堅信號上海生煎皇 @ 九龍灣 ( 16-NOV-2020 )

堅信號生煎包 4 個 ($36) - 個底好脆   但里奧大人話個皮比較厚身   我話唔知正宗係咪咁呢 ?!   

回鍋肉粗炒 ($65) - 里奧大人話食㗎   但我覺得味道麻麻哋   哈哈

酸辣湯雲吞 6 隻 ($42) - 我要落醋先感覺到酸味

( 16-NOV-2020  MON )

感恩一覺瞓天光   咁就有番啲精神喇 ~

早餐食腿蛋治   我講埋熱啡少奶走甜之後   阿姐問今朝唔烘底 ?!   我都諗咗一下先答唔駛   依家食芝腿治先烘底   因為咁樣芝士先會溶   哈哈 ~

菇場忙咗陣   可以做自己嘢 ~

里奧大人話今朝去完姑奶屋企拎完嘢就番工   我以為自己 Get 錯呀   哈哈   不過我相信佢啲嘢真係做唔切 ~

Lunch 食燒賣+腸粉   突然間好想食啲濕濕哋嘅嘢 ~

諗住抖到放工   但 4 點幾先嚟勁忙   好在一個鐘就搞掂 ~

放工即走   因為遲咗少少走   所以就同里奧大人一班車去九龍灣喇 ~

好想食生煎包   所以同里奧大人去堅信號食晚餐   感恩有卡位   因為闊落好多㗎 ~

我食食下就望見里奧大人件裇衫有好多水漬咁   之後再認真望係啲肉汁呀   彈到半邊衫都係呀   居然連格甩底附近都有一大撻肉汁   咁都算   最離奇係放喺隔離嘅紙袋同背囊底部都有囉   咁一揹上身   腰嘅部份都會污糟啦   真係唔明佢點解可以食到咁   唔係我睇到   佢都唔知   其實應該問問佢係咪覺得個生煎包無肉汁 ?!   實情係比佢整哂出嚟   哈哈 

食完行陣就番屋企   真係好邪   我諗住今星期一開始徑步   但就肚屙   可能飲咗玫瑰花茶   因為好耐之前又係咁   無啦啦飲完屙幾次 ~

沖埋涼就開機洗衫   之後熨幾件衫就要比里奧大人熨喇   因為有啲熱   我唔想熨完又沖多次涼呀 ~

繼續追劇   今晚 11 點幾先瞓 ~