蘿蔔牛腩 + 酸菜五花腩 + 魚香茄子 + 南乳豬手 (外賣) ( 31-AUG-2026 )

蘿蔔牛腩 - 呢個係首選   每次食都覺得好味道

酸菜五花腩 - 其實我哋唔食嚿肥豬肉   但我又好想食五花腩

魚香茄子 - 呢個又係好味道

南乳豬手 - 好在得 4 件   味道都唔錯嘅

( 31-AUG-2026  MON )

感恩瞓得都唔錯   我好多時放完假第日番工會瞓得唔好   因為驚鬧鐘無響呢 ~

早餐食核桃鬆餅   估唔到又好味喎   阿齋果然無介紹錯   一陣再問埋里奧大人個朱古力味好唔好味先 ~

菇場忙到 10 點   我同阿齋話會行一田   船頭話做到 8 月 30 日咋   我話咁都好嘅   可以儲錢 11 月再去買過   阿齋話駛唔駛咁誇呀 ?!   我同船頭話用咗成千銀喇   阿齋話佢無買得咁多   哈哈 ~

阿齋話一齊都行咗 3 次   我同船頭仲多佢 1 次添   同埋最勁係次次都買到嘢   哈哈 ~

Lunch Time 去 360 買咖啡   本身埋單係 $110   前面姨姨比咗張買滿 $120 減 $15 Coupon 比我   所以我買多件三角朱古力   減咗總數就比 $108.90   即係賺咗條朱古力都唔錯呀 ~

Red Rock Deli 甜椒酸忌廉味薯片 ($29) / 丸玉水產 北海道長腳蟹捧 ($15/3 件)

朝日 Wonda 極黑咖啡 ($18/3 件) / 瑞士三角杏仁朱古力 ($13.90)

買完已經 12 點 15 分喇   要快啲番菇場開飯呀 ~

我同船頭講開蟹柳   之後阿齋睇睇下劇   無啦啦同船頭話依家會翻炒   船頭靜咗   佢話諗緊翻炒咩呀 ?!   因為我同佢講緊蟹柳   以為係講嘢食呀   真係笑死   我話阿齋講翻炒即係二刷呀 ~

唔忙又做自己嘢   放工買埋晚餐先番屋企   因為呢間兩餸飯無咩味精   食完唔會口渴 ~

里奧大人又做咗機   我唔駛咁趕喇 ~

番到屋企都再蒸熱啲餸   雖然暖暖哋都可以食得   但我唔係咁想囉   所以里奧大人好奇怪點解咁耐仲未食得   哈哈 ~

洗埋碗就開機洗衫   之後沖涼休息   里奧大人就熨衫喇 ~

睇下 Youtube   今晚 10 點半都瞓覺 lu ~

乾炒牛河 + 迷你福建飯 (外賣) ( 30-AUG-2026 )

食剩 2/3 牛河   再食剩 2/3 盒炒飯   又可以帶飯喇

( 30-AUG-2026  SUN )

今朝鬧鐘響都唔係咁想起身呀   真係好少有呢   但約咗家姐就點都要起身呢嘛   感恩沖咗涼就醒哂喇 ~

我落車已經見到 Berry   但佢望唔到我嘅   咁越行越近嘅時候   佢已經豎起對耳仔   同埋係咁向前望   之後我喺欄杆望住佢   佢個樣諗緊點樣過嚟啦   咁 U 姐同佢向前行   佢就撲過嚟喇   仲好細聲咁怪叫   唔知係咪驚嘈住人呢   哈哈 ~

送埋 Berry 就去食早餐   今次都係 Oliver's SUPER SANDWICHES 喇   家姐問我厭唔厭 ?!   我話唔厭喎   同埋一星期一次無問題啦 ~

低糖高蛋白之選 ($53) - 蘑菇炒蛋 + 低糖日式麻醬沙律 + 無糖奇亞籽高纖高蛋白多士 + 鮮茄濃湯低碳椰菜花   我最鍾意飲個湯

煙肉 蜜味火腿 炒蛋 薯餅 麥包多士 ($45) - 家姐又問重覆食會唔會好悶 ?!   我話我自己平時都會重覆食嘢啦

家姐話有個同事就嚟退休   但佢又想與唔想之間咁   我話如果覺得悶咪唔退囉   賺下錢買嘢都好吖 ~

我話以前無做嘢一年   但其實都幾悶   我又唔係咁鍾意煮飯   每個星期一定有一日係搵里奧大人食飯   一係約埋媽咪同家姐食飯   如果唔係日日喺屋企真係好悶 ~

家姐話我都算好   除咗可以搵屋企人同老公   仲有班教友   始終朋輩都好緊要嘛   同埋真係要同人溝通囉   所以我都好感恩呢 ~

食完又去 Panash 買包   依家到家姐鍾意食黑芝麻麻糬   唔健康得嚟都算健康嘛   哈哈 ~

我話想試下鄉村軟法包 (特價 $24.50)   家姐話依家做特價呀   咁我話一定要買啦   哈哈

原來已經 9 點半   家姐想去 Uny 睇下   但佢話 10 點先開   咁我話去睇下囉   估唔到啱啱開咗   感恩感恩 ~

同家姐行超市又係好開心   因為佢又係咩都鍾意睇下   哈哈 ~

土耳奇無花果 ($69) - 家姐買無花果   我話妳鍾意食   之得喺一田買比妳啦   佢話因為平同埋呢盒都好靚先買喎

我話日本男爵薯仔 $5 超級抵呀   家姐笑哂話五蚊係 100g 呀小姐

日本黑毛和牛切片 ($99/3 包) - 叫家姐幫我揀   其實佢都係唔識嘅   哈哈

炸魚蛋同順德風味魚腐都只係 $10/包   所以家姐買 2 包做儲備

金滿堂頂級東北大米 3Kgs   好似四十幾蚊

買完都即番屋企喇   Berry 女繞個家姐過嚟撲我   但其實佢係好黐家姐㗎喎 ~

家姐話上次阿莊上嚟屋企整嘢    Berry 就吠足咁耐呀   仲要係大大聲   但佢同事 Uncle 上嚟整嘢就只係吠咗一聲咋   可能阿莊陣狗味好勁呀 ~

幾依家好難影 Berry 正面

難得望個嚟   但個樣好肉酸   哈哈

要同佢影減肥前後   哈哈

貼到我實一實   因為就嚟落雨呀

我問家姐有無試腐乳 ?!   佢即擰轉頭再奇異嘅眼光望住我   話咁夜點會就咁腐乳呀 ?!   真係笑死我呀   哈哈 ~

楚楚可憐咁

想瞓覺

12 點鬆啲就走喇   初初諗住番屋企放低嘢先買午餐   但最後都係直接買午餐去里奧大人公司   咁我唔駛再行多次呀 ~

生煎鍋貼 ($38) - 食剩 2 隻就留番今晚食

豬扒擔擔麵 ($48) - 主要係買比里奧大人食嘅   又係食剩 2 件豬扒

酸辣湯 (細 $15) - 我想飲熱同埋酸嘅嘢   飲 1 碗都夠哂飽

豆漿 ($5) - 都係買比里奧大人嘅

食完就幫手做嘢   好在今次都好快手搞掂   因為我要去針炙呀 ~

去到已經 3 點   感恩可以即刻針呀   3 點半就搞掂 ~

我其實想平日去針灸嘅   但要敷藥就唔得啦   同埋咁樣番工好似好誇張咁囉

因為敷藥要 8 個鐘   咁番到屋企都第一時間開機洗衫先喇   快快手做完一樣家務就最開心   哈哈 ~

之前鍾意喺成興隆買牛肉片   但越買越貴就無買   家姐又話 Uny 成日都 $99/3 包   叫我唔駛買咁多呀

里奧大人 4 點半先番到屋企   佢坐喺梳化瞓覺   我都瞓咗 20 分鐘呀 ~

今晚煮唔到飯   所以叫里奧大人去買外賣番屋企 ~

家姐尋日煲咗無花果唔知咩茶   今晚再整熱飲喇   飲完個喉嚨好舒服呀

食完就真係休息喇   里奧大人抖陣就去做機   番到嚟沖埋涼就熨衫   我企唔到咁耐咋   唔係我都會熨衫呢 ~

8 點 50 分都忍唔住要沖涼喇   之後就同里奧大人睇 "臥底高鐵團" ~

睇陣 Youtube   今晚 10 點半都瞓覺 lu ~

越南真味 @ 佐敦 ( 29-AUG-2026 )

越式拚盤 (越式炸春卷 + 炸蝦餅 + 蒜蓉雞中翼 + 蒸粉包) ($118) - 最好味係春卷   雞翼係完全無味嘅   其他就無食到呀

烤豬頸肉撈檬 ($58) - 我同家姐都鍾意食撈檬

烤牛肉湯河粉 ($58) - 里奧大人鍾意食熱嘢   其實都係 Share 食嘅

芒果沙冰 ($22) - 味道比較淡   不過價錢都反應咗一切㗎喇   哈哈

西瓜沙冰 ($22) - 同樣都係淡   但好想飲沙冰

( 29-AUG-2026  SAT )

感恩瞓得都唔錯   里奧大人仲勁   鬧鐘響咗都唔知   所以我刷埋牙先叫佢起身 ~

今朝出去食早餐   始終放 1 點   我放工又要去買 Muffin 比家姐   所以我話要食飽啲呀 ~

食完都直接番公司喇   因為差唔多時間有車呢 ~

菇場唔忙   阿齋一番到嚟就話尋日發生咗大件事   所以傾到 9 點 40 分呀 ~

放工去買 Muffin 比家姐   買完就搭地鐵   其實地鐵車程真係好快   不過我真係好唔鍾意搭地鐵   個氛圍令到成個人好急趕咁 ~

脆皮麻糬 + 朱古力麻糬 + 開心果麻糬 - 好似幾好味就買啦   順便比 2 個家姐試下

唔想再周圍行   所以直接買麥當勞午餐就去里奧大人公司喇 ~

指定超值套餐減 $8   所以買芝士安格斯餐 + 麥香雞只係 $54 咋

我食完就去百佳買嘢   里奧大人就繼續做嘢喇 ~

初初以為330毫升係細罐嗰啲   所以知道原來係大罐就加抵   本身想再買 2 條廁紙   但真係太重   我驚反車呀

地們香蕉 ($8.70) / 玉泉忌廉330毫升 (8 罐) X 2 ($56/2 排) & 可口可樂330毫升 (8 罐) X 2 ($56/2 排)

贈品有玉泉梳打水 (4 罐) & 雪碧檸檬青檸味汽水330毫升 (4 罐) & 天壇牌火腿豬肉 X 2 & 營多傳統印尼撈麵 5 包 X 2

番到屋企已經 4 點   今日焗熱到不得了   所以又要再沖涼 ~

買咗 6 個鬆餅 (2 個橙皮 + 2 個核桃 + 1 個藍莓 + 1 個朱古力)   我只係要核桃同朱古力   其他係比家姐嘅

開埋機洗衫就諗住打比里奧大人   點知佢啱啱番嚟   之後佢瞓陣晏覺   差唔多 5 點 45 分就出發去探婆婆喇 ~

家姐有巴士到醫院附近   所以同佢喺醫院大堂等   但最後都係上房等   因為佢話阿姐教佢要搭 Lift 上去喎   哈哈 ~

6 點 20 分到   見到大舅父舅母同細表妹   佢哋都嚟咗個幾鐘   咁到我哋接班 ~

舅母話婆婆要食工人煮嘅粥   咁都好呀   最緊要食嘢   同埋見到婆婆個樣都精神嘅 ~

家姐喺 A1 買咗啲獨立包裝蛋糕同窩夫   佢問婆婆食唔食 ?!   婆婆笑住話食   佢鍾意食甜嘢嘛   哈哈 ~

因為婆婆想瞓覺   所以 7 點 10 分都走喇 ~

我哋搭小巴去佐敦   經過一豆花   家姐話想買腐乳   之後里奧大人話食完先買   我話唔知一陣會唔會行番呢度   家姐就買咗先   之後里奧大人又話買樽番公司食 ~

天氣太熱唔想周圍搵食   所以我話食越南菜喇 ~

諗好哂食啲咩   個女職員叫我講啦   但我坐最入嘛   咁遠點講呀   之後個男職員就行過嚟問我食啲咩 ~

女職員成日都心心急急咁   佢放低張單就行開   家姐見到話咩我哋叫咗咁多嘢食咩 ?!   里奧大人再睇話有紅豆冰   但我哋都無叫   所以家姐同個女人講話張單唔係我哋   妳慢慢唔駛咁心急嘅   之前有枱客又係佢落錯單   真心唔知要咁快做咩呢   仲要錯喎 ~

食下傾下又 8 點幾   咁我比錢嘛   家姐又想比   但里奧大人扯佢出去呀   等佢無得比錢   哈哈 ~

送埋家姐搭巴士   咁啱我哋都只係等 4 分鐘就有巴士 ~

家姐真係好搞笑   次次請佢食嘢都要再講多次多謝

原來紅磡都有一豆花   我之前都好似買過   哈哈

番到屋企即沖涼   等埋里奧大人沖埋涼就睇 "不眠日" ~

終於睇哂喇   所以差唔多 11 點半先瞓覺 ~

友義氣．酸菜魚 @ 九龍灣 ( 28-AUG-2026 )

友義氣小炒皇 ($108) - 呢個又係好味道   因為小炒皇唔係間間都好食㗎

鮮果咕嚕肉 ($98) - 呢期鍾意食酸酸甜甜嘅嘢   所以又叫呢個餸喇

欖菜肉碎四季豆 ($78) - 呢個好味道   但就太多油呢

手打鹹檸七 ($26) - 天氣熱就鍾意飲啲酸嘢

( 28-AUG-2026  FRI )

尋晚瞓得好差呀   唔知係咪 2 點半飲咗杯茶   但里奧大人話佢好好瞓   仲一覺瞓天光添呀   好在尋晚無郁醒佢咋 ~

今朝同里奧大人出去食早餐   食完去佢公司坐陣先番工 ~

菇場忙下停下   阿齋問我用咗蒸蛋器未 ?!   我話未啦   佢話我有拖延症   之後船頭番到嚟又問我用咗蒸蛋器未 ?!   阿齋幫我答再話我有拖延症   哈哈 ~

Lunch Time 同船頭一齊出去   因為要幫阿齋去 DAISO 同一田買嘢呀 ~

我只係買收鈉用品 X 3 ($8/件)   豆漿同牛肉乾係阿齋   螢光筆就係船頭嘅   佢話 DAISO 要十二蚊   依家要買番 3 支溝淡番呀

船頭忍唔住買隻 Tefal 鑊   係咁話 $198 好抵

買完即刻再去買電子藥煲   又係已經 12 點 40 分先走得 ~

其實叮飯真係好方便   同埋感恩食完無喉嚨痛呀 ~

唔忙又做自己嘢   所以好快放工 ~

今晚有小組   但里奧大人又未走得   咁我又去一田買啲嘢 ~

樂淇珍寶蘋果 ($93.90/3 件) - 阿 Jack 鍾意食   所以買比佢食喇

土耳其無花果開口箱 X 3 ($61.90/件) - 新鮮開箱就一定買啦   今日有 18 個組員   所以我買 3 盒   咁如果佢哋鍾意食都可以食多個嘛

紅滛蕃薯 ($31.90/2 件) - 好似幾抵就買嚟試下   反正里奧大人鍾意食蕃薯糖水

卡樂B醬牛油味薯條 (盒裝) ($39.90/3 件) - 又係買比小組㗎   一齊分享真係最開心呢

非常感恩去到巴士站就有車   因為啲嘢真係好重呀 ~

我要番教會放低先   阿雲同阿馬見我買咁大袋嘢   問我係咪一陣開 Party ?!   我話開組呀   我話開 Party 反而只會喺教會附近買囉   哈哈 ~

之後請埋佢哋食無花果   原來佢哋又係好鍾意食呀   我話買咗 3 盒一定夠分   如果妳哋想再食都可以拎嚟食㗎

里奧大人 6 點半到九龍灣   同佢行咗 10 分鐘商場就要走喇 ~

今晚約咗阿 Jack 食飯   差唔多個幾月無見   所以一坐低就好好傾   哈哈 ~

食下傾下   阿 Jack  居然食哂一碗飯呀   仲話今晚好開胃   我同里奧大人就最開心   我哋好想佢食多啲嘢呀 ~

今餐當然係我哋請   最搞笑阿 Jack 朋友成日請佢食飯   佢話佢朋友話大把錢   但我哋話呢句真係無本事講得出呀   哈哈 ~

我拎住袋嘢入房   組員嘩嘩聲呀   話我做咩買咁多嘢   做壞規矩呀   我話一田大特價先買咋   佢哋喺度笑   當我拎哂出嚟嘅時候   姊妹 TT 話我影相㗎咋   我話一齊食㗎   姊妹 A 又將兩盒無花果放番入膠袋   叫我留番自己食啦   我話邊食到咁多呀 ~

今晚同里奧大人有靈修分享   我會寫低點講㗎   因為有時會唔記得講啲咩呢 ~

10 點 15 分散會   感恩趕到班車呀 ~

我話好開心個個都鍾意食無花果同薯條呀   里奧大人話無諗過我買咁多嘢   因為都好重呀   所以我話頭先一定要番教會放低先囉 ~

番到屋企即沖涼   我仲未眼瞓   所以里奧大人陪我睇 "不眠日"   但睇咗半集   里奧大人話要瞓覺   我話之得唔叫你陪啦   你頭先想瞓覺就瞓嘛   真係心痛死我 ~

望個鐘已經 12 點   雖然仲未好眼瞓   但點都要瞓㗎喇 ~