百芳豬扒便當 + 台灣鹽酥雞便當 (外賣) ( 26-SEP-2025 )

今次飲茉香綠茶   我怕飲紅茶瞓唔着   其實唔知關唔關事   哈哈

( 26-SEP-2025  FRI )

尋晚係咁發夢   有個夢係同 CC 兩公婆去日本   去到一間餐廳食嘢   見到里奧大人成班同事聚會   但里奧大人請假去日本就無出席   但估唔到會喺餐廳見到 ~

另一個夢係我同里奧大人朝早等巴士   見到對面係林謝謝同同事一齊搭車   之後我醒咗去廁所   前晚里奧大人無啦啦比林謝謝張相我睇   之後就發夢見到佢喇 ~

臨起身又發夢同 CC 兩公婆去泰國旅行呀   我仲記得當時係朝早 10 點幾   我話有啲攰   所以里奧大人同兔兔一齊去買咖啡   我同 CC 就睇下搭咩車去下一個地方 ~

今朝鬧鐘響真係濛濛瀧瀧未瞓醒咁   嗰下真係想繼續發埋個夢呀   哈哈 ~

早餐食甜餐包搽花生醬   由細到大都鍾意食甜餐包   我成日覺得食芝麻餐包   食完個口好似苦苦哋咁㗎 ~

水姑比我哋嘅花生醬

菇場唔忙   又做自己嘢喇 ~

Lunch Time 蒸完飯就同船頭 阿花一齊行去 Mikiki   我搭住船頭膊頭   佢話我隻手好冰凍呀   駛唔駛凍得咁誇張呀   之後我搭落自己膊頭   原來都感受到冰凍㗎   所以阿花叫我唔好掂佢   哈哈 ~

諗住 Hea 住等放工   點知 3 點開始忙   忙到 5 點 20 分呀   因為肥仔豪未搞掂   咁我都要留番聽朝做 lu ~

放工即走   買埋晚餐就去里奧大人公司一齊食喇 ~

里奧大人 7 點半開會   我差唔多 7 點就走 lu ~

去惠康買下嘢   之後番到屋企放低嘢就去做機   今晚做咗 35 分鐘   因為頭先食得好飽呀 ~

土耳奇原箱無花果 ($45) / 桂格雜果燕麥脆 ($22.5)

沖埋涼就休息   又睇下 Youtube 咁啦 ~

里奧大人 9 點 45 分番到屋企   同佢一齊睇下 Youtube   但我 11 點半都未眼瞓   里奧大人又係咁   之後話飲咗綠茶呀   不過我都照瞓啦   始終聽日要番工呢 ~