Burger Mix @ 鰂魚涌 ( 30-JUN-2014 )

和牛安格斯芝士磨菇漢堡套餐

( 30-JUN-2014  MON )

今朝望下魚缸   原來阿顛已經升咗天 lu   所以同里奧大人決定唔再養魚喇 ~

諗住星期一要靜靜哋食早餐   點知 8 卦 Whatsapp 我喺邊度食   係咪咁邪呀 ~

菇場超級勁忙   鬼咩   上星期請咗 2 日病假   星期六又唔多舒服無做嘢   都知今日係超級勁忙㗎喇   抵死   哈哈 ~

本來 Lunch 食杯麵   但要出去抖一啖氣   所以就買腸粉燒賣番菇場食喇 ~

2 點幾家姐打嚟話今日放 4 點   話慶祝回歸喎   邪到爆啦   今晚我約家姐去鰂魚涌食嘢   點知佢又放 4 點   佢起碼要等我 2 個鐘啦   所以佢留喺公司做下嘢   同同事吹下水咁等我囉   唔知以為佢咁勤力   哈哈 ~

開行廿個 Tubro 做做做   不過都仲係未做完   但就做哂 Urgent 嗰啲先囉   今晚放工一定要準時走嘛 ~

家姐喺鰂魚涌地鐵站等埋我一齊行去 Burger Mix   其實呢個團購餐係我本身買咗 4 張 Coupon 比佢做 Lunch 㗎   不過原來時間要 2 點之後先可以換   咁佢一定唔得啦   之後佢又唔食得牛肉   咁我同里奧大人食咗先   仲有 2 張就一定要 6 月30 日前食   感恩佢 26 日之後可以食   所以就同佢食喇 ~

姐夫仲放緊假   不過家姐無話佢知今晚同我食 Burger   所以佢話番屋企都要食飯   但只係食菜   哈哈 ~     

食完坐陣就行去北角搭車   喺街頭見到 619 同 671 啱啱走咗   咁諗住都要等 10 分鐘   點知去到巴士站附近   啱啱紅燈位前見到 619   我即同家姐講話有 619 呀   要衝呀   不過其實只係過對面馬路   感恩咁啱又有另一架巴士埋站   咁實趕得切囉   一嚟就兩架 619   之後一定有排等囉 ~    

感恩有位坐呀   仲可以一前一後   算好好㗎喇   話哂放工時間嘛   咁我叫家姐幫我抽動物   我又幫佢玩下咁啦   見到佢啲排位好怪   問佢點解第 1 揀 100 Cherry   第 2 先揀 120 Cherry   佢之後碌大對眼好緊張話話第 1 係 120 Cherry   唔係 100 喎   妳睇唔到呀 ?!   係咁問幾次係咪老花係咪老花   真係問到就嚟成車人都知   但我其實又無答佢喎   仲話佢問咁多次添   哈哈   之後答佢有老花咪老花囉   佢好緊張話咁咪要睇醫生囉   我話痴啦   去驗眼同配老花鏡咪得囉   同埋我根本都無老花   黐鬼線   大佬   果粒數字嘅 Size 細過芝麻   睇錯有咩出奇呀   哈哈 ~

家姐喺官塘落車   又叫我記得唔好瞓   驚我坐過龍   人哋唔知呢   以為我成日瞓覺坐過龍呀 ~

番到屋企即沖涼喇   之後睇下電視   等里奧大人番嚟 ~

里奧大人今日先話如果準時放工   佢就去影藝買飛睇 Transformer   點知佢 9 點先放工呀   之後叫佢買 Subway 番屋企食   想快啲清哂啲團購 Coupon 呀 ~

聽日唔駛番工   所以差唔多 1 點先瞓呀 ~

富田和食亭 @ 佐敦 ( 29-JUN-2014 )

超勁鹹呀   鹹到咀唇都 "乸" 算埋

( 29-JUN-2014  SUN )

今朝里奧大人校錯鬧鐘   所以差唔多 11 點先醒   咁番唔切教會 lu ~  

梳洗完都 11 點半   要即落樓食早餐喇   仲要等 15 分鐘添 ~

食完番屋企抖陣   大食表妹話婆婆今日出院   所以諗住去佢屋企探佢   點知有少少燒   所以就出唔到院   咁我哋就去醫院探佢啦 ~

3 點出門口   同里奧大人去荷里活廣場食 Tea   之後拎西褲   搞掂哂就即搭地鐵去醫院喇 ~

香茅雞翼撈檬

香茅豬扒金邊粉

去到都 5 點   啱啱探病時間   見到細舅父舅母同細姨姨丈同工人已經喺度   不過只可以 2 位入去探   佢哋比我哋入去先   婆婆胃潰瘍   所以無咩胃口   不過我話點都要食啲嘢   唔係無哂抵抗力嘛   咁差唔多半個鐘之後就出去   到細舅父舅母入去喇   咁啱大舅父同表妹夫都嚟咗   要輪住入去嘛   所以喺大堂傾偈   一傾傾到 6 點半   之後我同里奧大人再入去探婆婆   探多陣就走 lu ~

其實未餓   不過唔想撞正食飯時間   所以去食嘢先囉   唔想諗   所以去富田食壽司 ~

食完就行裕華   之後就坐小巴番屋企   里奧大人去徑步   我就番屋企沖涼休息喇 ~ 

八方雲集餃子專門店 @ 九龍灣 ( 28-JUN-2014 )

( 28-JUN-2014  SAT )

今朝都係 8 點半起身   沖完涼洗頭又要抖陣先番工   因為都係見暈   勁想叫里奧大人送我打的呀   不過唔啦   好似好衰咁   不過一落樓啲陽光勁到呢   我面前所有嘢都係照到白色   勁辛苦先到的士站 ~

買奶油多同咖啡番菇場   不過只飲咗 1 啖咖啡已經勁反胃   之後個肚都有啲痛   可能見太多嘢做啦   哈哈   抖陣又好啲咁囉 ~

放工諗住打的番屋企   之後叫里奧大人喺停車場接我上樓   因為頭先仲有啲暈嘛   點知無的士   咁個人又 OK   所以行番去搭巴士囉 ~

番到屋企即灘喺梳化呀   我好少會咁   多數會沖涼入房瞓   乾淨啲嘛   不過實在無力   所以涼都唔沖   喺梳化度瞓喇 ~

瞓咗 1 個鐘好好多呀   個肚唔痛   又開始勁餓   叫里奧大人去海寶買點心   但 2 點 45 分   所以咩都無得買   佢話買豉椒牛肉炒麵同埋點心番嚟   咩都好啦   餓呀   最緊要快   哈哈 ~

本來叫 1 款點心就啱啱好   但里奧大人又叫多樣   之後飽到有啲辛苦 ~

我又 Hea 過喇   差唔多 7 點半落樓去食部隊鍋   點知要等 9 張枱   咁唔等 lu   去食餃子算喇 ~

食完番屋企   抖陣就沖涼   今日咩都唔會做   要好好休息   呵呵 ~

太興八寶飯 (外賣) ( 26-JUN-2014 ) + ( 27-JUN-2014 )

( 26-JUN-2014  THU )

今次每月一到都 OK 喎   痛咗一陣就無嘢   只係好攰好攰   咁我打埋番菇場請假就瞓   瞓到 1 點半都醒 lu ~

出廳睇電視   之後仲覺得餓   所以淥咗 2 隻雞蛋做 Lunch 呢   最緊要夠快 ~

睇下電視又瞓下   里奧大人 8 點先放工   佢又買咗八寶飯套餐比我食   因為知我想飲湯   不過今次慘喇   食完個飯極度反胃   之後個肚開始有啲痛   所以即沖熱水涼即瞓覺喇 ~

( 27-JUN-2014  THU )

今朝 8 點半起身   不過個肚都有啲痛   沖埋涼抖陣仲痛   但都想番工   當落到樓下果陣時其實有啲暈   全部嘢係白色   所以深呼吸一下再行   但真係頂唔順   坐喺商場出面嘅櫈抖一抖   再打番去菇場請病假   之後再去診所問可唔可以改醫生紙   因為如果佢話唔可以改   我就睇醫生   不過姑娘話當值醫生唔喺度   所以答唔到我   但應該無問題   叫我番屋企等電話 ~

番到屋企即瞓喇   無耐收到姑娘電話   話可以改到醫生紙   之後又繼續瞓   雖然都痛   但好似痛咗 3 個鐘就無事   因為我食藥瞓   想比自己瞓得林啲 ~

瞓到 4 點半   之後出廳睇電視   但個肚又 OK 無痛   感恩呀 ~

里奧大人 8 點喺大陸放工   咁叫佢買茶葉蛋比我食   我叫佢買 2 隻   佢又買咗 3 隻   咁應該係買 3 隻平啲定啦   佢又唔幫手食   叫我食 1 隻全蛋   其餘 2 隻食蛋白喎 ~

聽日要番工   所以我 11 點都瞓喇   佢就睇電視 Relax 下咁啦 ~    

唐記點心 (外賣) ( 25-JUN-2014 )

( 25-JUN-2014  WED )

今朝里奧大人喺官塘見客   所以又可以陪我食早餐喇 ~

菇場唔忙呀   所以有啲眼瞓   哈哈 ~

今日又有 Lunch Box   因為驚唔飽   所以淥埋杯麵   點知飽鬼到呢 ~

好似作每月一到咁   放工即刻去睇醫生 lu   攞定聽日假紙   咁可以全情投入咁瞓覺喇 ~

個人好鬼攰   所以都唔煮喇   番屋企即沖熱水涼 ~

里奧大人差唔多 7 點 45 分先放工   叫佢去唐記買嘢番屋企一齊食呢 ~

終於每月一到喇   但今次又 OK 咁噃 ~

收到大食表妹電話話婆婆因為胃痛入咗急症   佢就即刻去急症睇下婆婆咩事   但我唔去喇   真係好鬼攰   之後叫佢有咩消息就 Whatsapp 我   不過我 10 點 45 分都瞓覺 lu ~

魚香茄子 + 蕃茄薯仔魚湯 ( 24-JUN-2014 )

( 24-JUN-2014  TUE )

今朝臨醒之前個夢好搞笑   夢境嘅日子仲好肯定係星期一   因為我 Green Monday 嘛   食哂 3 餐都係素   之後經過大排檔   見到好多枱都有一大碟炸魚皮同一大碗魚蛋湯   好似好好味   不過我話我今日 Green Monday 喎   之後都忍唔住拎塊炸魚皮咬咗少少   話都係唔 Green Monday 咯   再拎多塊嚟食   哈哈   又會咁唔夠定力嘅 ~

但我朝早又唔係餓㗎喎   所以都係食奶油脆豬 ~

菇場都幾 Free   因為阿 Head 同老闆都唔喺度   我連 System 同 Emai 都唔開添呀   因為里奧大人影啲相 Size 好大   1 張閒閒哋 8mb   好在我喺屋企 Re-size 咗   唔係喺菇場 Re-size 嘅話   一開即死機都似   不過都有睇漏囉   所以一開 Blog 無啦啦好慢好慢   就知道一定有里奧大人啲相喇   哈哈 ~             

今日帶 Lunch Box   因為尋晚里奧大人食唔哂啲叉燒炒麵囉 ~

放工去街市買餸   番到屋企都即預備晚餐喇   滾湯之後就拖地   雖然開咗冷氣   但我啲汗不斷係咁流   額頭啲汗直頭滴到落眼睫毛   條頸又係汗   真係徑步都無咁多汗出呀 ~

里奧大人 7 點半番到屋企喇   不過仲未食得呀   今晚煮飯時間失咗啲預算   哈哈 ~

是日晚餐 - 魚香茄子 + 蕃茄薯仔魚湯  

魚香茄子 - 買咗 3 條大茄子   但搵唔到大碟一次過蒸   所以要分開 2 次蒸   就係咁要用多 15 分鐘   同埋今次煮出嚟好鬼大碟   里奧大人話係 6 個人份量   零舍誇張   最多咪 4 人份量 ~     

蕃茄薯仔魚湯 - 好耐無湯水喇   係時候要滾啖湯比里奧大人飲下 ~  

搞掂哂就再抹下柜   之後沖涼休息喇   腰骨痛 ~

里奧大人今晚 10 點半就瞓   我 11 點先瞓呀   但其實又唔眼瞓   不過唔理喇   照瞓 ~

Green Monday 韭菜炒麵 + 蔥油菜心苗 ( 23-JUN-2014 )

( 23-JUN-2014  MON )

好眼瞓添   不過預咗   呵呵 ~

今日 Green Monday   所以早餐食芝蛋治烘底   要飽啲呀   但其實食咗一半已經好飽   但唔可以留番囉   因為麵包會索哂啲油仲難食 ~  

菇場唔忙喇   所以又做自己嘢 ~ 

Lunch Time 落去買腸粉   之後幫埋 PMS 買飯就番菇場 lu ~

放工即走喇   要去街市買餸   番到屋企都快快手預備晚餐   好餓呀   哈哈   里奧大人 7 點半打嚟話放工喇   但我都食先喇 ~

里奧大人當然唔會 Green Monday 啦   所以整個叉燒炒麵比佢 ~

是日懶餐 - 韭菜炒麵 + 蔥油菜心苗 

韭菜炒麵 - 其實想加埋芽菜   不過里奧大人唔鍾意   所以就咁韭菜算喇   買咗 2 個麵餅   原來好鬼多   所以我要帶埋 Lunch Box 呢 ~    

蔥油菜心苗 - 本來想食粟米   不過好似好耐無食菜咁   咁就買菜心苗囉 ~             

搞掂哂就即刻沖涼喇   之後熨衫   里奧大人幫手熨幾件   條友仔吖   比我昅到佢求其熨我條裙呀   又一路熨一路睇電視   之後我全程昅住佢點熨呀   哈哈   佢話我駛唔駛昅住哂呀 ~

真係勁攰   11 點就即瞓喇 ~

上海婆婆 @ 九龍灣 ( 22-JUN-2014 )

生煎鍋貼 - 都幾多肉汁    

干扁四季豆 - 越食越鹹      

排骨粗炒 - 好油呀  同埋無味嘅      

( 22-JUN-2014  SUN )

今朝 10 點 15 分自然醒   之後都起身食早餐 lu ~

去太興食早餐   好感恩等 5 分鐘已經有位   因為初初諗住等好耐呢 ~

超級大碗    食極唔完咁

食完就番屋企抖陣   沖埋涼就陪媽咪去飲茶喇   又係食食食   哈哈 ~

諗住媽咪都係黑臉㗎喇   但今日又無嘢喎   仲猛咁問我食咩食咩   同尋晚係判若兩人   所以同媽咪 12 點半飲到 2 點半   再陪佢買衫啦   之後我番媽咪屋企   媽咪就去做運動 ~  

原來已經 3 點半喇   今日我帶埋電腦上媽咪屋企 Re-size 相   太專注整相   真係有啲想嘔 ~
   
媽咪 4 點幾都番嚟 lu   咁傾下偈   之後佢沖涼整嘢   我就繼續整相   想快啲搞掂 ~

差唔多 5 點半   電腦嚿電差唔多用完   話得 23 分鐘用電量喎   雖然仲未整完   不過我都差唔多收工   但其實濕電點解會用得完囉   因為里奧大人特登叫我帶濕電   咁就一定唔驚無電家嘛   奇怪   一陣問下佢先 ~

打比里奧大人想食咩   佢話想去上海婆婆食排骨炒粗   咁是但啦   我差唔多 6 點 15 分都去到   咁即刻 Line 里奧大人話到咗啦   不過都知佢無睇 Line 喇   因為我見到佢行另一邊   仲要坐低添   我即刻叫佢過嚟坐呀 ~

叫完嘢食之後   我即問佢點解電腦會提我用電量只得 23 分鐘嘅   佢話無可能喎   但我插得啱㗎喎   之後佢問我有無插插蘇呀   哈哈哈哈   我話係無嘅   唔怪得會用哂啲電啦   實在太論盡喇 ~

食完就去百佳買雪糕   之後番屋企喇 ~

今晚 11 點半要瞓   好在都眼瞓   呵呵 ~

大家樂 @ 官塘 ( 21-JUN-2014 )

原隻 BB 豬髀鐵板 (黑醋汁燒 BB 豬髀 / 蜜糖雞扒配意粉 / 忌廉雜菌湯 / 牛油扭紋餐包)

( 21-JUN-2014  SAT )

今朝本來同家姐食早餐架   所以 7 點就起身   但其實 6 點 45 分已經醒醒地   之後 6 點 55 分電話響   原來係家姐打嚟話唔食早餐喇   因為姐夫突然間話幫佢車個喼番屋企   咁里奧大人話陪我食早餐   我話依家 7 點咋   瞓多陣啦   因為我其實想瞓到 8 點先起身番工   呵呵 ~

早餐食芝腿治烘底   因為要食飽啲 ~

番到菇場做埋少少嘢就 Hea 過喇   全程投入寫 Blog 同 Load 相 ~

今晚要陪媽咪食飯   所以晏晝就近近哋去 Mega Box   咁我放工番九龍灣 Join 埋里奧大人一齊去呢 ~

無啦啦想食喇沙   所以去喇沙大少喇 ~

馬來海鮮喇沙 (大蝦 / 蜆肉 / 蟹柳 / 魚蛋 / 豆卜 / 雞蛋) - 我覺得湯底都唔錯

隻蝦都幾大隻   不過唔係太新鮮囉

印尼酸辣咖哩雞 (配油鬆餅) - 都幾辣囉   我食咗幾啖之後   耳仔同牙肉即刻痛呀   勁燥熱 

里奧大人話都 OK 啦

馬拉盞炒玉豆 - 加 $18   超細碟   哈哈   

食完又周圍行   但我隻耳仔同牙肉好鬼痛呀   咁啱見到惠康就入去買雞骨草   見到無咩人排隊比錢   咁我同里奧大人講話呢間惠康都唔會有人買得多嘢啦   因為附近無住宅嘛   咁我話入去睇下嘢   經過啤酒區   我望咗好耐   里奧大人問我望咩   我話睇下個包裝啲球員係今屆定上屆   佢笑爆咀呀   話唔好玩啦   上屆係 4 年前嘅事   點會用上屆喎   咁又係噃   點解我會咁諗嘅   之後邪到爆啦   Cashier 居然排長龍   仲有幾架車喺買好多嘢   里奧大人話一早買完就走啦   依家要排隊   叫我講嘢唔好咁盡呀   哈哈 ~ 

呢排去 Mega Box   我一定會行 Home 21   好鍾意佢地 d 特色傢品   之後再去書局   最後行埋 Ikea 都已經 5 點   要坐車去媽咪屋企喇 ~

媽咪出咗街   咁我哋喺媽咪屋企坐陣   之後再去大家樂 Join 佢   見到佢都買埋嘢食   同埋佢都黑黑哋面   里奧大人以為佢唔鍾意食大家樂   我話佢唔想見到我啫   哈哈 ~

無聲勝有聲   食完送埋媽咪番屋企   坐 15 分鐘走喇   留喺度無意思   反正都已經 7 點半   我都要趕住番屋企做家務 ~

沖完涼即熨 2 機衫   熨到出汗   痴鬼線   之後再沖多次涼就要休息   11 點幾瞓都瞓喇 ~