酸齋拚齋鴨腎 (外賣) + 蝦醬泰式臘腸炒飯 + 蕃茄南瓜粟米栗子湯 ( 7-OCT-2025 )

今晚只食半盒就夠   所以份量真係算多呢

( 7-OCT-2025  TUE )

今朝瞓到  8 點 45 分都醒 lu   咁就即刻洗頭沖涼喇 ~

同里奧大人出去食早餐   估唔到都唔算多人   可能啲人放連假去旅行呀 ~

買埋麵包先番屋企   咁比錢嘅時候   職員話好少咁早   仲以為佢認得我呀   之後先知道佢頭先講話麻糬好少咁早出呀   哈哈 ~

番到屋企即滾湯   搞掂就睇 Youtube 喇 ~

差唔多 12 點幾就出發去佐敦   感恩又趕到架巴士 ~

周圍行下再去搵食   今日想食泰菜呀 ~

蝦醬泰式臘腸炒飯 ($45) - 其實我真係好飽   連小食都唔想食   不過費事兩個人食一個餐   所以叫個炒飯   留番今晚食都得呢   我食咗兩啖   味道都唔錯呀

香葉肉碎煎蛋配飯 ($58) - 里奧大人話必叫呢個飯喎   都味道呀   同埋份量都好多

凍檸檬茶 (+$3) - 里奧大人依家好怕熱   所以一坐低已經話要飲凍嘢

@ THAI-In 泰瀛

我企喺對面影相做記錄   職員見到我影相   笑哂口仲話比包嘢我   仲要係走過嚟比我呀

食完去裕華行下   咁我上扶手電梯嘅時候   里奧大人就拉住我話係去樓下呀   我話要去 5 樓睇台灣節食物呀 ~

我睇緊嘢食嘅時候   里奧大人過嚟問玩唔玩康樂棋 ?!   我話玩呀   佢話估唔到我會話玩同埋識玩喎   我話以前細個喺學校成日玩㗎 ~

台灣柚子參八仙果嘅口感都幾軟身

好耐無玩嘅康樂棋   啲 Rules 就肯定唔記得哂㗎喇

我真係覺得好好玩呀   里奧大人話搭邊班車走   我話唔理喇   繼續玩呀   哈哈

我係陪玩的

越玩就越知道個技巧   不過我最勁係求其玩反而更易入球   同埋幫埋里奧大人入球添   哈哈

玩咗個半鐘   去蓮花健康素食買齋   買完就去髮品店護髮素同 Jel ~

里奧大人用開 LAKME 呢個牌子

廟街位置擺咗隻 B. DUCK

咁見仲有時間   里奧大人話要去麥記坐下呀 ~

KITKAT 抹茶芭菲 ($14) - 完全無抹茶味   其實阿花都咁講   之後同 CC 講話唔駛試   佢話下次同佢去日本再食   哈哈

食完坐陣就走   啱啱好趕到班車呢 ~

番到屋企都抖陣   里奧大人就沖涼先喇 ~

是日晚餐 - 酸齋拚齋鴨腎 (外賣) + 蝦醬泰式臘腸炒飯 + 蕃茄南瓜粟米栗子湯

酸齋拚齋鴨腎 (外賣) - 想食齋好耐   但一田又貴又少   所以今日出開佐敦就買喇   我買大盒 ($50)   我覺得兩樣都好味道呀   下次一定要再買   依家好難搵到好食嘅齋舖呢 ~

蝦醬泰式臘腸炒飯 - 午餐當晚餐   里奧大人仲可以帶埋飯添呀 ~

蕃茄南瓜粟米栗子湯 - 今次好好飲呀   所以好鬼開心   哈哈 ~

洗埋碗就沖涼休息   抖陣就熨 2 機衫   之後裇衫就比里奧大人熨   我見佢熨埋我啲裙   我話我熨咗㗎喇   點知佢話熨得咁核突再幫我熨呀 ~

睇下 Youtube 又打下機   今晚 10 點 45 分都瞓覺 lu ~