貴   我話以前食好平之嘛   之後船頭話以前 20 歲嗰陣吖嘛   哈哈 ~

食完就同船頭去一田退貨   阿齋就番去先   費事成個框無人呀 ~

唔忙又做自己嘢   里奧大人話有胃口食飯   但食完半個飯之後隔一個鐘先再食埋去   我話始終之前中午食得太少嘢   依家要慢慢適應呢 ~

放工即走   但要番屋企放低嘢先出去食晚餐 ~

食完就番屋企   開埋機洗衫就沖涼   抖陣就熨 3 機衫   其實之前收咗啲衫係無熨但就照着   所以今次好似無 3 機衫咁多   好似好快熨完咁   哈哈 ~

同里奧大人一齊飲中藥   佢話啲同事話佢臉色好咗同精神咗   咁就好啦   要繼續睇個中醫師調理身體   我都覺得飲咗中藥個身體好咗啲   之前成日周身唔舒服但又講唔出咩舒服咁喎 ~

睇完 "璀璨之城" 再睇陣 Youtube   今晚 10 點 40 分都瞓覺 lu ~

客家原味粉 @ 紅磡 ( 28-OCT-2026 )

肉丸鮮牛肉淮山麵 ($52) - 其實我想食粉腸   但尋晚食完覺得好滯咁

肉丸魚球淮山麵 ($52) - 真係唔好講笑   就咁食餸同菜都夠飽

( 28-OCT-2026  WED )

感恩尋晚瞓得都唔錯   不過今晚要睇下中醫清咗啲咳喇   成日唔斷尾真係好辛苦 ~

里奧大人話想瞓晏啲先番工   我話好吖   反正有成個月大假要補   咪當休息下先囉 ~

早餐食奶醬多   雖然好想食魚肉燒賣   但諗諗下都係唔好食咁多辣 ~

菇場忙下停下   咁就最好 ~

西瓜請食朱古力

里奧大人話肚餓要去食早餐   咁就好啦   好耐無聽佢話肚餓喇   瞓夠真係好好多呢 ~

Lunch Time 同船頭去一田買嘢   買完再去大生買嘢 ~

急煮食珍寶帆立貝柱 500g ($145) / 急凍三文魚腩條 ($55) - 船頭話帆立貝抵又話三文魚腩都靚   所以我就買喇

EURAS 急凍豆角 500g ($19) - 我鍾意食法邊豆就買喇   船頭都話想買嚟試   我話比半包佢咪得囉   如果好食先再買啦

三祖 x J-VILLE 經典午餐肉 ($45/罐) - 上次船頭比我同阿齋試咗   所以我同船頭都買 1 罐   順便幫阿齋賣埋   其他就係船頭買嘅

番到菇場都 12 點半   要快啲叮飯食 lu ~

一田就嚟冬日購物賞   船頭話悅和醬油 $29.90/2 支呀   佢尋日買要 $18 仲買咗 4 支   之後佢個樣好詭秘又大笑咁同我講   話午餐肉係 $28 咋   我話一陣要去退貨呀   大拿拿相差 $17 呀   好在佢同阿齋都話退   咁我本身食完飯去退   但船頭話聽日食完飯先去啦 ~

其實我哋上次買嘅食物都未食完   有啲用品直頭仲喺公司   所以覺得買完無耐又買咁   哈哈 ~

忙下停下   今晚放工去睇中醫   里奧大人話過嚟陪我睇呢 ~

感恩好快有得睇   我都係睇咳嘅   里奧大人問醫師要唔要戒口 ?!   佢話唔食得甜同辣   里奧大人即話佢最鍾意食辣   哈哈 ~

我膝頭哥痛嘛   佢話可能係勞損   所以我話想針灸   佢話要 50 分鐘左右   咁我話星期六先針 lu ~

睇完就去食晚餐   里奧大人笑住話今朝開咗電視機   所以錄到 "璀璨之城"   我覺得佢好搞笑   次次我要睇嘅節目   佢都零舍緊張 ~

食完再番里奧大人公司拎啲嘢就番屋企   沖埋涼就可以睇 "璀璨之城" 喇 ~

今晚同里奧大人一齊飲中藥   咁佢幫我沖埋   我話會唔會撈亂呀 ?!   佢話佢用黃色杯嘅   我話飲錯就搞笑了 ~

睇多陣 Youtube   今晚 10 點半都瞓覺先喇 ~

客家原味粉 @ 紅磡 ( 27-OCT-2026 )

粉腸魚球淮山麵 ($52) - 下次將啲粉腸蘸豉油胡椒粉先   以前食及第粥就會咁食法呢

魚球肉丸淮山麵 ($52) - 呢兩個餸又係好味道

( 27-OCT-2026  TUE )

尋晚瞓得麻麻哋呀   半夜隻腳無啦啦好痛囉   之後幾難先瞓得番呀 ~

本身諗住 7 點 15 分起身   但 7 點都醒咗就沖涼洗頭 lu ~

今朝里奧大人去買早餐   買完就去佢公司   依家到我朝早無咩胃口   要食好耐先食得哂 ~

上次喺鴻福堂買咗支川貝百合海底椰 ($30)   里奧大人話飲完舒服好多   所以水姑又買咗 4 支比佢

阿妹話我把聲仍然係 "萌"   船頭又係咁講   但我又唔覺喎 ~

我 9 點半先番到菇場   船頭同阿齋以為我放假呀   因為我好少平日咁遲番嘛   哈哈 ~

船頭又請我同阿齋食蛋卷

水姑都買咗 2 支夏枯草   所以我都拎支嚟飲喇

Lunch Time 同船頭 阿齋行一田   又忍唔住買咗啲嘢 ~

壹品X一田特濃低糖豆漿 ($20/2 支) & 天然酵母朱古力包 ($10) - 買比里奧大人做早餐

永樂麵粉廠XO醬 ($55/樽) - 我哋諗住應該超過 $100   估唔到 $55 咁平   所以每人買 1 樽喇

九龍麵粉廠-特級高筋麵粉 ($26) - 等我執完間屋就會試下焗麵包

今日好想食肉   所以去買 2 餸飯   船頭都好驚訝話我想食肉呀   哈哈 ~

蜜糖雞膇超級好味   同埋個南瓜湯又係熱辣辣   飲完成身暇哂好舒服呀

酸菜五花腩就食唔落   所以留番聽日

忙下停下   放工有啲嘢搞   所以同里奧大人出去食晚餐喇 ~

我同里奧大人講話今日嘅蜜糖雞膇超級好食呀   佢話下次買比佢食   佢呢排病咗咩胃口都無   今晚居然叫我買比佢食   我當堂開心哂呀   哈哈 ~

食完要去搞啲嘢   搞完都已經 8 點半   之後再去里奧大人公司拎啲嘢   咁啱 Melody 介紹個中醫話好好   咁聽晚同里奧大人去睇先 ~

番到屋企即開機洗衫   之後沖涼休息 ~

呢排都係睇 "璀璨之城"   不過今晚無錄到   所以里奧大人好緊張啦   佢驚我無得睇呀   我話上網睇番咪得囉 ~

睇完又睇陣 Youtube   今晚 10 點 40 分都瞓覺 lu ~

潮文園 @ 官塘 ( 26-OCT-2026 )

五香牛雜米 ($36) - 里奧大人食半碗仔就夠   咁我差唔多食完嘅時候   佢問我夠唔夠 ?!   我話梗係夠啦   食牛雜好滯㗎

蠔油菜心 (+$12) - 唔想兩個人就咁食碗粉   所以加碟菜喇

( 26-OCT-2026  MON )

尋晚去完廁所都快瞓得番   但起身都係有啲攰 ~

早餐食魚肉燒賣   今次真係要辣椒油喇 ~

菇場超級忙呀   船頭一番嚟就話我瘦咗呀   塊臉都凹咗嘅   我話放假病咗幾日   夜晚無咩胃口食嘢呀 ~

船頭幫我買嘅奶油梅 ($48/磅) - 一粒都好大粒㗎   同埋真係好好食   所以佢都阿齋都每人買 1 磅

Lunch Time 同船頭 阿齋行一田   我覺得行下舒服啲 ~

大囍慶四川麻辣口水雞醬 ($33) - 好似幾好味就買嚟試下

博多華味鳥雞膇肉咖哩 ($15/盒) - 買咗 2 盒   懶起嚟唔煮餸都可以比里奧大人帶飯   哈哈

買完又已經 12 點 15 分   係時候番菇場叮飯   佢哋好奇怪我點解有得帶飯   我話係上星期五食剩嘅辣蘿蔔同飯呀 ~

仍然忙呀   咁樣反而好精神   哈哈 ~

里奧大人同水姑同下午茶   佢喺鴻福堂買咗半打川貝同夏枯草   仲有 6 個湯包   其實比張卡我哋就得啦   特登過嚟仲要拎咁多嘢真係辛苦囉 ~

佢仲買咗 20 張電子湯劵 ($60)   佢呢幾日都係咁叫我千奇唔好煮飯   要好好休息   要飲啖湯水   所以佢本身尋日比我哋   但我哋約唔啱時間   佢已經好緊張我哋無得飲

4 點半終於搞掂   抖多陣就放工喇 ~

我要番屋企放低啲食物   之後又整個衣櫃   差唔多 7 點半先同里奧大人出去食晚餐   佢仍然無咩胃口   咁我話去食粉麵算 lu ~

食完去買啲嘢就番屋企   沖埋涼就休息 ~

里奧大人今朝開咗機洗衫   咁我可以睇下 Youtube 喇 ~

里奧大人 10 點 10 分瞓覺   我就睇 Youtube 睇到 10 點 45 分先瞓 ~

韭菜餃 + 酸齋 + 滷水雞翼粗麵 + 生菜魚肉 (外賣) ( 25-OCT-2026 )

韭菜餃 + 酸齋 + 滷水雞翼粗麵 ($39) - 我要沙嗲汁   但唔覺有咩沙嘜味呀

生菜魚肉 ($25) - 味道都 OK 呀   最緊要夠熱

( 25-OCT-2026  SUN )

感恩一覺瞓天光呀   瞓到 9 點半起身   里奧大人話繼續瞓   咁當然無問題啦   我刷埋牙就去買早餐 lu ~

早餐食奶油脆豬   咁我要咖啡小奶   但點知係齋啡   所以我將麵包啲煉奶"北"出嚟   咁就變咗咖啡小奶喇 ~

里奧大人 11 點先起身   買咗個腸仔包比佢食呀   食埋呢次藥就食哂成個療程   感恩真係無再發燒   但食藥食到好反胃   咁都明嘅   食咗成 10 日藥呀   真係食到個人都散哂 ~

執下嘢又已經 2 點半   里奧大人話要去食啲嘢喇 ~

輕盈炸雞定食 ($33) - 今次我要迷你拉麵

天然豚骨叉燒玉子拉麵 ($38) - 里奧大人仍然食湯麵

食完要出去搞啲嘢   本身水姑想過嚟比湯劵比我   但約唔啱時間要改聽日呀   佢好想我哋有湯飲同埋飲啲清熱涼茶   佢真係好擔心我哋㗎   因為問咗我幾次邊個時間得閒呢 ~

搞完又已經 5 點 45 分   咁搭的士番屋企喇   諗住去麥當勞食個包   但我話想食車仔麵呀   呢幾日食咗好多麵包有啲驚呀   哈哈 ~

食完抖陣又執下嘢   搞掂就沖涼休息 ~

呢排喺 Youtube 睇 "試真 D" 同 "試真D唷"   我覺得幾好笑呀   睇到 11 點 15 分先瞓覺 ~