熱熱熱。新加坡吃喝玩樂 4 天團 + 2 天自由行 DAY 2 (PART 2/3) ( 1-JUN-2014 )

( 1-JUN-2014  SUN ) - PART 2/3

去 Locker 放低袋   就衝去 "Ancient Egypt 古埃及" 玩喇   又係排隊半個鐘   呢次勁喇   原來係坐過山車   又黑媽媽又上又落又掟彎   好驚囉   之後睇番啲相   我都係合埋眼   里奧大人就喺度笑   我真係好驚離心力㗎   不過點都要玩啦   都排咗隊咯 ~

每一樣嘢都做得好認真   好配合主題

講真   其實我都無咩認真睇   因為好鬼熱   好在里奧大人周圍影相咋   我先知原來好多嘢我都無睇到呀   因為我一見到有冷氣嘅地方就會衝入去呢

睇相先知咁巨   可惜我無親眼睇度啦

木乃伊復仇記 - 登上沙穴里的室內過山車   在一片未知的漆黑與死寂中   感受突如其來的木乃伊戰士和金龟子襲擊 <-- 天書咁講

入面好暗   用手機影相都好難囉

木乃伊復仇記屬高速過山車   全程充滿驚險刺激的突發性大動作   如忽地加速 攀升 傾斜 降落或倒退   賓客必須在身體狀況良好時體驗遊樂設施 <-- 天書咁講   我好怕坐過山車   好怕啲離心力   同埋我全程合埋眼囉   都唔知發生咩事   只係想快啲玩完   哈哈

Souvenir 好靚   不過接近 HK$200   唔係咁捨得買

原來頭先落咗場雨

之後又曬到暈   所以一見有冷氣嘅地方又即入去過冷河

玩咗 Transformer 同古埃及   我覺得呢 2 個景區真係好正   好值得去   因為我其實幾抗拒去啲主題公園   但估唔到係咁有驚喜    我同里奧大人講   如果一陣無人   我要再玩過呢 ~

差唔多 1 點就去食嘢   我 Whatsapp 比彩虹妹妹話佢知我哋去馬來西亞食街   原來佢正想 Whatsapp 我哋一齊食嘢   里奧大人話其實一齊食嘢仲好   可以食好多嘢   彩虹妹妹又勁大食   咩都叫   好在佢又真係食得哂   之後佢比番錢我哋   不過里奧大人一定唔收   佢無咩所謂   食得幾多吖   同埋一齊食一齊傾真係好開心呢 ~

喺呢度食 Lunch


排隊買嘢食   咁都比里奧大人偷影到   勁

叫住咁多先   因為張枱唔夠位擺

Steam Chicken 白斬雞半隻 (SGD 16) @ Malacca Chicken Rice Ball 馬六甲雞飯 - OK 啦

Rice Ball 雞粒飯 x 10 pcs  (SGD1.8 X 2) - 我哋食下食下好鬼飽   所以就話邊個叫邊個食哂   咁見到仲有 4 粒飯   要開始計數啦   里奧大人話一早講明食 3 粒   咁彩虹妹妹話食咗 4 粒   我話食咗 3 粒   咁點解仲有 4 粒剩先   我哋明明買 10 粒之嘛   之後彩虹話好似食咗 3 粒   我話我好似食咗 2 粒   是鬼但啦   里奧大人答案就無變   哈哈   之後我話有圖有真相   開張相嚟睇   原來係有 12 粒   真相大白

白咖哩麵 Curry Mee (SGD 5.5) @ Penang Curry Mee - 估唔到好味喎

Fish Ball 魚丸 2 pcs (SGD 1) - 好彈牙   醬汁又好味   彩虹妹妹同我一樣最鍾意食醬汁呢

福建麵 (SGD 6.5) @ KL Jalan Alor Hokkien Mee - 我同彩虹妹妹都想食黑媽媽嘅麵   但又唔記得咩名   好在有得睇相咋   不過我最後真係太飽喇   無咩點食囉

熱呀   唔食冰唔得囉   但佢哋檔口得 1 個人收錢同整冰   所以等咗都幾耐囉   啲冰都溶緊呢

Green Bean Soup 綠豆湯 (熱) (SGD2.5)  / Penang Chendol 檳城晶露 (SGD2.8) - 彩虹妹妹要綠豆湯   我要食 Chendol   因為要降溫   同埋覺得佢材料好豐富   睇見都開心

Chendol 後面係 Lime Juice with Plum 桔子酸梅汁 (SGD2.8)   超好飲   不過一定要加水   唔係會太濃   喉嚨好涸   好感恩我有帶支水咋   我呀   掛住影相   原來個銀包就咁放喺袋上面   後尾個銀包跌咗喺地下   我先知咋    紅色銀包紅色袋撞哂色   真係無留意   驚險驚險

等等下有嘢響   原來沙爹已經燒好

Chicken & Beef Satay 雞肉 / 豬肉沙爹 (SGD0.8 X 10 pcs Min) @ Straits of Satay 海峽沙爹 - 我哋要 6 串雞肉同 4 串牛肉   彩虹唔食牛肉   所以比哂雞肉佢食   我鍾意細細串嘅串燒   可以食多啲

沙爹醬好香呀   百食不厭   哈哈

又入番去環球影城喇

依家無人企喺前面影喇

我都幾鍾意薑餅人   不過一定唔會買喇   唔想買完又掉

毛巾質地好舒服   但其實都唔知呢件係咩來   哈哈

天氣好好   即係勁曬同勁熱   不過點都好過落雨   咁諗會好啲

好喇   因為 Water World (未來水世界) 係 3 點先開始   咁見仲有 30 分鐘   要 Killing Time 嘛   里奧大人就話去坐船睇 "慌失失奇兵"   咁都好喎   只係雖要等 5 分鐘就入得去   咁排隊嘅時候   我仲以為係激流   但里奧大人話睇下啲人出嚟個身都無濕   同埋個樣目無表情就知唔係玩激流啦   之後入去睇   真係無聊到爆   我哋直頭想瞓着添呀   所以終於明白點解啲人出嚟係目無表情喇   哈哈 ~

坐著木兜從紐約漂流到馬達加斯加   到底這個旅程有多驚險 ?! <-- 天書咁講   得佢先講得出   悶到嘔呀

個個都呆哂出嚟呀   哈哈

又話 Water World 會喺 3 點開始   我哋 2 點 55 分去到仲排緊隊   好奇怪囉   正路係比人入去坐家嘛   企喺度好熱呢   真係底底都濕埋   同埋有啲頭暈嘅感覺囉   之後等到 3 點 10 分先放人入去   真係唔知點安排   好唔掂呀   好在都 OK 好睇啦   不過場景好細   我覺得喺澳洲 Warner Brothers 震撼啲~

人頭湧湧   有啲人頂唔順都走咗 lu

真係好多人睇

我哋對住呢度都唔錯

表演範圍好細   不過氣氛好好   表演人物同觀眾好互動   而佢咁興奮嘅樣   係因為佢啱啱 Fing 水去觀眾度囉   呵呵   所以一定唔會坐前面   濕身事小   濕機事大呀   哈哈

之前啲人物一出場   就會片啲水落觀眾度   好在米高叔叔一早同我哋講   呢度啲坐位有唔同顏色   最前唔記得係咩色   但一定唔可以坐   因為代表妳玩得   即係會隨時 Fing 水落妳身上呀 

咁倒吊都好辛苦囉

里奧大人知我咩鬼都驚   無啦啦同我講   妳實唔夠膽咁樣企   黐鬼線

臨完場就落雨   我哋仲以為係特別效果添   原來真係落緊雨   哈哈

好在唔係長命雨   所以等啲雨停咗先走   好鬼熱呀   啲地氣犀利到呢   我哋好似企喺個蒸籠入面咁   終於明白冰姑成日話落完雨最熱   所以我一見到餐廳就入去啦   食就食唔落㗎喇   旨在嘆冷氣同埋坐低抖抖   之後又周圍行下啦   其實地方真係唔大   所以點都要行下   唔係無嘢做   哈哈 ~

我真係好鍾意呢啲車   夠哂 Classic

阿奧你望咩呀   影緊你喎   企好啲啦

                        

無心機影   居然影到咁嘅色   甩色金象獎   哈哈

好在里奧大人有影咋

睇完再去玩多次 Transformer   今次無咁多人排隊   但都唔可以叫做少人囉   今次坐第 3 行   一樣咁刺激 ~

終於影得清楚喇

再見

之後又想飲嘢   所以又去番馬來西亞食街呢   哈哈 ~

Walker Talkie 真係好重要   同埋最緊要你細細個   我之前拎住 Hand Rree 同里奧大人講嘢   彩虹妹妹唔知我用緊 Walkie Talkie   問我做咩口噏噏   哈哈 

Asam Laksa 阿參喇沙 (SGD 5) @ Penang Asam Laksa - 好味喎   酸酸哋   其實唔知係咪新加坡太熱太熱   我好想食酸嘢   但反而喺馬來西亞又唔鍾意食 Asam Laksa 喎   覺得太酸

Lime Juice with Plum 桔子酸梅冰 (SDG 2.80/杯) @ Petaling Jaya Toast & Drinks (八打靈再也土司及飲品) - 我好鍾意飲呀   不過一定要加半杯水溝淡   如果唔係會太濃   飲完喉嚨會好涸

食完就再行下   5 點彩虹妹妹 Whatsapp 我   話幫我哋 Keep 住房鎖匙   我同里奧大人話佢好痴纏   驚我哋撇低佢   哈哈   其實係我衰咗啦   因為彩虹妹妹話我頭先話 4 點去找拎 Key 㗎   佢話見我咁耐唔到   所以幫我哋 Keep 住   之後再約埋時間一齊出去食嘢 ~

最緊要有天幕

酒店大堂

上房喇

之後仲搞笑   咁我地住 7 樓   彩虹妹妹住 8 樓   咁 7 樓開 Lift 門嘅時候   我就好自然按住 Lift 制   彩虹妹妹就好自然咁出 Lift   之後佢行幾步擰番轉頭   而里奧大人就話我哋先住 7 樓喎   哈哈哈哈   佢話我哋兩個奇奇怪怪呀   咁都會搞錯   我話太熱呀   熱到人都顛咪咁解囉   呵呵 ~

我哋住 7 樓

入到房第一件事係沖涼   我好多時同冰姑 Skype   佢話去街之前會番屋企沖個涼先   我覺得好怪啦   一陣出街都熱㗎啦   駛咩特登番屋企沖涼喎   直到今日   終於明白點解佢要咁做   新加坡真係好鬼好鬼好鬼熱啦   連里奧大人怕凍嘅都話熱   何況我呢啲熱底人呢 ~

Hotel Michael - 由美國建築大師 Michael Graves 打造的酒店   是全球唯一由他所設計的酒店   酒店每一角落也充滿 Michael 的建築風格   色彩豐富   又有不同的幾何線條   就像是他一伸手  就變出如此美麗的設計   在房內牆身 床頭板上也有他的畫作   而浴室花灑浴缸   環形的設計玩味十足 <-- 天書咁講
                 

我鍾意呢啲梳化


有 3 張櫈   都算多喎


望出去係咁嘅   里奧大人爬喺床上面影相   攣嚟攣去咁影   我話佢係咪以為自己係戰地記者呀 ?!

有 Cable Car 喎   唔知去邊嘅呢 ?!

里奧大人發現新大陸   佢話原來洗手間圖案咁靚喎   佢無睇天書嘛   估唔到佢會咁留意洗手間   哈哈

番到酒店   佢哋都需要叉叉電 

買比冰姑呀 Penny 同 Carmen 嘅小零食   我好少會買咁多㗎   所以要影相留念   哈哈

呢日未完㗎 ^^