百匯酒家 @ 官塘 ( 4-FEB-2017 )

其實仲有好多餸   不過唔影喇

( 4-FEB-2017  SAT )

里奧大人今朝番公司開年   真係好唔慣佢星期六要番工   佢都好驚唔知醒   所以校咗 2 個鬧鐘   我話唔駛驚喎   我 7 點半都要起身   唔會無鬧鐘響喎   呵呵 ~

我約咗家姐食早餐   今次傾到唔知時間   家姐一望個錶話 9 點喇   所以要走啦 ~

同家姐食早餐多數 Share 食   咁就可以樣樣食啲啲咁   正呀





9 點 35 分先番到菇場   好在所有大粒唔喺度咋   唔係一入門口就見到佢哋   真係勁樣衰囉 ~

做埋個 Report   又做埋其他嘢   12 點 45 分搞掂哂   仲諗住 Hea   點知忙到放工 ~

里奧大人食埋開年飯先番嚟   咁我去大孖買話梅肉比阿 mi 啦   咁可以了咗一件心事喇 ~

行行下居然見到兔兔   真係好日唔行官塘   咁都會見到   本來我仲係行另一邊路添   所以真係整定見到佢   哈哈 ~

咁又未餓   又行下萬寧   見到香口膠做特價   即打比家姐問佢要唔要 ?!   佢講完話要之後   就話頭先正想打比我   又會咁啱嘅   同埋我好少星期六會去萬寧睇嘢㗎   我正想買香口膠好耐   又比我今日見到做特價   感恩呢 ~

買完就去麥記食嘢   之後番屋企喇 ~

諗住里奧大人 4 點先番到嚟   估唔到佢 3 點唔夠已經番到屋企   一番嚟就話要瞓陣   梗係啦   放咁耐假都瞓到 11 點   今朝 7 點要起身   要補眠都係必須要嘅   哈哈 ~

屋企凍凍哋   我又攰攰哋   所以 4 點半到我要瞓喇   瞓咗半個鐘都醒 lu ~

執埋啲嘢就打的去姑奶屋企   原來兒生女佢哋都嚟咗   仲開緊枱   佢男朋友見到我   即讓位比我打   因為佢原來係唔識打嘅   哈哈 ~

同佢地打牌又係玩籌碼㗎   好耐無打麻將   我都唔記得點計番 lu ~

最後嗰舖係兒生仔食糊   佢好認真計幾多番   我哋話豪比你啦   所有籌碼比哂你啦   唔該順便放番好去   哈哈 ~

一齊出發去酒樓   今晚係補番開年飯   不過都有兩家人嚟唔到囉 ~

差唔多 7 點先食   食下傾下   9 點都各自歸家 lu ~

落雨呀   仲幾密添   所以番到屋企都要即沖涼暖暖身喇 ~

開埋機洗衫就休息   我就 12 點瞓   里奧大人就仲未瞓 ~