辣子雞拚燒鴨 + 糖醋骨飯 + 蠔油芥蘭苗 ( 13-JUN-2024 )

( 13-JUN-2024  THU )

感恩瞓得都唔錯   又係鬧鐘未響都醒醒哋咁 ~

臨醒個夢係見到 CC 兩公婆   我話里奧大人約咗人食飯   我就要去大成街市   真係好日唔去   一去就見到妳哋   之後鬧鐘響咗 lu～

早餐食芝麻餐包仔   今次搽醬占   其實本身好多芝麻㗎   不過我拎嘅時候整跌咗好多   呵呵 ~

菇場仍然無得上網   咁就清下啲舊資料啦   差唔多 10 點 15 分先整好 Server   終於可以上網喇   開心開心 ~

呢排冷氣又唔夠凍   可能出面熱得滯呀   我記得前年又係咁 ~

Berry 女好驚落雨   所以要着呢件衫仔   家姐話佢真係無咁驚㗎

喺 Pantry 見到溫總   佢無啦啦話個 System 係 Uber 揀嘅   咁唔怪之得啦   佢嚟咗無耐之嘛   對舊有系統都唔知點運作   咁買個新嘅番嚟   令到我哋根本做嘢都唔暢順   好在我可以問阿虫   但溫總就勁慘   尋日佢問小說嘢   小說發脾氣鬧佢咁麻煩呀   但其實根本係個 System 做唔到   如果要做到又要比錢改   不過溫總話呢個問題係由第一日話係要咁做   不過無人理佢喎 ~

Lunch Time 出去行陣再食水餃河   之後買完菜又行陣   最後買雞骨草比里奧大人就番菇場   條街勁焗熱   我搭 Lift 嘅時候見到自己塊臉係滴緊汗呀 ~

菇場忙呀   但又到影印機死咗   咁做到一半又要等聽日先做到   唉 ~

Berry 好少會將個頭仔瞓落家姐個枕頭上面

我同家姐講話 Berry 係咪嚇到黐咗線   哈哈

放工即走   番到屋企都即刻整晚餐喇   里奧大人以為就咁蒸餸就搞掂   我話仲要淥個菜呀 ~

是日晚餐 - 辣子雞拚燒鴨 + 糖醋骨飯 + 蠔油芥蘭苗

辣子雞拚燒鴨 - 尋晚食剩   今晚一定要食哂去喇 ~

糖醋骨飯 - 都係尋晚食剩   就咁蒸熱就食得 ~

蠔油芥蘭苗 - 呢期真係好鍾意食芥蘭苗   我多數喺錢大媽度買   因為一盒盒好方便 ~

食完抖陣就洗碗   之後沖涼休息 ~

頂爺嘅日本手信   榴槤就請我食包糖   里奧大人話榴槤話買呢包糖就諗起我   所以買多包比我   好搞笑呀   哈哈

今晚都係睇完電視再睇 Youtube   仍都係 10 點半瞓覺   依家要盡量瞓多啲 ~