孜然焗雞翼 + 油麥菜拚昆明生菜 + 酸薑皮蛋蕎頭 ( 7-SEP-2022 )

里奧大人成日食剩啲飯   佢仲叫我幫手食   大佬咁核突點食呀 ?!?!   之後我續粒夾埋一邊   叫佢自己食番啊

( 7-SEP-2022  WED )

今朝 7 點 34 分有鈴聲響   里奧大人就話慘喇   無校鬧鐘   我話你咪校咗鬧鐘囉   我鬧鐘都唔係咁嘅鈴聲 ~

原來係屋企手機鈴聲   里奧大人話公司同事搵我 ?!?!   我話點會呀   之後無理啦   我沖完涼又聽到手機響   係里奧大人公司同事搵佢呀 ~

今朝都係食醬占多   覺得都幾好味   哈哈 ~

菇場唔太忙   又做下 Filing ~

Lunch Time 出去行下   之後就買雞翼酸辣米線番菇場   今日都係勁想食米線呀   連 8 卦都問做咩今日又食米線   哈哈 ~

只係 $23 咋   所以即買 1 Pack   因為 2024 年到期呢

仍然唔忙   同阿花 Whatsapp 到放工   所以時間就快過呢 ~

放工即走   番到屋企都預備晚餐喇 ~

是日懶餐 - 孜然焗雞翼 + 油麥菜拚昆明生菜 + 酸薑皮蛋蕎頭

孜然焗雞翼 - 我買咗樽孜然雞翼醬   味道都唔錯喎   諗起自己第一次整土匪雞翼   特登要包孜然粉   又要買黑芝麻   依家煮嘢真係幸福得多啦   又可以睇 Youtube 教學   我以前睇文字食譜咋   哈哈 ~

油麥菜拚昆明生菜 - 其實都鍾意買兩份唔同嘅菜   咁樣食落無咁悶   雖然放埋同一碟 ~

酸薑皮蛋蕎頭 - 突然間好想食   好在夠簡單   隨時食都得 ~

洗埋碗就沖涼   之後抖陣就食月餅 ~

家姐喺和記隆買嘅蛋黃香芋

仲有貓山王冰皮月餅   好濃榴槤味   哈哈

里奧大人話今日喺公司正想行開   榴槤就特登企喺佢面前停低幾秒   佢見榴槤拎住盒花生糖   就諗住話點樣拒絕話唔要好呢 ?!   因為佢都唔食   點知榴槤話係請佢太太食的   里奧大人話聽到咁樣好沖擊   哈哈哈哈 

睇 Youtube 睇到 11 點左右都瞓   依家天氣涼涼哋   感覺好快有睡意 ~