大家樂 @ 官塘 ( 13-APR-2017 )

檸檬他他醬烤雞 超值 2 人餐 ($88) - 檸檬他他醬烤雞 1 隻 / 粟米 2 支 / 薯餅 2 塊 / 芝士茄汁海鮮飯 / 凍檸樂 2 杯   食剩 1/4 隻雞同海鮮飯   打包留番聽日做 Lunch  



( 13-APR-2017  THU )

今朝里奧大人 11 點見客   所以陪我食早餐   開心開心 ~



菇場忙呀   所以要開行 Turbo 做嘢 ~

Lunch Time 出去食粥   之後去超市買嘢   明明買 9 支參蜜比里奧大人   咁我 Check 單係有 12 支   好在我記得自己同 Cashier 講 12 支   唔係以為人哋打錯   最後我唯有拎多 3 支囉   重到呢 ~



仍然忙下停下   4 點幾先有 Urgent 嘢   真係趕到我周身唔舒服囉   好在放工前搞掂咋 ~

里奧大人今日見完客   再去會展   估唔到見到舊同事占美   佢係我同里奧大人嘅舊同事   佢好經典㗎   話自己牙痛   好似人哋生仔十級痛苦咁痛   我忍唔住話乜你試過生仔咩 ?!   佢拎匙更飲湯又蘭花手   笑起上來又成日只係微微咀笑   真係種種行為我都 Man 過佢   哈哈哈哈   我哋個個以為佢係 Gay 呢   占美同里奧大人好有緣   有次我同埋家姐同佢一齊喺地鐵站見到占美   有次里奧大人上大陸   過關又見到佢   今次諗住會見番啲行家   估唔到會見到佢囉 ~

今日難得里奧大人咁早放工   咁我雖然解凍咗豬肉   但都唔煮喇 ~

放工即走   諗住去大家樂一人火鍋   點知原來唔出火鍋喇   咁食烤雞餐啦 ~

食完番屋企   沖埋涼就開機洗衫   之後休息喇 ~

今晚好鬼攰   好似熱氣咁   食咗 2 個蟠桃又好啲喎   成個人無咁熱氣咁 ~

里奧大人聽朝 6 點起身   所以 10 點半都瞓   我都一齊瞓喇   可能真係熱氣   個人好鬼攰呢 ~