熱熱熱。新加坡。美好回憶記錄 ( MAY 2014 )

今次終於要去新加坡喇   因為本身去嘅越南團取消咗囉 ~

次次想去越南   但覺得貴   又無早機去晚機返   點知今次決定去喇   又要被迫取消 ~

其實本身係諗住去下龍灣嘅   不過知道越南呢個時候成日落雨   咁唔去啦   同埋要坐好耐車同船   講真   我真係唔係咁想   條腰真係好痛㗎 ~

咁之後就睇下胡市明市啦   又好啱我喎   有得食有得買   早機去晚機返   同埋最緊要係日日有機開去胡志明嘛   所以最後都報咗團去胡志明市喇 ~

今次又係好邪啦   15/4 去報越南胡志明市   之後 5月中無啦啦又爆發示威   唔係咁搞笑呀嘛   雖然佢哋係喺工業區到示威   但襲擊對象係華人   咁就好驚啦   點睇我同里奧大人個樣都唔似係鬼佬鬼婆同越南人啦   同埋去旅遊實會影相家嘛   咁樣仲驚   哈哈 ~

咁搞法   我又比佢哋 Hold 住哂啲嘢   感覺兩頭唔到岸咁   煩到暈 ~

因為我覺得啲時間好緊迫   所以我話去新加坡   問咗冰姑   佢 6 月頭幾日喺新加坡   之後就番 Ipoh 一星期   好在問一問佢咋   因為佢唔喺新加坡   我係唔會去囉 ~

16/5 旅協終於發出紅色警示   好多越南團都取消   不過只係 For 去到 26/5   我係 1/6 出發   所以要等到 23/5 先通知   其實 23/5 先通知真係好遲囉   講緊嘅係 10 日都唔夠就要出發   大佬呀  雖然係跟團啫   點都要 Plan 下周圍行家嘛 ~

好喇   要有兩手準備   咁即睇下其他地方嘅資料   但其實選擇唔多囉   如果要 31/5 出發嘅話   我哋揀咗西葡 / 土耳奇 / 俄羅斯 / 新加坡 / 檳城   咁一話取消就即報名呢 ~

23/5 旅行社打嚟話取消越南團   咁即報名啦   但西葡同土耳奇已經 Final   嗚嗚   而俄羅斯最少要玩 10 日   咁唔得啦   最後選擇去新加坡喇 ~

今次去新加坡   最主要真係探冰姑囉   其實本來都諗住年底去探佢   自由行時間好用啲嘛   同埋可以約埋佢一齊玩   但整定要早啲見佢囉   哈哈   里奧大人話我終於見到冰姑   算係圓咗個夢喎   哈哈 ~

因為時間真係好緊迫   好多嘢想買都買唔到   好在之前已經寫定買咩比冰姑   唔駛即時諗買咩   唔係人都顛 ~

新加坡比我第一個感覺係熱熱熱囉   但見到藍天白雲又好開心喎   可能冰姑又成日講好熱好熱   比佢潛移默化咗   哈哈   但好在熱得嚟唔焗   間唔中有啲風都幾舒服嘅   同埋環境好乾淨   治安又好   感覺好安全 ~

我其實係第 2 次去新加坡喇   之前係同媽咪跟星馬團   所以逗留新加坡只係 1 晚咁多   但今次跟新加坡團   同埋去啲景點又 OK 喎   可能我無期望   所以覺得好有驚喜呢   同埋里奧大人又無去過新加坡   佢仲開心   叫做去個新地方嘛 ~

@ Gardens by the Bay

@ Cloud Forest

Red Panda @ Singapore Zoo

食物方面   團體餐就真係麻麻   但自己去搵食嗰幾餐又 OK 喎   都係嗰句啦   無期望反而有驚喜   嘻嘻 ~

豬油渣   至今仍然念念不忘


撈埋肉腥麵一齊食   真係人間極品呀


交通方面   我哋主要係搭 MRT 周圍去   都好方便呢   最正係啲坐位又闊   同埋冷氣夠哂凍   真係 "入咗去唔想出番嚟" 囉   不過我最欣賞係係好多人都唔會坐 "關愛座"   不過冰姑話我哋可能係非繁忙時間搭先有咁情況出現   佢話試過無冷氣添呀   同埋啲人會坐關愛座   但見到有老人家都扮睇唔到   咁極端嘅 ~



住宿方面都唔錯㗎   起碼我每晚都一覺瞓天光   哈哈 ~

Sheraton Tower (5*)

Hotel Michael @ 聖淘沙名勝世界酒店

ibis Hotel @ Bugis

今次好感恩   因為啲團友同導遊同領隊都好 OK 呀   大家都有講有笑   唔似係第一次見咁   哈哈 ~

老實講   今次去新加坡最最最開心係見到冰姑一家人   因為無諗過會見齊人囉   我諗住要去 Ipoh 先見到豬仔女同阿蘭嘛   估唔到喺新加坡可以見到   不過就見唔到老爸   因為佢喺 Ipoh ~

冰姑同老豬都要番工   所以只係夜晚先同佢哋食飯咋   同埋都唔可以咁夜添呀   因為佢哋第朝要番工呢 ~

今次真係話見就見咁   所以啲時間真係好緊迫   冰姑又係喺好短時間之內   買咗我鍾意嘅零食比我   實在太客氣啦   多謝妳呀 Muack ~

我覺得里奧大人都好鍾意今次嘅旅行呀   因為佢去到邊影到邊   曬到顛都唔走   係都要影埋先走囉   佢都影咗 16 GB 相呀   反而我好少影相   因為真係好鬼熱呀 ~

期望下次再見到冰姑   不過唔想喺新加坡   哈哈哈哈哈哈 ~

團費 HK$6,099 x 2
保險 HK$96 x 2 
香港離境稅 HK$120 x 2
燃油附加費 HK$386 x 2
停留附加費 HK$600 x 2
香港機場保安稅 HK$33 x 2
新加坡離境機場稅及手續費 HK$270 x 2 

ibis Hotel 2 晚 HK$927 x 2 (另加 17% Tax)

兌換率 HK$6.2 (SGD1)