香味雞球 + 粟米蛋花湯 + 自家制麵包 ( 8-NOV-2020 )

我以為係麥樂雞咁添

( 8-NOV-2020  SUN )

今朝 9 點起身   沖埋涼就即出門口 ~

食完早餐就拎口罩托比高高   本身佢話見到我先比佢   但我話要下個月太耐   所以約佢今朝比佢   佢知道我特登過嚟比佢   個樣好唔好意思   之後仲送我出門口先搞笑 ~

任務完成就即飛車去里奧大人公司   因為 10 點 45 分要到里奧大人公司幫手   估唔到早咗 15 分鐘到   咁同阿妹 頂爺 叻叻一齊傾偈   笑到收唔到聲呀   真係好少有咁多時間傾偈㗎   所以傾得好開心 ~

崇拜之後就搵里奧大人   咁唔記得傾開啲咩   我好大力打里奧大人隻手   之後佢同事見到   話妳都好大力打佢隻手喎   唔怪得佢成日着長由衫啦   里奧大人即話所以見佢成日隻手瘀就知咩事   但佢同事唔理佢   繼續同另一個同事講嘢   完全當里奧大人透明   呢下好笑   因為里奧大人好似自言自語咁   哈哈哈哈 ~

咁里奧大人繼續做嘢   我就出去行   發現有間精品超市   我買咗咖啡同越南河粉比里奧大人   等佢唔駛成日喺屋企拎嚟拎去   我直接咁買仲好 ~

2 點左右去到里奧大人公司   但佢未放工   所以又同佢啲同事傾偈 ~

里奧大人 2 點半終於放工   要去食嘢喇   今日我都有啲餓 ~

食完就搭車  再去埋超市買餸就番屋企喇   咁就已經 4 點幾   今日好晏咁呀 ~

沖埋涼就開機洗衫   之後就熨 2 機衫   搞掂就抖下   6 點左右就燜餸   咁聽晚一番到屋企蒸熱就可以   搞掂哂就煮晚餐 ~ 

是日懶餐 - 香味雞球 + 粟米蛋花湯 + 自家制麵包

香味雞球 - CP 品牌真係唔錯   呢包接近$30 都叫做抵食   因為份量都多   但如果香辣雞翼要 $45.9一包   我覺得好貴   我去麥當勞買好過 ~

粟米蛋花湯 - 無買菜   同埋今晚食麵包   如果食白菜仔好唔 Match 呢餐   哈哈 ~

自家制麵包 - 尋日係牛油果煙肉+吞拿魚碎蛋   今朝係合桃包   所以今晚真係唔駛煮麵喇 ~

洗埋碗又要沖多次涼   今日好似好熱咁 ~

抖陣就食生果   之後睇電視 lu ~

今日周圍滕都比較攰   所以11 點都自己瞓喇 ~