金菇雞丁 ( 10-JUL-2017 ) + ( 11-JUL-2017) + ( 12-JUL-2017 )

( 10-JUL-2017  MON )

今朝出門口覺得涼涼哋咁   但阿 mi 就話好熱   仲開緊冷氣   我呢排都覺得唔係咁熱咁㗎   個身成日凍冰冰   唔通真係潮凍   哈哈哈哈 ~

早餐食蛋治   加埋杯奶茶   有啲反胃添 ~



菇場忙咗陣就可以 Hea 過   拿拿聲 Load 相   難得所有大粒唔喺度 ~

Lunch Time 出去一田行下   買咗啲嘢就走   有時一田啲特價嘢係平過百佳同惠康   但正價就貴人哋幾蚊至十蚊   肉類蔬菜生果就直頭貴好多添呀   唔啱我呢啲平民百姓呢 ~

1 點幾喇   仲未餓   所以買支乳酪食健康餐算喇   啊呵 ~



終於可以揀相   得今日可以忘我境界揀相咋   聽日又要鬼鬼祟祟了 ~

放工即走   番到屋企抖陣   6 點半開煮   7 點唔夠就食喇   好鬼餓呀   哈哈 ~

是日懶餐 - 金菇雞丁

金菇雞丁 - 尋晚食剩嘅雞丁   再加多 2 包金菇   之後再撈多個印尼撈麵   食完就充滿力量喇 ~

抖陣就洗碗   之後沖涼休息 ~

今晚雖然唔係太攰   但 11 點唔夠都瞓 lu ~

( 11-JUL-2017  TUE )

個肚谷住扯住咁   唔通今日會每月一到 ?!

感恩今朝都有啲胃口食嘢   但唔食得多   哈哈 ~



菇場抖陣就 Pack File 喇   想快啲搞掂 ~

Pack 到差唔多 Lunch Time 就抖陣   一陣再 Pack 過   好鬼攰呀 ~

頭先力的表現   所以有啲餓   同埋個肚扯住扯住咁   出去食水餃米暖暖個肚呢   食完都即番菇場抖喇 ~



好嘢   Pack 到 3 點幾就搞掂   終於又了咗一件心事喇 ~

越嚟越攰   都應該嚟料   之後真係每月一到   所以放工即去睇醫生拎病假紙喇 ~

睇醫生就超級勁快   但等拎藥就好耐囉   幫埋里奧大人買麵包就即番屋企沖熱水涼   之後休息喇 ~

里奧大人番嚟睇支光管先買嘢食   不過支光管又無事   最怕係咁   想快啲搞掂嘛 ~

我都無胃口食嘢   叫佢自己食算喇   見佢盒海南雞飯啲酸菜真係好吸引   不過唔敢食   驚太酸會胃痛 ~

食埋藥   敷埋暖水袋   8 點半瞓覺喇 ~

( 12-JUL-2017  WED )

今朝請埋假就瞓覺喇   唔係話劇痛   但冤住冤住唔舒服囉   同埋又嘔   所以都係唔番工喇 ~

嘔咗 6 次   其實又好似好啲咁   今次算好啦   去旅行飲得超勁多凍飲   其實都驚今次係痛到死去活來咁架   感恩唔係囉   咁我番到香港都盡量飲熱嘢   又每晚敷暖水袋   阿笠話個人暖   熱力夠   會無咁痛㗎 ~

今次勁   瞓下醒下   瞓到夜晚 8 點 15 分先醒   里奧大人啱啱番嚟   佢買咗麥當勞番嚟食   不過我無胃口   抖咗陣就沖涼   之後又食藥瞓 lu ~