蕃茄洋蔥豬扒 + 蔥蒜旺菜 ( 19-FEB-2017 )

諗住仲有幾包四洲紫菜喺度   咁整黃蘿蔔壽司啦   點知原來里奧大人食哂啲紫菜   咁無計啦  唯有用手就咁搓到壽司型啦   點知原來係唔得   仲要黐到成隻手都係飯   咁我食埋喺手啲飯嘛   里奧大人 "乸" 住塊臉   好驚咁話 "唔好整啦   好似非洲人食嘢咁"   哈哈   我 Send 比阿 mi 睇呢張相   佢以為係蕃薯   仲話好香甜添   哈哈 



唔忿氣呀   所以就咁用匙更 "北" 一下   壓到外型似壽司咁囉    最緊要包住條黃蘿蔔就可以了



( 19-FEB-2017  SUN )

今朝 9 點半鬧鐘響   里奧大人沖埋涼   我都起身 lu ~

里奧大人又問我仲瞓唔瞓   我話唔瞓喇   我之前成日眼腫腫   黑眼圈又勁   佢知我瞓得唔好   成日叫我瞓多啲   咁我瞓得唔好真係有樣睇家嘛 ~



奉獻完都走喇   去 CSL 問嘢   之後再去美心換 Cake   咁里奧大人要做公司嘢   我叫佢番屋企先   咁我可以慢慢行街市喇 ~   

去街市揀百香果   咁我唔識揀嘛   咁問檔主   佢幫我揀啲凹凸不平   肉肉酸酸嗰啲   佢話呢啲先甜喎   同埋我見之前有幾個師奶都係揀瘀瘀黑黑嗰啲呢 ~

$18/2 磅   我覺得好酸呀   不過有啲係無哂水份嘅

買完再去買洋蔥   其實好驚去街市買洋蔥   個個都甩皮甩骨咁   我要行幾檔先搵到靚啲   咁我見有檔都 OK   但爆哂皮   所以唔買   檔主話美國洋蔥係咁呀   爆皮先靚喎   咁信佢啦   之後佢又話洋蔥同人咁囉   人不可以相   唔好睇佢地肉酸   實則係好嘢喎   真係搞笑   買百香果同洋蔥都係買啲外表唔靚先好味道 ~

買完番屋企   3 點幾食 Cake   食完就熨 2 機衫   熨到差唔多 4 點半   條腰勁痛   所以要抖陣先得喇 ~



唔想咁急急趕趕   所以 5 點半開始煮嘢 lu ~

是日晚餐 - 蕃茄洋蔥豬扒 + 蔥蒜旺菜  

蕃茄洋蔥豬扒 - 煮蕃茄洋蔥係悶啲   但有益嘛   所以我間唔中都煮呢 ~       

蔥蒜旺菜 - 尋日喺 AEON 買㗎   半個 $14.9   但估唔到份量咁多   煮完先醒起   應該學阿 mi 切細片放入盒   留番再食   依家食菜都食飽咁   哈哈 ~

洗埋碗抖陣就出去徑步   之後番屋企開機洗衫   沖埋涼就休息喇 ~

11 點瞓覺   不過里奧大人話瞓唔着   所以又睇 "瑯琊榜"   唔理佢喇   我要瞓覺喇 ~