韭菜餃 (外賣) + 腍甜菜心苗 + 自家制合桃包 & 朱古力包 ( 24-MAY-2020 )

朱古力包好味道   口感有啲煙韌

( 24-MAY-2020  SUN )

今朝里奧大人 6 點 15 分起身番工喇   我就繼續瞓 ~

瞓到 9 點 05 分   鬧鐘未響都起身梳洗喇 ~

今朝好在早醒咗咋   因為我以為校咗 9 點 15 分鬧鐘   但原來我係校咗 9 點半呀 ~

搞掂哂就出發食早餐   食完就即去里奧大人公司幫手 ~

佢好多同事一見到我   就話我着得好 Colorful   勁哥直頭話我去咗夏威夷咁呀   哈哈   因為我多數黑色同素色呢 ~

崇拜完畢就同里奧大人食 Lunch   佢食完之後就要去開會   我就去街市買餸同生果 ~

今次係我飲青檸梳打水

番到屋企要即沖個涼   但其實今日無咁熱㗎喇   所以開咗半個鐘頭冷氣都要關呢 ~

想瞓又瞓唔到   咁又抹嘢啦   5 點左右預備晚餐 ~

$30/3 磅嘅山竹   啲肉又細粒又酸   豬腰芒好似 $18/2 磅   都幾大隻   食起來好方便

咁浸完菜就剪韭王嘅頭頭尾尾   點知一嘢剪到手指尾流血   勁驚囉   因為其實係滴緊血   咁我即用廚房紙按實   但仲係標血   咁屋企又無冰   之後醒起冰格有退熱墊   即拎出來按住傷口   按咗 2 分鐘左右   終於止到血   但隻手指尾痺哂   哈哈   勁驚壞死皮膚呀   我覺得自己真係乜鬼都驚   哈哈 ~

第一次遇到咁情況   我覺得自己都算鎮定呀   但標血嘅時候   都諗緊駛唔駛聯針   但心諗   0.5cm 傷口應該唔駛啦 ~

我傷口係打橫   但咁樣睇好似打直咁   哈哈

里奧大人 5 點半開完會   今日都算早喇 ~ 

我特登掉咗張紙巾喺地下   叫里奧大人執呀   之後佢問咩事 ?!   我話剪親手指尾呀   之後佢即刻幫我搽藥膏貼膠布   我話左手無力呀   因為驚整爆傷口   衰奧話放張五百蚊喺地下   睇下我有無力執喎 ?!   我話我用右手執咪得囉   佢喺度大笑呀   話估唔到我咁講   佢估我會講試下放低先啦   哈哈   咁係吖嘛   我有兩隻手家嘛 ~

是日懶餐 - 韭菜餃 (外賣) + 腍甜菜心苗 + 自家制合桃包 & 朱古力包  

韭菜餃 (外賣) - 懶呀   所以又買韭菜餃 ~

腍甜菜心苗 - $9/斤抵呀   又可以分兩餐食   其實都係因為懶   哈哈 ~

自家制合桃包 & 朱古力包 - 里奧大人同事整比我食㗎   最搞笑佢同事問里奧大人啲麵包比邊個好 ?!   里奧大人答佢   比完佢都係會比我   所以我一去到佢公司   招呼都未打   佢已經比麵包比我 ~

頭先我叫里奧大人幫我洗碗   因為唔想整濕傷口   咁我拎啲碗去廚房   其實我都諗住洗㗎喇   左手用手指公同食指拎住啲碗就可以   到我洗哂   里奧大人先嚟話等佢洗碗喎   不過佢頭先真係傾緊公事嘅   我唔等佢啫   但真係要佢幫手搓手巾呢 ~

搞掂哂就開機洗衫   之後沖涼喇   真係邪啦   今朝早咗起身就大清潔廁所   如果今晚大清潔就唔可以喇 ~

沖埋涼就休息   里奧大人 10 點半就瞓   我就 11 點先瞓 ~