芝士腸仔 + 印尼撈麵 + 蕃茄南瓜粟米湯 ( 4-JAN-2018 )

( 4-JAN-2018  THU )

尋晚瞓到半夜熱醒呀   我覺得薄羽絨熱過我張珊瑚絨毯   不過我驚半夜凍   所以先轉被   下次咪搞   哈哈 ~

里奧大人話喺宿舍瞓得唔好   熱醒幾次   終於明白熱嘅感覺係幾痛苦呀呢   不過我覺得凍醒無熱醒咁辛苦   凍醒蓋番張被就好快可以瞓番   但熱醒個人比較燥啲   唔會即時瞓得番咁囉 ~

無咩胃口   早餐食奶油多算喇 ~



菇場忙呀   不過無 Mood 做添 ~

今日有 Lunch Box   好耐無試過喇   但都係最憎食完嘢要洗嘢   哈哈 ~

面對現實   真係要做埋個長命 Report 喇   聽日要搞掂哂呢 ~

放工即走   去大成街市買急凍雞翼雞扒   再買埋啲丸同南瓜粟米就走喇   估唔到呢個街市咁多嘢買   同埋光猛   感覺無咁污糟   同埋平過牛頭角街市喎   油麵平成三蚊㗎   所以第時晏晝都可以過去買下嘢呢 ~

番到屋企都 6 點半喇   勁餓   但點都要滾咗個湯先 ~

滾咗半個鐘   繼續比佢滾   但真係好餓   所以煮咗麵食先   食完再飲湯 ~

是日懶餐 - 芝士腸仔 + 印尼撈麵 + 蕃茄南瓜粟米湯

芝士腸仔 + 印尼撈麵 - 本來諗住煮茄汁意粉   因為之前買咗 8 個蕃茄   煮意粉最多用 2 個   剩番 6 個好難搞啦   同埋已經想爛咁   因為里奧大人突然話要上大陸兩晚   所以煮嘅嘢要轉陣啦   變咗得我一個人食   咁最後都係煮撈麵   蕃茄用嚟滾湯算喇   我想一次過清哂嘛 ~

蕃茄南瓜粟米湯 - 要清哂啲蕃茄   一定係滾呢個湯囉   好在滾呢個湯都超級方便咋 ~

洗埋碗都已經 8 點半   勁攰㗎   但都去徑步   本來想徑 20 分鐘   但最後都徑半個鐘   其實有時間   我真係想徑一個鐘   但做咗成日又煮埋飯   體力真係只能夠應付到半個鐘咋 ~

番到屋企就再抹嘢   抹完就開機洗衫   之後沖涼喇 ~

望下個鐘都已經 9 點 45 分   係時候要抖下   哈哈 ~  

點都比自己 Relax 下啦   所以睇 Youtube 睇到 11 點 45 分先瞓 ~